﻿Godigo Nogi Ugwaba Sabo Tęąbi Po Wabo Buku Dabe.
76.
Te Juda dabego God bugagia koneai. Tama te Israel dabego agai genuai nogi ugwaba salio. 
Aga be te Jerusalemde elalubao. Tama aga sesemane sogo te Saion bulu dude bidibo dao. 
Te bulude agai te boi bidi dabego enesigi ene dabe me, te sabele delage me tologali, tama augwaligo bainat hwą me togwai. Godigo te hwįbo doado bage tigidali dolai dao. 
God, nago genuai nogi elalu, tama nage te polalubo king dao. Nage ugwanu mu elalu, tama nago genuai nogigo te genuai bulu du dabego genuai nogi aiyaba mu elaluai. Te bulu du pesagede nago te boi bidi dabe dali hwįnama, tama nago augwali elaluama, tama nage ma begasa asai dao. 
Augwaligo te augwa bomai ami dabego wiegi yai doado bage dagala siyu yai. Tama megi da, te ami dabe isalio. Tama augwaligo te hwįani doado bage sabo bidi dabe meni yanio. 
Te Jekopgo God, nago augwali wado ilama palialio. Tama tibaso, te hos dabe dali, te hosde dugawali bidi dabe me, tigidali isila silama, tama tǫde te pila mubao. 
Tiali goli, God, te bidi dabego nagede te wi umabo mu ebo dao. Te nago augwaliba wado po obaso da, teda de te nago gedude dolalubo sogo usu egowe? Te me deligo usu me egobeo. 
Nage te dagalude bidiyu, tama nago te tigidali we bidi po tų ela mawaibao. Te sogo nage dolugulama, tama nago te bidi dabe augwaba te augwa po tų yabo po pusaibao, tama nage asiyu, te gasa bidi dabego dolali we bidi dabe tau sagasaibao. Tama tigidali we bidi wi mu ebaso, tama po me wagobeo. Augwa pedauwali pania siyu naga yaibao. 
Te bidi dabego haliga sębę yali, tiali goli, te tebogo te gasa bidi dabego nago nogi ugwaba somainu ebao. Tama te hwįbode dolisawąni bidi dabego te genuai lotu wabo sogode te nageba lotu waibao. 
Nago te naga Genuai Bidi Godiba te bomai po dąų walali, teda nago te dąų walali po wali pao. Nago tibo po me wagio. Dago te Genuai Bidide wi elama, tama tiyu, te tigidali we bidigo te agaba wiegi yai olo maiyabo nai dabe selasa pao. 
Agai te hagoma ebo king dabe te aiyaba elalueibao. Agai te tǫde king dabe te wi mu ilibo dao. 
