﻿Godigo Nogi Ugwaba Sabo Tęąbi Po Wabo Buku Dabe.
32.
Te Devitgo asęani balia po me deli dao. Te Godigo bidi me deligo dwai sę yali sęgę tagaliyu, tama agai sęgę sela sąbo si da, teda te bidi aga wiegi yai homu pemene eyu, bugagia bidibao. 
Te Genuai Bidigo te po weyu, te bidigo sęgę megi me elalubeo po weyu, tama te bidigo te tibo po wabo kolesaga wali me pabe da po obaso da, teda aga wiegi yai homu pemene eyu, bugagia bidibao. 
Te eno ena dwai sę yali po te Godibolo pususiąbadi digi, eno te giligade me hulide dwai gela wali. Tama eno tigi bomo kimi mu meni yai. 
Te giligade me hulide nago nogogo enaba dene mani. Eno bomo tigidali te hagawali, te genuai giliga tǫba naniyu, te tǫ wa pabo tiwai yai. 
Nosali eno sęgę te eno nageba pusali. Eno ena yali dwai kolesaga geme me dualubeo. Eno te homu yali, eno te bomai po bolali kolesagade sali sęgę tigidali eno te Genuai Bidiba pusabo homu yali. Eno hania pusula silibaso, tama nago eno yali dwai sę me, eno sęgę me, sela sąwai dao. Tama tiyu, nago ena tede nosali elegobeo wali. 
Tama tibaso, nage wali asobo tigidali we bidi, te augwaliba sęgę pedalubo sogo, te augwaligo gedu haluasa po nageba omainao. Tama te sęgę genuai mu pedaliyu, tama te ąį genuai asiyu, tama te bidi sainu ebo tiwai gilama ebaso da, teda te sęgęgo augwali aiyaba me elalugobeo. 
Nagede naga ena duala sabo pesage elalubao. Nago ena tonalubaso, tama te sęgęgo ena aiyaba me elalugobeo. Awe, nago ena te sęgęde siyu yali, tama tede te eno balia po genuai mu wabo dao. 
Genuai Bidigo te tama po wai, “Eno nage bugagia ola mayu, tama nage bilabo madi te sunumi nageba ola mawaibao. Te nago konemainu te nage eno ola mawaibao. 
Nage te hos me donki tiwai pedelamuo. Te augwali sigo kolesaga me elalubeo. Nago te ain elalubo bobobage baklain te augwali sigo pedauwaliba munama, tama augwali si pabo ola mabo te baklaingo kegeyu, ola mabo dao. Te menibaso da, teda augwali sigo te nago homu wali me pogobeo.” 
Te sęgę me dene hauwa te dwai sę ebo bidi dabeba pedalaibao. Tiali goli, Genuai Bidigo te agaba homu kęą pabo we bidiba te olo tau sabo wiegi yai kolesaga elama, tama augwali bugagia tonaluaibao. 
Dage te doloba pai we bidi, dage te bugai haliga elama, tama te Genuai Bidigo wiegi yai sę tigidali yalide te wiegi yai homu pemene yao. Dage tigidali we bidi, dage te God gedude doloba pai mu yali, dage te wiegi yai homu pemene elama, tama hae weyu, nogo eleyu yao. 
