﻿Godigo Nogi Ugwaba Sabo Tęąbi Po Wabo Buku Dabe.
7.
Me sogo Devitgo te Kus paniabo homu sęgę elaluali, te Benjamingo hani bidi me deligo, te po agaba wali, tama tiyu agai te Genuai Bidiba gedu haluasa po wabo balia po wali. Genuai Bidi, eno God da, ena nageba asiyu, tama ena te boi bidi dabede geme duala saibao. Nago ena tau sobaso, te ena pobeasa asali bidi dabego te augwaligo ena me eligobeo. Nago ena ma sobaso, te ena me dolobeo. 
Tiyu, te ena augwaligo dolidalio, te laiongo bidigo tigiwali togobo tiwai gilama idalio. Tiyu, te augwaligo ena te gasaba me kekasa peyu, tama ena ma sainu yabo bidi me deli meni yaibao. 
Genuai Bidi, eno God da, te eno dwai sę meba te tama eyu da, te eno gasa bidiba dwai sę eyu, 
tama eno ena abagi dali geagano bilibo sę eyu, tama eno te ena boi bidi dolobo sę olo eyu ebaso da, 
teda, nago te boi bidi dabego ena pobelama, tama ena tola somainu yagameo. Tama augwa ena ela muyu, tama ena mu dolomainu yaibao. Awe, eno tigi te tǫ daide olo elalumainao. 
God, nago haliga sębę elama, te nage hogodama, tama te boi bidi dabego dwai sębę eyu, ena dali bomonama mu hwįbaso, te nago augwali dwai dene ilao. Ena God, te nago ena polo mu tau sao. Magi baso meni, nago te doloba pai kolesaga naga wei homu ebo dao. 
Te tigidali we bidi nage pąba naga sisinama, tama nago augwali tonalumainu yao. 
Genuai Bidi, nago te tigidali we bidigo kolesaga dagalubo da. Tama tiyu, nago ena te po tųde tau sao. Magi baso meni, nago koneani, eno dwai sę me ebeo, eno te wiegi yai doloba pai kolesaga naga yai. 
God, nage te doloba pai mu da. Nago te tigidali bidigo haliga me homu te dagalubo dao. Tialima, nago te dwai sę ebo bidi dabego dwai kolesaga ebo te tigidali silao. Tama nago te wiegi yai bidi dabego ebo dwagi yai kolesaga wei ponao. 
God aga da, te ena tonalubo bidi da. Agai te aga po wali pabo bidi dabe tau sabo dao. 
God te po tų dodolobo odobo wiegi yai jas bidi, tama te doloba pai po tų ebo da. Sesemane sogo agai te dwai bidi dabe aiyaba elalueibao. 
Te dwai sę ebo bidi dabe te augwa homu begeleyu, ge nesiąbaso da, teda Godigo te aga bainat hwą dulaibao. Tama te agai enesigi balibi dolama, te hwįabo sisi elalueibao. 
Agai augwali te sia dabo enego usu sali. Agai te bidi dabe augwali ela muabo ene dabe sisi yai elalubao. 
Te dwai bidi suao, agai te gasa bidi dali dwai sę yabo homu beasi elalubao. Agai te tobage dwai sę yabo sisi elama, tama te sesemane sogo tibo po wabo dao. 
Agai tǫde genuai tǫ dedage nigilama, te gasa bidi aba tulalumainu yali, tiali goli aga digi aga te nigali tǫ dedageba tulalubo dao. 
Te tiwai naga aga te yali dwai sę tiali aga pageba ma asobo dao. Tama agai te gasa bidiba te wado me hwįyu ebogo begelama, tama aga digi aga dolaibao. 
God te doloba pai mu da, tama tiyu, eno agaba usu da weyu, gedu haluasa po waibao. Tama te Ugwadu Mu Bidibo God nogi ugwaba selama, te eno balia po dabe waibao. 
