﻿Godigo Nogi Ugwaba Sabo Tęąbi Po Wabo Buku Dabe.
27.
Te Devitgo asęani balia po me deli dao. Genuai Bidi God aga te eno ula page da, tama agai ena tau sabo da. Tama tiyu, te bidi me delide ena midigi me egobeo. Genuai Bidigo naga ena seselalubao, te moni bomai obo tiwai te palialubao. Tama tiyu, te magi nai me delide ena wi me egobeo. 
Te dwai sę ebo bidi dabe ena pąba aselama, tama dolainu usu sobaso da, te bidi dabe augwa digi sągą tǫ dedageba tuloliyu, habala paliyu, augwa digi augwa ma dolaibao. 
Awe, te ami hani me deligo ena bagua sagasobaso da, teda ena wi me egobeo. Te boi bidi dabego enaba hwįagasobaso da, tagalao. Eno konealubo homu Godiba munama, tama ena ibaba me kila sogobeo. 
Eno te nai me delide naga te Godiba hanalu wali, tama eno homugo agai te tama sę emainu homu yali. Eno agaba te tama po hanalu wali, te ena bidibo ula elalubo sogo ena te agai bede tigidali sogo bidainogo yai. Te agai enaba wiegi yai homu bugagia ebaso, te eno wiegi yai homu pemene agaba yaibao. Tama eno agaba hanalu, te enaba wiegi yai sunumi ola momainu homu ebo dao. 
Te dwai sę enaba pedalubo sogo, teda agai ena te agai beba geme dualaibao. Te aga wiegi yai beba te sunumi paliama, tama ena geme bugagia mu dualaibao. Te agai ena te genuai masigi mu me deli te daiba dualama, tama ena bugagia bidaibao. 
Tama tiyu, te ena bobegelalubo boi bidi dabe augwali eno aiyaba elaluaibao. Te eno wiegi yai homu pemene umabo mu elama, tama i weyu, te Godigo tedali wiegi yai bede ofa yaibao. Te eno aga nogi ugwaba sabo balia po waibao. 
Genuai Bidi, te eno nageba i wabo sogo, nago enaba te olo mu tau sabo wiegi yai kolesaga yao. Tama nago eno gedu haluasa wabo po odao. 
Eno homude eno te koneanio, nago enabolo te tama po wali, “Nage enaba asao,” wai. Tialima, Genuai Bidi, te ena paibao. 
Naga digi nage te enade geme duala selamuo. God, te nago ena tau sabo da. Nago enade sębę elama, tama ena sela sągio, ena naga sę bidi da. Nago ena hauwa sogo tau sali. Nago ena me tagaligio. Nage enade wi me pigio. 
Aya me ida sigo te ena tudiba mubaso da, tagalao, te Genuai Bidigo ena tonaluaibao. 
Genuai Bidi, te nago enabolo te nago homugo emainu ebo sę ola mao. Nago ena te wiegi yai sunumiba odasa pao. Magi baso meni, eno boi bidi te hauwa elalubao. 
Te boi bidi dabego ena somainu, te nago ena me tagaligio. Augwaligo te po tų ebode tibo po weyu, tama ena wi ilainu eyu, augwaligo ena elaibao po wabo dao. 
Mu tama, nosali ena me bididubadi, eno te Godigo wiegi yai sę te aga we bidi dabeba ebo te eno sueibao. 
Te nago konealubo homu dąų olama, tama te Genuai Bidigo nage tau sagasobo tonaluao. Bomo elama dolaluao, nago haliga sęgę me igio. Awe, nago konealubo homu dąų olama, tama te Genuai Bidigo nage tau sabo tonaluao. 
