﻿Godigo Nogi Ugwaba Sabo Tęąbi Po Wabo Buku Dabe.
36.
Te Devitgo asęani balia po me deli dao. Agai dwai sęde sali sęgę te dwai bidigo haligade elalubao, tama te po meba agabolo mabo dao. Te bidigo te Godide wi me egobeo. Mu menio. Agai aga tudiba muaibao. 
Agade digi aga hagoma eyu, te homu ebo da, “Ena te polalubo bidi mu da,” waibao. “Tama tibaso, Godigo te eno ebo dwai sę dabe te me gegegobeo elama, tama agai ena po tų me iligobeo,” wabo dao. 
Sesemane sogo agai te dwai sę yabo po, me te gasa bidi tibo po ola mabo po weyu yaibao. Agai te wiegi yai kolesaga yabo homu te agade me elalubo menio. 
Aga te betide pila mudu, tama te dwai sę yabo kolesaga te homu kone paludaibao. Agai te dwai sę ebo sunumi naga wali pidu, tama te dwai sę ebo kolesaga tudiba me mugobeo. 
Genuai Bidi, nago te we bidi godolo ebo kolesaga te dwasianu meni, te godolo ebo dąį te dagaluba usu nigi pali. Nago te mu kolesaga naga wali pabo, tama te me te dwasianu menio. Te dąį te ugwadu mu elalubo pǫba usu nigi palio. 
Te nago doloba pai kolesaga te genui mu elalubao, te bulu du dabe tobage tiwai elalubao. Dago nago te doloba pai po tų ebo page koneainu ebaso, te usu me egobeo. Te aiyanu mu dulali, te tamu ąį aiyanu mu ebo tiwai yai. Genuai Bidi, nago te bidi dabe me te hasa dabe bugagia tonalubaso, te augwali bugagia bidibo dao. 
God, nago te da godolo ebo kolesaga te siligobeo, tama te wiegi yai mu yai, dago wei homu mu ebao. Tama te we bidi dabe te nageba pelama, duala sabo da, te kakaruk wai dabe te aga idago bogo dologoba duala sabo tiwai gilama ebo dao. 
Nago bede te nai hauwa elalubao, tama tiyu, te we bidi dabe te nai me sǫą pabo menio. Te nago wiegi yai nai te umabo mu elalubao, te soabo genuai wę tiwai eyu, tama nago da te wę tumainu mabo dao. 
Magi baso meni, nage te tigidali naigo bidibo ula page bidi dao. Tama nage te ulago page da. Dago te nagede naga ula siyu, tama da bugagia bidibao. 
Sesemane sogo nage konebo we bidi te nago augwali wei eyu, godolo mu idu geao. Nago te doloba pai bidi dabe tau siyu, te augwali bugagia bidimainu tau sidu geao. 
Nago ena te hagoma bidi dabego sągągo agamainu me elamuo. Tama ena te dwai bidi dabego sela sąmainu me igio. 
Suao. Te dwai sę ebo bidi dabe te tǫba tulaluama, te pila mubao. Augwali te ma hodalugobeo. 
