﻿Godigo Nogi Ugwaba Sabo Tęąbi Po Wabo Buku Dabe.
75.
God, dago usu da olama, tama nago nogi sesemane ugwaba sabo dao. Tama dago nago genuai nogide po hanilama pusuyu, tama augwaliba te nago haniani wiegi yai sę ebo po pusubo dao. 
Godigo te tama po wali, “Eno te po tų yabo sogo bodolu me deli te dąį ilai elalubao. Tama eno po tų te dolo mu paibao. Te me kone tua pogobeo. 
Tǫ dali tede bidalubo nai tigidali te hagawaibao. Tiali goli, te tǫ page da, te eno tolalu, tama bomo elalueibao. 
Eno te hagoma ebo bidi dabebolo po walali, ‘Dagego te hagoma me igio,’ po wali. Tama eno te dwai sę ebo bidi dabebolo walali, ‘Dagego te duga nogi ugwaba me sigio,’ po wai. 
‘Dagego duga bomogo digi te wiegi yai pemene me igio, tama dagego po dągą genuai weyu, tama ena posoyu me elamu dao,’ wali.” 
Te we bidigo kolesaga dagalubo sę te giliga asobo badu, me te giliga dega sabo badu, ma te not badu me, saut badu me pedalubeo. Menio. 
God agaduba deligo naga dago kolesaga dagalaibao. Agai te bidi me deli aiyaba elalu, tama te gasa bidi ugwaba sagoa sabo dao. 
Genuai Bidigo te bomo yai gesi wain wę te kap me delide pągąwai tolaluai. Agai gea palama, tama tigidali bidi dwaigo tulama, tama mu siminanio. Te tama tiwai naga te dwai sę yali we bidi dabe te Godigo po tųba pedelama, tama te augwali mu hagawaibao. 
Tiali goli, eno te Jekopgo God po te sesemane hanilama pusaibao, tama eno agai nogide te tęąbi umabo mu udubadi geaibao. 
Te Godigo te dwai sę ebo bidi dabego bomo silimainu yaibao, tiali goli, agai te doloba pai bidi dabebolo te genuai bomo mu mawaibao. 
