﻿Godigo Nogi Ugwaba Sabo Tęąbi Po Wabo Buku Dabe.
77.
Eno Godiba i bomo elama obao. Eno homugo te agai eno gedu haluasa po wabo odomainu ebao. 
Te sęgę ebo sogo, eno te Genuai Bidiba gedu haluasa po agaba weyu yali, tiali goli, eno te nagame pai homu ebo me sabeo. 
Eno homugo Godiba kone palama, tama eno haligade gela wali. Eno homu konealubode tama eno haliga sęgę elaluai. 
Godigo ena godege pimainu me ebeo. Eno haliga te sęgę mu ebaso, tama tiyu, eno po wabo usu me ebeo. 
Eno te polobadu yali wiegi yai sogoba homu kone palali. Mu tama, eno te bidali kibu be dabe tede homu kone ma yalio. 
Te hulide eno homu kone paludubo sę yali. Eno homu hauwa elama, tama enaba digi ena te tiwai hanalu wai. 
“Te Genuai Bidigo ena te sesemane sogo tudiba muba homu ebawe? Te agai ena godolo homu mu me isiąbo homu ebo agawe? 
Agai megi ena homu dene me ebewe? Te aga dąų wali po te tulalumainu eba, agawe? 
Te Godigo homu kone gegeda paliyu, tama te olo tau sabo wiegi yai kolesaga dabolo me egobe homu eba, agawe? Te agai wado ebogo te olo tau sabo wiegi yai kolesaga te palia sali homu ebawe?” 
Eno te tama homu eyu, tama eno te po wali, “Te Ugwade Mu Bidibo Godigo te ena megi me tau sabeo. Tama tialima, eno tede te haliga sęgę mu ebao,” wali. 
God, te eno nago te genuai sę dabe yaliba te homu kone ma palobao. Awe, te eno nago polobadu te haniani sę dabe yaliba te homu kone ma palubo dao. 
Te eno nago yali tigidali sęba ma homu kone palaibao. Nago te bomai sę dabe yali, tama eno te me homugo koneaibao. 
God, nago kolesaga tigidali te tedali wiegi yai naga dao. Te tibo god me deligo nage dali usu me egobeo. Nago augwali aiyaba mu elaluai dao. 
God, nagaduba deligo naga te bidi mego isąwai bomai sę ebo dao. Polobadu nago genuai bomo te tigidali we bidi haniba ola mawai dao. 
Te naga bomogo digi nago te naga we bidi dabe ma sali, te Jekop de Josep sigo wąį nǫų hani dabe, te augwali si tudi badu nosali pedelali bage dao. 
God, te polobadu te wę dabego nage sulama, augwali wi mu yali, tama te aiyadu mu elaluali tamu ąį me te gęǫ yai dao. 
Genuai tulubage mu tuluyu, tama pǫ bomonama kulukulu weyu, tama te pǫgo be sele ula edaba asiyu, uba peyu yai. 
Nago te pǫ te popoge ebo wali tomode kulukulu omainu ilali. Te pǫgo be sele eyu, ula ebo te tigidali tǫ pedaiba ula yali, tama tǫ aga digi te mumunu mumunu yai. 
Nage wali te tamu wę tomode bilali. Nago sunumi te genuai tamu ąį tomode elaluali. Tiali goli, dago te nago sągą pasalu me susiąbo dao. 
Nage te tonalubo bidi mu tiwai elama, tama nage polasa pobaso, tama te we bidi dabe nage wali pelawai. Nago sę te Moses de Aron sibolo menama, tama augwali sigo te augwali tonaluai dao. 
