﻿Godigo Nogi Ugwaba Sabo Tęąbi Po Wabo Buku Dabe.
9.
Te Devitgo asęani balia po me deli dao. God, eno nageba usu da weyu, gedu haluasa po mu obao. Eno te we bidi augwaliba te nago midigi sabo wiegi yai sę tigidali yali po waibao. 
Eno nageba homu koneama, tama eno te wiegi yai homu pemene ebo balia waibao. Te Ugwade Bidibo God mu, te eno balia weyu, nago nogi ugwaba saibao. 
Te eno boi bidi dabego nage sulama, tama wi pai. Augwali tulaluama, tama mu isalio. 
Nage te jas tiwai te siade dulalu, tama nago te doloba pai po tų ebao. Nago eno kolesaga osola suyu, dagalali, te nago suali, eno magi sę me deli ebeo. 
Nago po odisiąwai bidi hani dabe, te Israel hani isąwai hani dabe, te nago po tų ilali. Nago te dwai sę ebo bidi dolali, tama te bidi mego augwaliba te homu kone munu me ma egobeo, augwa hani nogi mu miyą saibao. 
Awe, te boi bidi dabe sesemane doludubadi usu nanio. God, nago te augwaligo hanu dabe dolama, tama te mena bidi me deligo te augwaliba homu kone ma egobeo. Mu menio. 
Tiali goli, God te sesemane king bididubadi usu yai. Agai te po tų yabo sisi yai dao. 
Mu tama, agai te tǫde we bidi tonalubo, tama agai bomai po te doloba pai mu da. Agai te tigidali we bidigo kolesaga dagalubo sę te deli tigi poai sęgo naga dagalubo dao. 
God te bomai be me deli tiwai. Te bidi dabe te boi bidide sęgę sobaso, augwa te agaba aselama, bidagasobo dao. Te sęgę sabo augwa te agaba pelama, te geme dualalubo dao. 
God, te nageba asobo we bidi te nago augwali tudiba munu me mugobeo. Tama tibaso, te nage koneani bidi dabego da, te nageba konealubo homu dąų mu wabo dao. 
Genuai Bidi God te Saion hanude king bidibao. Dagego te aga nogi ugwaba siyu, te tęąbi waiyąo. Tama dagego te tigidali Israel hani isąwai bidiba po hanilama weyu, te agai yali tigidali bomai sę po waiyąo. 
Magi baso meni, Godigo te dene tolobo bidi homugo konebo da. Tama agai te augwaligo gela wabo te homugo me gegeda palugobeo. Agai te augwaliba dwai dene mabo bidi dabeba te dwai dene wei ponobo dao. 
Genuai Bidi, nago enaba te olo mu tau sabo wiegi yai kolesaga yao. Te boi bidi dabego enaba te dene me sęgę mabo, te nago suao. Te pąde ena isainu ebadi goli, tiali goli nage asiyu, ena dąų walao, te ena bugagia bidimainogo tiao. 
Tama tiyu, eno te nago yali sę po tigidali weyu, tama eno nago nogi ugwaba saibao. Ena te Saion hanu sunumide dolalu, tama te nago ena ma sali po weyu, te wiegi yai homu pemene yaibao. 
Te Genuai Bidigo po odisąbo Israel hani isąwai bagego te tǫ dedage diginama, te da kalabus emainu yali. Tiali goli, augwa digi teba tulaluai. Augwaligo te da tola somainu yabo bono gągą geme muani, tiali goli, te bono gągągo augwa digi ma tola sai. 
Awe, te tama tebogo te God agai kolesaga te bidi dabeba te po tų ebo sogo ola mawai dao. Te dwai sę ebo bidi dabego te gasa bidi dolabo sę yali, tiali goli te naigo begelama, te augwa digi ma dolai. 
Te dwai bidi dabe, me te God tudiba mubo we bidi hani dabe, te tigidali isimainu ebo dao. 
Me ma, Godigo te magi doado bage meni yai bidi dabe te sesemane sogo homu kone palubo me tagalobeo. Mu tama, Godigo te genuai sęgę elalubo bidi dabe tau siyu, te augwa konealubo homu te odolali me tagalugobeo. 
Genuai Bidi, nage asao. Te tǫde bidi dabego nage ela soyu, te poligi soabo bidi dabe te nago me gogolamuo. Nago po odisąbo Israel hani isąwai bidi dabe te nago po tųde augwali dodolama, tama augwa kolesaga dagalamainao. 
Genuai Bidi, nago augwali dwai wi ilao. Nago te we bidi dabe augwali gę nomainu ilao, augwali te osogo bidibo tiwai konemainu ilao. 
