﻿Godigo Nogi Ugwaba Sabo Tęąbi Po Wabo Buku Dabe.
24.
Te Devitgo asęani balia po me deli dao. Te tǫ dali, tigidali tǫde elalubo nai, te tigidali Godigo nai naga dao. Tigidali bulu me, te Godigo nigali nai dao. Tama tigidali bulude bidibo we bidi me, augwali me te Godigo hani we bidi naga dao. 
Magi baso meni, agai tǫ ugwadu nigai, tama ąį aiyadu mu elalubo dao. Tama agai tǫ page tamu ąį tomode nigai. 
Niwai bidi te Genuai Bidi Godigo bulu duba holobo usugowe? Niwai bidi agai dwagi yai be tomoba pogowe? 
Dwai sę isąwai bidi, tama agai homu meda meni yai dwagi yai. Tibo god dalibolo lotu po wasiąwai bidi, tama bidigo gasa bidi tibo dąų wabo po me ola masiąwai bidi. Tiwai bidi aga te usu yaibao. 
Te bidi dali te Genuai Bidigo dwagi yai sę yaibao. Awe, Godigo aga ma selama, tama te bidi dwagi yai bidi dao waibao. 
Tiwai bidigo God subo dao. Aga te Jekopgo God pąba pabo dao. 
Dage te tempel bede elalubo tų, dage dayao. Dage te augwaligo polobadu mu nigali tų, dage genuai gisiga dayao. Tama polalubo genuai tuni bidi king tomoba somainao. 
Genuai polalubo bidi, aga de dawe? Aga te Genuai Bidi God deli dao. Agai genuai bomo elalubao, aga te boma pai king mu dao, tama bidigo aga dali hwįbo usu ebo menio. 
Dage tų, dage dayao. Dage polobadu tų dao, dagego genuai tų gisiga dayao. Tama genuai polalubo tuni bidi king be tomoba somainao. 
Genuai polalubo tuni bidi king aga de dawe? Aga te Genuai Bidi God dao, agai te genuai ami bidi hani tonalubo dao. Aga deli digi mu te polalubo tuni bidi king mu dao. 
