﻿Jop.
18.
Jopgo po wala silibo si, te bidi Bildat te Suha bulu bidigo po wei ponoyu, e tama wali. 
“Jop, nisu nago pedauwali pania saibawe? Nago naga po bolo hasia bugagia kone palao, tama dago nage dali po waibao. 
Magi baso nago da kau kibu yaligia kolesaga meni yai dao homu ebawe? 
Naga sębęgo naga ma me te dolobao. Jop, mena tama tialiwe? Nago homugo Godigo homu kolesaga hasegelama, nago homu kolesaga wali asomaina olama ebawe? Agai sęgę mabo da dwai kolesaga ebo wei ponoyu, tama tibo dao. Tama agai te kolesaga hasegelegobeo. Agai tigidali nai dabe nigilama, augwa pesagede muai dao. Tama agai augwali sela sągobeo. Agai te masigi sela sąnama, tǫ olo tagalogobeo. Mu tama, mu menio. 
Dwai kolesaga ebo bidi dabe augwali dene sabo dao. Godigo augwali silibo da, te bidigo lam sole sula sabo tiwai ebo dao. 
Tama te bidi dabego augwa bede lam sole ula me elalubo sugobeo. Aga bede te hulia saibao. 
Tama te bidi dabe augwali bugagia bidibo sogo da, augwali bomo elama, bilibo dao. Tiali goli, augwali sęgę sabo sogo da, augwali mage basia selama, dua dua naga bilibo dao. Augwaligo gasa bidi dabede dwai sę yabo homu ebo dao. Tiali goli, augwaligo ebo homu geda munama, te homugo augwa ma dolobo dao. 
Augwali te bulu hasa te kęde tubo tiwai dao. Augwali te bidigo te bulu hasa sainu tǫ dogai digi, te hasa tulalubo tiwai dao. 
Augwali te hasa dabe bade tola sabo tiwai dao. Awe, augwali te kęde mu dąų walaibao. 
Augwali te bidigo hasa tola sainu elama, bono gebelama, tola sabo tiwai dao. Tiali goli, te kę nanani bidi aga ma tola si da. 
Augwali wi mu ilabo nai dabe da, te da tigidali bulu badu bobegela sai elalubo, augwali bilabo madi,” wali. 
“Polobadu da, dwai sę ebo bidi dabe bugagia bidai dao. Tiali goli, megi da, augwali habuge elama, nasi mu ebo. Tama dwai sogo pedalobogo augwali dolainu no sealubo. 
Gasi me deli dwai mu pedelama, tama te bidi dabego tigi nogo sągą dolama, augwali isilaibao. 
Augwaligo homugo tibo augwa be dali, augwa mone dali sigo augwaligo bidibo ula usu ilaiba homu ebo dao. Tiali goli, isibo kolesagago augwali augwa bedu guda sąwaibao, tama augwali te isali bidi dabe dali bidigi paibao. 
Augwali isilama nosali da, augwa hani dabe deli augwa te bede bidabo me bidigobeo. Tama tibaso, gasa bidi hani aselama, tama augwa masigi salfago nigai pauda te bede gelama, tama dwai denami sela sąwainu yaibao. Tama bidi dabe augwali te bede ma bidainu usu yaibao. 
Dwai kolesaga ebo bidi dabe da, mu sia saibao, te ni aga pedali dali, nologo dali si sasia pelama, damua pabo tiwai yaibao. 
Tama we bidi dabe augwali homu gegeda paibao, tama te bulude augwa nogi sia saibao. 
Te bage augwali bididuali sogo da, augwaligo giliga ula suai dao. Tiali goli, isibo augwaliba asaligo augwali hulia sai madi mu pali. 
Augwa hani da, mu hagawaibao. Tama augwa wai puluba, o augwa wegigo wai dabe augwa bulude me bidigobeo. Mu meni. Tigidali mu isila paibao. 
Tama te giliga asobo badu bidibo bidigo me, giliga dega sabo badu bidibo bidigo me, te dwai sę te bageba pedelali po odama, tama augwali noma selama, wi mu yaibao. 
Te tobage dolobo sę ebo, te Godigo po wali pisąma ebo bidi hani dali, augwa bulu dali side te sę pedalaibao.” Te Suha buludu asali bidi Bildatgo te po Jopbolo pusali. 
