﻿Godigo Nogi Ugwaba Sabo Tęąbi Po Wabo Buku Dabe.
26.
Te Devitgo asęani balia po me deli dao. Genuai Bidi, nago ena doloba pai bidi nogi yao. Magi baso meni, eno te doloba pai kolesaga yali, tama eno konealubo homu nageba tigidali muani. 
God, nago eno kolesaga tigidali usu sao. Tama nago eno haliga, me homu, te dagalao. 
Magi baso meni, nago te olo tau sabo wiegi yai kolesaga enaba eyu, tama ena sesemane sogo dodolobo dao, tama nage te ena soabo madi sesemane poligi solama, tama nago ena me tagalubo menio. 
Ena te dwai sę ebo bidi dabe dali me bilisiąwai. Ena te tibo po wabo bidi dabe dali me bilibeo. 
Ena te dwai sę ebo bidi dabe dali bilabo te hagela homu mu ebo da. Eno augwali ela soabo dao. 
Genuai Bidi, eno nogo wę telayu, te eno dwai sę me yali menibaso, te nageba ola mayu tiali. Tama eno nago alta bagulubo sę eyu, tama eno nageba lotu po wabo dao. 
Eno tama tiyu, tama eno nageba usu da wabo tęąbi po me deli obao, tama eno te we bidiba te nago yali wiegi yai sę po pusubao. 
Genuai Bidi, eno nago be te wei elama, godolo mu ebao, te nago genuai nogi dali, bomo dali si elalubo bulude. 
Nago ena te dwai sę ebo bage dali me dologio. Nago ena te gasa bidi ela mubo bidi dabe dali me ela mugio. 
Te bidi dabe augwaligo te dwai kolesaga sesemane sogo ebo dao, tama augwaligo te bidi meba te monego homu bega selama, te gasa bidiba dwai sę emainu tebo dao. 
Tiali goli, ena digi eno da, te doloba pai kolesaga ebo dao. Nago te olo tau sabo wiegi yai kolesaga enaba elama, tama ena ma sao. 
Ena bomonama dolalubao. Te magi nai me deligo ena dolomainu me egobeo. Te eno Genuai Bidi nago nogi te we bidi sisinama lotu wabo tomode te eno nago nogi ugwaba saibao. 
