﻿Godigo Nogi Ugwaba Sabo Tęąbi Po Wabo Buku Dabe.
64.
Te Devitgo asęani balia po me deli dao. O God, eno sęgę te genuai elalubao. Nago eno gedu haluasa po wabo odao. Ena te boi bidi dabede wi ebao. Nago ena tau sobaso da, te ena augwaligo ela muainu ebaso, te usu me egobeo. 
Te dwai sę ebo bidi dabego te ena ela muabo sunumi gegebao, tama augwali sisinama, te elainu ebao. Tama te nago ena seselalubaso da, teda augwaligo enaba te dwai sę me egobeo. 
Te bidi dabego po te mu poa pelama, tama te bainat hwągo ena togobo tiwai ebao. Te augwaligo dwai pogo enaba ponama wali, te bidigo enesigiba ene nanama, te bidi usu sabo tiwai gilama ebo dao. 
Augwali te geme duala selama, tama te wiegi yai bidiba enego enani. Augwaligo te gagamua siyu, te wi me isiąma, tama augwaligo polo eneyu ebo dao. 
Augwaligo augwa digi dąų waliyu, tama te dwai kolesaga ebo dao. Augwaligo te gasa bidi tola somainu yabo te bono gągą muabo po miani. Tama augwa te tama homu yali, “Te mena bidi me deligo te da me sugobeo,” wai. 
Augwaligo te dwai kolesaga meba yabo po mia selama, tama augwa te po wai. “Dago yabo te dwai kolesaga me deli te homugo koneanio, tama te dago yainu ebo sę te bidi me deli gegeyu, koneainu ebaso, usu egobeo,” te po wai. Dago te bidi dabego haligade elalubo homu kolesaga te koneabo usu egobeo, te geme mu dualalubao. 
Tiali goli, te Godigo augwali te agai enego enebaso da, tama polo mu tama, te genuai keni pedelaibao. 
Augwaligo te gasa bidi dolabo po wai, tama tibaso, te Godigo augwali dolaibao. Te augwali subo bidi dabego te augwaliba te augwaligo dwai gisugu mu mayu, tama tobolu peme yaibao. 
Te tigidali we bidigo Godiba wi yaibao. Tama augwaligo Godigo te yali sę dabede po mimi peyu, tama tede sesemane homu kone palaibao. 
Te tigidali doloba pai we bidi augwaligo te Genuai Bidigo yali sęde wiegi yai pemene yaibao, tama augwali agaba pelama, te dwai sęde geme wi duala sigi paibao. Tama te tigidali doloba pai we bidi augwaligo te Genuai Bidigo nogi ugwaba saibao. 
