﻿Godigo Nogi Ugwaba Sabo Tęąbi Po Wabo Buku Dabe.
42.
Polobadu mu te dago megi wabo Tib 42 dali, Tib 43 dali te balia po me deli naga elaluali. Tiali goli, nosali augwaligo te balia po pedama, tama megi dago te balia po si badu elalubao. Tama te balia side elalubo po page te deli page dao, te bidi aga page bulude homu dene mu eyu, tama Genuai Bidi Godibolo aga gedu haluasa po obao. Te Kora hani dabego asęani balia po me deli dao. Uni hasa te węde nogene eyu, tama te tubo dwasianu węba udua pabo dao. Tama te tiwai naga, God, eno homu wei eyu, te nage pąde bidabo homu ebao. 
God, nage te bidibo ula elalubo God da, tama eno nage wei homu mu ebao, te bidi aga dogoni wa pobaso, te wę tuainu ebo tiwai yaibao. God, mena sogo te ena nageba aselama, tama te moni lotu be tempelde nageba lotu wagowe? 
Sesemane sogo te bidi dabego enaba te tama po wali, “Te nago God mena bidibawe?” Tama tibaso, ena sesemane sogo gela udubo sę yali. Te eno gedu ąį te eno siade me hulide nai tubo tiwai gilama yali. 
Eno te polobadu wiegi yai homu elaluali sogo homu kone palama, tama eno haliga sęgę mu yali. Polobadu ena te hauwa we bidi dali bilali, tama ena poligi pelama, tama augwali te Godigo beba odasa pai. Da pelayu, tama wiegi yai pemene ebo i me wali, tama Godiba usu da wabo tęąbi po wali. Te sogo da tigidali te olo bidibo side sisinani. 
Magi baso ena sesemane sogo te haliga sęgę ebawe? Magi baso eno haliga midigi ebawe? Eno konealubo homu te Godiba dąų olama, tama agai ena tau sabo tonalueibao. Aga te eno God da, tama ena tau sabo da. Tama tiyu, eno aga nogi ugwaba ma saibao. 
Te boi bidi dabego ena te augwa buluba odasa asobaso, tama megi eno page bulu te digibulu mu elalubao. Tama tibaso, eno haliga sęgę mu ebao. Tama tiyu, God, eno homu kone nageba ebao. Nago te enaba te haniani genuai sęgę menama, tama augwaligo ena mesegelali, te moni soabo ąį tiwai dao. Tama te masigi yai madi soabo wę te aiyaba sabo duluyu, te węgo kulukulu umabo mu wabo dao. Te tiwai me te enaba pedelali sęgę dabego te eno homu kone tųą pali. Nago te biksi peda pomainu elama, tama pepeda pomainu yali, tama te nambisde tǫ mesegebo dao. Tama te tiwai naga nago enaba te muani sęgę tigidaligo te ena mesegelibo dao. 
Tiali goli, eno homugo te Genuai Bidigo enabolo te olo tau sabo kolesaga te giligade emainu yali. Tama te hulide eno te agaba usu da weyu, gedu haluasa po wabo tęąbi po waibao, tama te ena bidabo ula mabo Godiba te usu da po wabo gedu haluasa po waibao. 
God da, te ena seselalubo bidi mu dao, tama eno agaba te tama po obao, “Magi baso nago enaba homu kone ebo tagalubawe? Magi baso nago ena te boi bidi dabego elalumainu eyu, tama ena te haliga sęgę emainu ebawe?” 
Te sesemane sogo te boi bidi dabego enaba te tiwai kęnę po weyu, “Te naga God mena bidibawe?” po wabo. Te pogo te ena tigide te ene enama, tama ena isainu ebo tiwai yai. 
Magi baso ena haliga sęgę sesemane sogo ebawe? Magi baso eno haliga midigi ebawe? Ena te Godiba konealubo homu dąų olama, tama agai ena tau sabo tonalueibao. Aga te eno God da, tama ena tau sabo dao. Tama tiyu, eno aga nogi ugwaba ma saibao. 
