﻿Jop.
20.
Jopgo po ola silibo si, tama te bidi Sofar te Nama tǫ bidigo po wei ponoyu, e tama wali. 
“Jop, odao. Nago pogo ena noma selama, tama ena homu hauwa mu te ebao. Tama eno nago po polo wei ponaibao. 
Nago wado po eno polo odali. Tama tego da hale mu ilali. Tiali goli, eno dwagi yai homu kolesaga elalubao, tama eno nago po dolo wei ponaiba. 
Nago koneani, polobadu gagalasa mu da, polobadu Godigo we bidi tǫba tagalalidu gagalasa, megiba usu nagasali da, 
te dwai kolesaga ebo bidi dabe augwali pęwadage sogo tǫde bugagia godolo elama, bidai dao. Te God tudiba mubo bidigo bugai homu ebo sogo te bobobage menio. 
Te tobage bidi genuai bidi nigilama, genuai nogi te we bidigo gedude saibao. Te bidi aga te bulu du tiwai pǫ dali dąį elalubo tiwai dao. 
Tiali goli, te bidi aga di dolobo tiwai dolaibao. Tama aga sesemane mu hagawaibao. Tama bidi dabego aga polobadu sulama koneani bidi dabego da, augwaligo e tama po waibao, ‘E bidi mage sę yaliwe? Megi da, aga menade bidibowe?’ te po waibao. 
Te tobage bidi aga te hulide ebo nade hagabo tiwai deli sogo hagawaibao. Awe, bidi dabego aga mu ma sugobeo. 
Mu tama mu, aga, aga bulude munu ma bidigobeo. Tama tede bidibo bidigo aga munu me sugobeo. 
Tama aga wai pulubago augwa ayago wi sali nai te nai meni yai bidi dabebolo wei ponaibao. Te doado bage aga digi te nai meni yai bidide wi sali nai wei ponaibao. 
Ma, aga gesi bidide bidiyu, bomo hauwa mu elaluai da, teda deli sogo tama aga isaibao. Tama aga bomo sese mu tama siliyu, aga te gų pagede pila muyu elaluaibao,” wali. 
“Te dwai bidi dabego dwai kolesaga godolo ebo dao. Tama augwaligo te dwai kolesaga tagalabo homu ebeo, te bidigo pusai nai godolo ebo tiwai tama aga hamena dologoba munama, tama te nai pusu polo silisą emainu. 
Tiali goli, augwa dwai kolesagago augwa ma dolaibao, te tubo nai te bidigo haliga tomoba pabo tiwai yali gilama, tama augwa haligade te dwai gulago nabi tiwai pedelama, tama nosali augwa ma dolaibao. 
Dwai bidi dabego mone dabe hauwa mu sisinibo dao, augwa te nai wi sabo kolesaga ebogo. Tiali goli, Godigo te kolesaga sela sąwaibao, te bidigo nai hauwa dalama, tama ma bugulobo yali gilama tiaibao. 
Te tobagego sisinibo naigo augwa ma dolaibao, te gula manigo bidi gąų kelama, agai dwai nabigo augwali ela isilibo tiwai yaibao. 
Augwaligo te nai dabe sisinibo si da, augwaligo homugo te nai dabe elalubaso, augwali bugagia bidiyu, dwagi yai homu yaiba homu yali. Tiali goli, augwaligo te homu kolesaga geda muaibao. 
Augwali olo dali bomai sę yali, te mone dabe, te nai nai dabe olo dali bomai sę yali. Tiali goli, augwali te nai dabe nogo tolaluyu, dwagi yai homu idugobe. Magi baso meni. Godigo yaide gasa bidi dabego augwaligo te nai dabe somainu yaibao. 
Agai te tama tiaibao. Magi baso meni. Augwaligo nai meni yai bidi dabe hobede isąma yali pode. Meni. Augwaligo augwalide dwai sę yali. Tama haniani tibo sę elama, tibo po olama, gasa bidigo be dabe sali. 
Tigidali sogo augwaligo gasa bidigo nai sulama, pesą eyu yali. Tama augwaligo te nai dabe sabo hodo me dolabo homu me ebeo. Tama tibaso, God augwaligo te godolo ebo nai me tolalumainu sula tagalabo homu ebe. 
Mena nai dabe augwaligo me godolo yali da, teda augwaligo siyu naga ebo dao, te bidigo dwagi yai tubo nai sulama, tula siliyu yaide, dage me tagalabo homu ebe tiwai yali gilama. Tiali goli, te dwagi yai sogo te pęwadage sogo bidama, tama sia saibao. 
Augwaligo te dwagi dwagi yai nai dabe elalubo sogo da, genuai sęgęgo augwali mesegelama, tama dwai dene dabego augwali aiyaba mu elaluaiba,” Sofargo te po wali. 
“Te nai dabe hauwa sabo homu yali bidi dabe da, teda Godigo augwaligo nai hauwa mu somainu sula tagalaibao. Tiali goli, te sabo homu ebo nai dabe dao, te dwagi yai nai dabe meni. Menio. Godigo te bage dali sębę genuai mu eyu, tama agai haniani sęgę augwalibolo menama, tama augwali mu pągąna paibao. 
Agai boi bidi dabe teba tagala palaiba. Te augwa hwįbo ge hwą dali, ene te brasgo nigai dali, tama tagala palaibao. Tama te dwai bidi te boi bidigo hwą tolasa asobo sulama, wi pobaso da, teda te boi bidi dabego enesigi selama, ene te bras ula yaigo enaibao. 
Tama te enego augwali tigide teda paibao. Te dwai bidi dabego te enede augwaligo kaneme elalubo subaso da, augwali wi mu yaibao. 
Tigidali wa hulu dabe, mone dabe, augwaligo sisinani nai dabe da, sese dola silaibao. Tama te dwai bidi dabe dali, augwa we wai puluba dali sese, te bidi mego dalisąma yai iside sese hagala silaibao. 
Dagalu aga digi te bidi dabego sęgę hanilaibao. Tama tǫgo me po tų ela mawaibao. 
Godigo augwali dali sębę mu yaibao. Te agai augwaligo dwai sęgę wei ponoyu da, teda augwaligo mone nai dabe sese hagala silaibao, te genuai wę asiyu, augwaligo nai dabe sese da selasa pabo tiwai yaibao. Tama deli me elalugobeo. 
Godigo te dwai sę ebo bidi dabego te dwai sęgę somainu dąį ilai dao. Awe, augwali te silibo tiwai emainu tiwai dao,” Sofargo te po wali. 
