﻿Godigo Nogi Ugwaba Sabo Tęąbi Po Wabo Buku Dabe.
3.
Devit te aga ogwa Apsalomde wi pali, tama te sogo agai te balia po asęai dao. Te buku 2 Samuel, Dąį 15 me 16, te suao. Genuai Bidio, te eno boi bidi dabe augwali te hauwa mu pedalubao. Te bidi hauwago ena dolobo sę ebao. 
Mu tama, te augwa hasi augwaligo enade te tama wabo, “Te Godigo aga me tau sogobeo,” wabo. 
Tiali goli, menio. Genuai Bidi naga digi te nago ena geme dualubo awa tiwai ebo dao. Nago naga ena te augwali aiyaba elalumainu ebo dao. Awe, nago naga te eno homu sęgę sela sąyu, tama eno tobolu ugwaba sabo dao. 
Eno te Genuai Bidiba i weyu, te ena tau somainu ebao. Aga te aga wiegi yai tedali gasagi yai bulu dude digi bidiyu, tama eno i wabo odoyu, tau sali. 
Ena te betde pibo, te ena isibo tiwai ebo dao. Kigamude ena ma hodasa holama, tama ena bugagia bidibao, magi baso meni, Genuai Bidigo ena tonaluali. 
Te 10,000 boi bidigo ena te tigidali badu bobogela sobaso, tagalao, ena augwalide wi me egobeo. 
Genuai Bidi nage asao. Nage eno God, nage aselama, ena tau sagasiyu, te boi bidi dabego nogode ma sao. Nago te eno boi bidi dabe tigidali aiyaba mu elalubo dao. Nago te dwai sę ebo bidi dabe dolobo dao. 
Genuai Bidi, nago deligo naga te da ma siyu, tama da me dolisiąbo da. Eno homugo nago te naga we bidi dabe wiegi yai bugagia bidimainu ilao. 
