﻿Godigo Nogi Ugwaba Sabo Tęąbi Po Wabo Buku Dabe.
81.
Te wiegi yai pemene elama, te Godiba i wao, te da tau seselalubo bidi dao. Te Jekopgo God nogi ugwaba sabo tęąbi po wao. 
Te wiegi yai musik te tobage temborin dali, wiegi yai gita dabego, me te kulelede wao. 
Te biugel bu wabo te genuai side te gesi polua nanama, tama te polua genuai pedalubo sogode, te biugel bu waiyąo. 
Te da Israel dabego bomo yai po elaluai. Te Jekopgo Godigo te bomo yai po dabolo mawai dao. 
Te polobadu Godigo te Isip dabe dali hwįgi pali sogo, agai te bomo yai po da Israel dabeba mawai dao. 
Eno te bidi me deligo dogonide po odolama, tama te dego dogoni te eno konesiąwai. Agai te tama po wali, “Eno te dagego nagede elaluali sęgę tigidali tega sąwanio,” wali. “Tama eno dagego te sę ebo basket dabe te tǫba mumainu yai dao. 
Te dagede genuai sęgę elalubaso, tama enaba i wabo sogo, eno dage tau selama, tama dage bugagia bidai. Ena te geme dulalubo pesagede te pǫ kulukulu wabo tomode ena bidibao, tama eno dagego gedu haluasa po wabo odali. Polobadu dage te Meriba wę ulu pedalubode bidibadi, tama eno dage usu sai dao.” 
“Eno we bidi dabeo, eno dageba te bomai po mawainu ebao. Mu tama, te Israel dabe, eno homugo te dagego eno po odomainu homu ebao. 
Dagego te gasa hani dabego tibo god wali me pigio. Tama dagego gasa godiba lotu me wagimio. Dagego ena deliba naga lotu waiyąo. 
Ena naga ena Genuai Bidi da, ena dagego God dao. Ena digi dage selama, te Isip taga soyu asai. Dagego pedauwali a olalubadi, tama eno te dage pedauwaliba nai muaibao,” walio. 
“Tiali goli, eno we bidi dabego te eno po me odisąwai. Mu tama, te Israel dabego eno po wali homu me isiąwai dao. 
Tama tibaso, eno te augwa hagoma ebo kolesagade wali bilimainu sula tagalali, tama augwa te mena augwa homugo ela palio. 
Eno wei mu ebaso, tama eno hani bage augwaligo te eno po odomainu homu yali. Tama eno homugo te Israel dabego te eno homu sesemane wali pomainu homu ebao. 
Te augwaligo tama tibaso da, teda polo tama eno te augwaligo boi bidi dabe doligi da. Te eno boi bidi dabe augwali dali hwįnama, tama augwali aiyaba mu elalualigi da. 
Te ena wei homu isiąbo we bidi augwali, teda augwali wi mu dwai elama, tama enaba kidu sugunagasaibao. Tama eno augwaliba te sesemane sogo dene magi dao. 
Tiali goli, eno wiegi yai nai mu dageba maiyabo homu eyu, tama dage te buside elalubo tubo nai te hani menama, tama dagego haliga te pągąna peyu igi da,” wali. 
