﻿Godigo Nogi Ugwaba Sabo Tęąbi Po Wabo Buku Dabe.
95.
Dage asiąo. Dago te Genuai Bidi nogi ugwaba sabo balia po wainao. Dago te bomai Godigo da ma sali, te homu koneama, tama dena balia weyu, tama agaba wiegi yai pemene yao. 
Da te aga pąba pelama, tama agaba usu da po wao. Dago te wiegi yai pemene ebo balia po meba weyu, tama agai nogi ugwaba sinao. 
Magi baso meni, Genuai Bidi aga te bomai God dao. Aga te bomai king, tama te tigidali tibo god daide aga ugwadu daide bidibao. 
Agai te tigidali bulu tǫ pedai tonalubao, te aiyaba odogo gulali bulu tigidali, me te ugwanu igiluali bulu du tigidali, te agai naga tonalubo dao. 
Aga digi te tǫ, me tamu ąį nigilama, tama tialima, agai augwali tonalubao. 
Dage asiąo, dago tobolu basi gulama, tama agaba lotu wainao. Genuai Bidigo da nigai. Tialima, da aga pąba pelama, tama kidu sugunao. 
Aga digi dago God dao. Aga digi da we bidi te sipsip wai tiwai tonalubao, tama agai da nai mobao. Te e sogo megi tama dagego agai pedauwalide po odiąo. 
Genuai Bidigo te po wai, “Dagego te duga haliga bomonama dąų ola sigimio, te polobadu duga wąį nǫų dabego te bulu Meriba me Masa, te tǫ wa pai bulude yali homu tiwai igimio,” po wai. 
“Te bulude augwaligo ena usu sali. Augwaligo te eno ebo tigidali bomai sę suali, tiali goli, augwaligo ena usu sai dao. 
Eno te hani we bidide dwai haliga iduali, te kibu be bidi sese siba usu nai. Tama tibaso, eno te po wali, augwa hagoma mu yali. Augwaligo te eno wali pabo homu me isiąwai. 
Tama tialima, te ena haliga sębę elama, tama augwaliba te tama po dąų weyu wali, ‘Mu tama, dage te bulu tomoba me pogobeo, eno te dage toma nomainu mawainu yali buluba me pogobeo,’ po wai dao,” wali. 
