﻿Godigo Nogi Ugwaba Sabo Tęąbi Po Wabo Buku Dabe.
15.
Te Devitgo asęani balia po me deli dao. Genuai Bidi, de nago dwagi yai bede bidibo usugowe? De nago te dwagi yai bulu du Saionde duagawe? 
Bidigo God agai homu kolesaga tigidali wali painogo ebo bidi, tama sesemane sogo doloba pai kolesaga naga eyu, tama tigidali sogo mu po naga weyu ebo bidi, aga te Genuai Bidigo bede bidibo usu yaibao. 
Agai gasa bidigo nogi doliyu, wialubo po wasiąbo bidi, tama abagi dabe augwali dali dwai sę isąma, tama agai te sabilibo po gasa bidi dabe dali me wasiąwai bidi dao. 
Agai Godigo te tudiba muani bidi dabe augwali godolo isiąma, tama agai Godigo po wali pabo bidi dabego nogi ugwaba sabo dao. Tama agai te Godigo gedude eno te sę yaibao po obaso da, teda agai te po usu naibao. Ma, tebogo te sęgę agaba mobaso da, tagalao, agai te dąų walali po togogobeo. 
Tama te agade negeli sali bidigo te negeli wei ponobo sogo, agai te giguai mone ma ugwadu daganobo mone mao olama, agai sogobeo. Te gasa bidi dabego te dwai sę isąwai bidi me deli dali po tų yainogo eyu, tama augwaligo homu augwaligo te doloba pai bidibolo mone meba geme menama, tama agai te po tų ebode te tibo po kisilibo po waibao. Tiali goli, agai te mone selama, agai te tibo po kisilibo po wagobeo. Bidigo te dwagi yai kolesaga ebo wali pabo bidi aga tulalugobeo. 
