﻿Godigo Nogi Ugwaba Sabo Tęąbi Po Wabo Buku Dabe.
97.
Genuai Bidi king bidibao! Tǫ, nage pemene yao. Tama te tamu ąį tomode elalubo bulu ailan dabe, dage bugai haliga iyąo. 
Te pǫ dabe me hulia sabogo aga mesegelebo dao, tama agai te we bidi dabe te doloba pai kolesagade tonalubao. 
Sia te aga pabodu polasa peyu, tama aga te pobeasa biliduali boi bidi dabe ulaibao. 
Agai te be selego ula pedalumainu ilama, tama te tǫ ula ilibao. Tǫgo sulama, tama noma sabo dao. 
God te tigidali tǫgo Genuai Bidi dao. Aga asobaso, tama te bulu du dabe te wę tiwai pedelaibao. 
Te ugwadu elalubo dagalugo te agai doloba pai kolesaga po pusuyu, tama tigidali hani we bidigo agai te boma pai ula subo dao. 
Te tibo god dabeba lotu weyu, te nogi ugwaba sabo we bidi dabe, augwali te hale dwai mu saibao. Genuai Bidigo te tibo god wabo nai tigidali aiyaba elalubo dao. 
Te Saion we bidi tigidali, me te Juda taun we bidi dabe, augwa te bugai haliga elama, tama nago po tųde wiegi yai pemene yaibao. 
Genuai Bidi, nage te Tigidali Bomo Elalubo God, nago te tigidali tǫ pedai tonalubao. Nago genuai nogi elalu, tama nago tigidali tibo god aiyaba elaluai dao. 
Genuai Bidigo te dwai kolesaga wei isąbo we bidi dabe augwali te agai wei homu mu ebao. Agai te aga we bidi dabe bugagia tonalu, tama augwali te dwai bidi dabego nogode ma sabo dao. 
Godigo te doloba pai we bidi dabeba ula mayu, tama augwali homu pemene ilibo dao. 
Dage doloba pai we bidi, te Genuai Bidigo ebo sę dabede pemene yao. Te homu kone palama, tama agaba usu da weyu, aga te tedali wiegi yai da wao. 
