﻿Godigo Nogi Ugwaba Sabo Tęąbi Po Wabo Buku Dabe.
65.
Te Devitgo asęani balia po me deli dao. O God, da te Saionba pelama, tama nago nogi ugwaba saibao. Te kolesaga ebo te usu mu yaibao. Tama dago te po dąų waliyu, te polobadu yaiba wali sę tigidali usu nama yaibao. 
Nago dago gedu haluasa po wabo odobo dao. Tama tibaso, da tigidali we bidi te nageba asobao. 
Dago te dena yali dwai sęde homu kone palu tama tiali. Te dena dwai sęgo da aiyaba mu elaluali, tiali goli, dago koneani, te nago dago dwai sę te dagala sąwaibao wabo dao. 
Te nago sa munama, tama nago pąba odasa pabo bidi dabe, augwa te wiegi yai pemene emainao. Te tigidali wiegi yai sę yabo kolesaga nago dabolo te moni lotu be tempelde, te nago wiegi yai tedali bede mawai, tego da mu usu naibao. 
God, nago naga te nago da te boi hwįbode ma selama, tama da bugagia bidibo dao. Nago dago gedu haluasa po wabo odao. Te nago da ma sainu yali sę te sę mu yai. Te dade te digibulu mu te tigidali tǫ habude bidibo bage dabe, tama te augwa pesageba sabolainu, te tamu ąį nogeali, augwaligo konealubo homu nageba dąų mu wabo dao. 
Te nago bomogo te bulu du dabe pedalumainu elama, tama augwali te augwa pesagede elalubao. Nago bomo te genuai mu dao. 
Nago naga te tamu ąį moni dini ebo, te wę kulukulu wabo me isimainu ilibo dao, tama nago te bidi dabego hwįbo me togolobo dao. 
Te tigidali tǫde bidibo we bidi dabego nago te ebo sę dabe sulama, tama tigidali te nagede wi ebao. Te giliga pedalubo badu, me te giliga dega sigilubo badu bidibo we bidi augwaligo te nago ebo sę tigidalide homu kone palama, tama augwaligo te wiegi yai homu pemene elama, te nageba i wabo dao. 
Nago te tulubage tagala palu, te tama tebogo naga nago te tǫ bugagia tonalubao. Tama nago te tǫ ili hauwa pedalumainu ilama, tama te nai bugagia holobao. God, nago te wę dabe tigidali badu muai elalubao, tama augwali te me sula sabeo. Tego te nai hauwa pedalumainu ilama, tama te we bidi dabego sobao. Te sę nago digi ebo dao. 
Nago te tulubage hauwa te tigidali giba tulumainu elama, tama wę te tǫ tomode elalubao. Węgo te tǫ nagame ilibaso, tama nai bugagia holobo dao. 
Nago wiegi yai sę daba eyu, tama nago te nai hauwa pedalumainu yai. Te nage gasa me deli pobaso me, nago tede me te nai wiegi yai hauwa pedalumainu ebo dao. 
Te tigidali bulu pesagede te bulmakau me sipsip dabego tuabo nosa te pągąnaluali. Tama te dwasianu bulu du dabede te gigo pągąwai elalubao. 
Te sipsip hauwa mu te nosa elalubo pesagede mu pągąnalubao. Te bulu dabe odogo tomode te wit nai mu pągąnalubao. Tama tigidali nai te wiegi yai pemene ebo dao. 
