﻿Godigo Nogi Ugwaba Sabo Tęąbi Po Wabo Buku Dabe.
8.
Te Devitgo asęani balia po me deli dao. Yawe, nage dago Genuai Bidi da, tama te tigidali tǫ badu te nago nogi te mu polalubao. Nago genuai nogi dali, nago bomo dali si te ugwanu mu elaluyu, te dagalu aiyaba mu elalubao. 
Nago te wai dabe me te ogwa wegi sibi munama, tama augwaligo nago nogi dali, bomo dali si te ugwaba sabo dao. Tebogo nago te nage dali boi homu ebo bage augwali dwai hale iliyu, tama augwaligo sagia sabo dao. Te nago po sela sąbo bage me augwaligo po wabo tagaluyu, olo bidibo dao. 
Te eno nago nogogo nigali dagalu subo sogo, tama eno te poluaba me, te tigidali hǫ te nago ugwade muani tonono ebo sogo, 
eno midigi siyu, tama homu ebo da, ‘Da tǫde bidi te magi nai, tama nago dade homu kone ebo dawe? Da te olo nai tiwai da. Magi baso nago da te bugagia tonalubo dawe?’ 
Nago da nigilama, tama nago da te nagaduba deli naga dologode bidimainu muani. Nago da ugwaba siyu, tama daba genuai nogi mabo dao. 
Nago da sa muyu, te nago nigali nai tigidali tonalumainu yai. Nago te tigidali nai dago dologoba munama, elalubo dao. 
Awe, tigidali sipsip me, bulmakau me, te buside elalubo tigidali hasa dabe me, 
tama te ugwadu bola bilibo tigidali ba me, tama te tamu ąįde tigidali sųgų me, tama te tamu ąįde bilibo tigidali nai me. Tigidali te da bidigo dologode bidibo dao. 
God, nage dago Genuai Bidi da. Te tigidali bulu habude te nago nogi te mu polalubao. 
