﻿Godigo Nogi Ugwaba Sabo Tęąbi Po Wabo Buku Dabe.
78.
Eno hani bage dabe, dagego eno po bugagia odao. Dagego eno wainogo ebo poba olo bugagia muao. 
Eno dageba te po dabe pusainu ebao. Eno te haniani sę dabe te polobadu geme dualaluali sę me te megi e sogoba usu nagasu, te po pusaibao, tama eno te po dabego page dagebolo pusaibao. 
Polobadu te wąį nǫų dabego dabolo te tiali sę dabe po wali, tama dago odolama, tama dago te koneai dao. 
Dago te po te dena wai dabeba geme me dualugobeo. Menio, te dago te gesi tamadi ame nabo wai dabeba te po waibao. Te dago Godigo genuai bomogo yali sę po pusaibao, tama te bomai sę dabe me agai yali, tama te bidigo isiąwai sę te haniani bomai sę agai yai dao. 
Godigo aga bomai po te aga we bidi Israel dabebolo mawai. Agai po te Jekipgo wąį nǫų dabebolo menama, te augwa wali pomainu yai. Agai te polobadu wąį nǫų dabebolo te tama po wai, “Dagego te duga wai dabeba te eno bomai po tigidali te bugagia ma mao,” po wai. 
Tama tialima, te nosali pedalubo hani wai dabego te nosali augwa me ola mayu, tama te hanigo te augwa wai dabeba te po omainao, te po wai. 
Te augwa te tiwai eyu da, teda te hani dabego me te Godiba konealubo homu dąų waibao, tama agai te yali sę dabe te augwaligo homu kone gegeda pidali weyu, te tiwai yao. Tama te augwa agai bomai po tigidali wali pomainu yao. 
Tiyu, augwali te augwa wąį nǫų dabe tobage tiwai pedelabuo. Te wąį nǫų dabego te hagoma eyu, tama Godigo po sela sąnama, tama augwa konealubo homu agaba dąų mu me wasiąwai, tama augwaligo te agai po sesemane wali me pabeo. 
Polobadu te Efraim dabego hwįani, te enesigi enego te hwįai. Tiali goli, te sogo te wąbi hodolama hwįbaso, tama augwali wi pai dao. 
Augwaligo te Godigo dąų walali bomai po wali pisąyu, tama augwaligo agai bomai po wali pabo homu isiąwai dao. 
Augwaligo te agai yali sę dabe te homu kone gegeda pali, tama te bidigo isiąwai bomai sę agai te augwali gedude yai, te me augwaligo gegeda pali. 
Te wąį nǫų dabego gedude Godigo bomai sę me deli te Soan bulu, te Isip tǫ pedaide, yai dao. 
Godigo te tamu ąį togolama, tama tamu ąį te me badu buga siyu, me badu buga siyu elama, dolaluali, tama agai te Israel dabe tomodu odasa palio. 
Te giligade aga te pǫdu polasa pali, tama hulide aga te sia ulade te augwali asobodu polasa pai. 
Agai te masigi tǫ bulude te masigiba elama, tama te wę aiyadu pedalumainu elama, te augwaligo tuali. 
Agai te masigide wę pedalumainu elama, tama wę te busidu soabo genuai wę tiwai soali. 
Tiali goli, augwaligo te Ugwade Mu Bidibo Godiba dwai sę yali, tama augwali te kemi tǫ bulude bidiyu, agaba hagoma yalio. 
Augwaligo God usu siyu, te tiwai yai. Augwaligo i bomonama agaba weyu, te augwaligo wei ebo nai agai momainu yai. 
Augwaligo te tiwai posobo po Godiba wali, “Godigo dabolo te tǫ wa pai bulude te nai hauwa mabo usu yaiba, agawe? 
Mu tama, hasiabolo agai te genuai masigiba elibaso, tama te wę pedelali. Tiali goli, magi ebawe? Agai dabolo te bret meba me te tubo mi magowe?” wali. 
Tialima, Genuai Bidigo augwaligo po odolama, tama agai wado po wali. Agai te Jekopgo hani dabeba te sia tula palali. Tama agai wado po te genuai mu pedelalio. 
Magi baso meni, augwaligo konealubo homu agaba musiąwai. Tama te agai augwali tau selama, te bugagia bidimainu yaibao, tede augwaligo agaba konealubo homu dąų me wabeo. 
Tiali goli, tagalao, agai te ugwadu elalubo dagaluba po olama, tama te dagalu dalaluai dao. 
Tialima, agai te nai mana tagala palama, tulalubosi, te augwaligo selama, tuali. Agai te dagalude nai te we bidi dabe augwaliba mawai dao. 
Tama tialima, augwa te enselgo nai salio. Godigo te nai hauwa mu augwaliba menama, tama augwali usu mu yai. 
Tama nosali agai te giliga pedalubo badu te wali hodolali, tama agai bomogo naga, agai te saut badu wali hodolali. 
Tama agai te ba sibi hauwa mu te tǫ hogomu tiwai me, te nabis wę sande te kemi tiwai, te augwali tomoba tulalumainu yai dao. 
Godigo te ba dabe te augwa bidalubo pesage tomoba tulalumainu ilali, tama augwaligo ugwa be bagua salio. 
Tama tialima, te we bidi dabego tulama, tama augwa mu pągąna peyu, tabia palio. Te we bidi dabego sainu te gela wali nai, te Godigo augwali manio. 
Augwa te nai tutubo sę yai. Mu tama, augwa te nai tula silisąbadi, 
tama Godigo augwaliba wado po weyu, tama te bomai bidi dabe ela muani, te Israel wiegi yai ogwa bidi dabe dao. 
Godigo te bidigo isiąwai te tobage bomai sę dabe yali, tiali goli, te we bidi dabego te dwai sę umabo mu idu geyu, tama augwaligo konealubo homu agaba dąų me wabeo. 
Tialima, polo tama mu, te agai augwali dola silalio, te pedauwalide mobo pedelama, te polo pela silibo tiwai yalio. Agai augwali polo tama mu dolama, tama augwali isai dao. 
Te Godigo meba ela mubo sogo, te gasa bage ge neyu, augwa homu begelama, tama agaba ma begasa aselama, tama agaba gedu haluasa po bomonama walio. 
Te megi da, augwaligo homugo ma koneama, God te augwa tonalubo bidi dao homu yai. Te Ugwadu Mu Bidibo Godigo agai te augwali tau sabo bidi dao. 
Tiali goli, augwa tibo po olama, tama agaba te odolali pedauwalide ąį soabo tiwai elama, daganobo po walio. 
Augwaligo agai po wali me pabe, tama augwaligo te aga dali dąų walali bomai po bolama, togalio. 
Tiali goli, Godigo te olo tau mabo wiegi yai kolesaga augwaliba elama, tama augwaligo te dwai sęgę sela sąwani, tama agai augwali me dolobeo. Hauwa sogo te agai wado yali, te palia selama elalu, tama augwaliba haliga sębę me ebeo. 
Agai te tama tiwai homu augwaliba yai. Augwali te we bidi naga tama tiwai, augwali te wali aselama pabo tiwai ebao. 
Hauwa sogo augwa hagoma eyu, agai po sela sąyu, te bidi meni yai tǫ wa pai bulude bidiyu tiali. Tama hauwa augwaligo aga haliga sęgę ilali. 
Te Israel dabego God te tedali gasa wiegi yai mu dao. Tiali goli, hauwa sogo augwaligo aga usu sabo sę eyu, tama agai wado yabo sę ilali. 
Augwaligo te agai genuai bomo teba homu konesiąwai, tama agai augwali te boi bidi dabego nogode ma sali, te sogoba augwaligo homu kone me palobeo. 
Te sogo agai te bidigo isiąwai bomai sę dabe te Soan bulude yali, te Isip tǫ pedaide dao. 
Godigo te wę dabede te kaneme pedalumainu elama, tama te Isip dabego tuainu yali usu me ebeo. 
Tama agai te bolia hauwa, me te gedeli hauwa te augwaliba tagala palai. Tama te bolia dabego augwali gąų kela tuyu yali, tama te gedeli dabego te Isip bagego gide nai dabe hauwa dolali. 
Tama Godigo te suma digi me, kauwa bidi dabe me, te kuli mano dabe dali tagala palama, tama augwaligo te augwa gide nai dabe tula silai. 
Agai te talua ge tulubage tagala palama, tama tego te augwaligo wain ni dabe dolali. Tama agai te talua ge tulubagego te augwaligo ni kaya dolomainu yai dao. 
Agai te genuai tulubage, te talua ge tulubage, tagala palama, tama augwaligo bulmakau dabe ela muai dao. 
Agai augwaliba te wado umabo mu udubadi udubadi genama, tama augwaliba te dene mu mawai. Tama agai te ensel bidi meba tagala palama, te augwali doligi pali, tama augwali te sęgę genuai mu salio. 
Agai augwaliba haliga sębę elama, tama agai augwali me gogolobeo. Menio. Agai te genuai gasi tagala palama, tama augwali isila palio. 
Agai te Isip hani tigidaligo te gomunai ogwa dabe ela muna silali. 
Tama agai te sipsip tonalubo bidi tiwai elama, tama aga polasa peyu tama, aga we bidi dabe tonaluali. Tama te tǫ wa pai bulude agai augwaliba te sunumi ola mawai. 
Agai augwali odasa peyu, tama augwali bugagia bidali, tama tiyu, augwali wi me ebeo. Tiali goli, te tamu ąįgo augwa boi bidi dabe mesega salio. 
Agai augwali te aga tǫba digi odasa asali. Te bulu du te pesage te aga digi bomogo sali bulu dao. 
Agai te gasa hani dabe te aga hani dabe asobo si, te augwali sela sąwani. Tama agai te tǫ te Israel hani dabeba doba yali. Tama agai augwali te augwa ugwa be dabede bugagia bidimainu yai dao. 
Tiali goli, te Israel dabego te Ugwadu Mu Bidibo God usu selama, tama agaba hagoma yai. Augwaligo agai bomai po wali me pisąwai. 
Augwa hagoma elama, agai po sela sąwani, te augwa wąį nǫų dabego te polobadu yali tiwai yalio. Augwali te gagea pai enesigi te enebo dolo pisąbo tiwai yai dao. 
Augwaligo te tibo godigo alta dabe nigali, tama te tebogo te Godigo wado po omainu ilali. Augwaligo te tibo god dabe nigilama ebaso, tama Godigo augwaliba dwai haliga yai dao. 
Godigo augwaligo te tebo kolesaga sulama, tama agai augwaliba haliga sębę dwai mu yai, tama tibaso agai te Israel dabe tudiba mu muanio. 
Tama agai te aga Silode elaluali ugwa be tagalalio. Te bede aga te we bidi dabe tomode bidali. 
Tama agai te boi bidi dabego te dąų walali bomai po muani halobage, te bokis kontrak, sela pomainu ilali. Te bokis halobagede augwaligo te agai bomo me ula suali. 
Agai te aga we bidi dabeba wado po olama, tama te boi bidi dabego augwali ela mumainogo yai dao. 
Te gesi ogwa bidi dabe te genuai boi hwįani madi isali, tama te gesi ogwa we wegi dabe te augwali sabo bidi dabe meni yai dao. 
Te boi bidi dabego te pris dabe ela mubaso, tama augwa we dabego te augwalide homu dene eyu, tama gela wainu ebo te usu ebeo. 
Tialima, megi da, Genuai Bidi hodaluali, te bidi betde pilama hodalubo tiwai gilama yali, tama te bomai bidigo te wain wę hauwa tulama, tama te i hai ola bilibo tiwai gilama yali. 
Tama agai te boi bidi dabe dali hwįnama, tama augwa asaliba ma pobeasa pali. Agai augwali aiyaba mu elalubaso, tama augwali hale dwai mu yali, tama augwaligo ma hwįabo usu ebeo. 
Tiali goli, agai te Josepgo wąį nǫų hani bage te wei isiąwai, tama agai te Efraimgo hani bage te sa me mubeo. Menio. 
Agai te Juda hani bage dali, te Saion bulu dali sa muani, te bulu du te agai wei mu ebo bulu dao. 
Agai te aga genuai tempel be te bulu dude nigali, te aga dagalude elalubo be tiwai. Tama agai te tempel be sesemane te bomo dali elalumainu yali, te e tǫ dili dąų elalubo tiwai gilama emainu yai dao. 
Godigo Devit sa muani, te aga sę bidi, tama aga selama, te genuai sipsip dabe tonalubo sę me, te sipsip wai dabe tonalubo sę emainu sa muai dao. 
Tama Godigo aga te Israel king bidi mubaso bidali, tama aga te Godigo we bidi tonalubo bidi bidai dao. 
Devitgo te aga sęba naga homu kone palama, tama augwali bugagia tonaluai. Tama aga te augwaligo wiegi yai polalubo bidi bidai dao. 
