﻿Godigo Nogi Ugwaba Sabo Tęąbi Po Wabo Buku Dabe.
104.
Eno Genuai Bidigo nogi ugwaba saibao. Genuai Bidi, nage eno God, nage ugwadu mu dao. Nage genuai polalubo tuni bidi, nago nogi genuai mu yai. 
Nage naga ulago digi ma mesegelebo dao, te bidigo aga tigi ugwago mesegelebo tiwai ebo dao. Tama nago dagalu dali, tigidali hǫ munama elalubao, te bidigo ugwa be sęnama, tama baklain bonogo kekelama dąų elalubo tiwai yai. 
Tama nago be ąį daide ugwadu sęwai. Dagalu pǫ te nago dulalubo nai karis tiwai, tama waligo nage selasa pabo dao. 
Nago te wali tagala palama, tama waligo nago po sela pabo dao. Tama nago te be selego ula ebo te nago sę bidi pedalobo dao. 
Nago te tǫ aga bulude munama elalubao, tama tǫgo bomo mu elalubo dao. Aga memenege me egobe. Menio. 
Nago tamu ąį muani, te tǫ mesegelai elalubao. Tama ąįgo tigidali bulu du mesegelai. 
Tialima, nosali nago tamu ąį dali po bomo elama wai, tama aga wi pai. Awe, tamu ąįgo odali, nago i bomo elama wai, tama aga bomonama mu pai. 
Tama peyu, tamu ąįgo tigidali bulu du tagalama, tama aga tǫ odogo dwagi yai digi pai. Nago tamu ąį tede bidao wai, tama megi aga tede bidibo dao. 
Nago dąį muai, tama tamu ąįgo te dąį muani bolobeo. Tama tamu ąįgo tigidali tǫ ma halugobeo. 
Nago te ąį ulu bulu du odogo yai digi tomode asomainogo pedelao wai, tama nago te ąį dwagi yai digi dolo pomainogo yai. 
Bulude bidibo uni hasa dabe, augwaligo te ąį tumainogo yai, tama te uni donki dabe augwaligo me te ąį tuyu, tama augwali dogoni wa pogobeo. 
Ba dabe augwaligo pibo be te ąį sesegede elalubo nide be sę yai, tama augwali ni nologode dulaluyu, augwa po wabo dao. 
Nage bulu ugwade bidiyu, nago tulubage bulu duba tulumainogo tagala palobo dao. Tama tiyu, nago te tǫde elalubo nai tigidali dali dwagi yai sę ebo dao. 
Nago te kibu bulmakaugo tuabo nosa dabe pedalao wai, tama nai dabe meba da we bidigo bulama, sela tuabo nai me pedelai. 
Tama dago bono ni du wain wai bulama, wain ąi tuyu, dago homu dwagi yai emainogo tiwai. Tama dago te ni oliv wel ąį selama, dago gesabidide pilama, tama gesabi ula emainogo yagameo. Tama dago te wit ge bulama, dago tigi dąų omainogo tubo nai bret nigibo dao. 
Tulubage tuluyu, Lebanon tede elalubo sida ni dabe augwaligo ąį genuai sabo dao. Te ni sida Genuai Bidigo ni mu dao, polobadu aga bulai. 
Ba dabe augwaligo te ni sidade be sę ebo dao. Tialima, dogoni bobobage yai bago be gasa nide sębo dao. 
Uni meme dabe, augwali te genuai bulu dude bilibo dao, tama hasa kesebe me, hoiyu me, augwali te genuai masigi dedagede geme bidibo dao. 
Nago polua nigai, tama agai tigidali kibu be koneabo dąį ela pabo dao. Tama giliga aga aiyaba dulabo sogo koneama, dulubo dao. 
Nago be huliao wabo dao, tama hulide uni hasa dabe bilibo dao. 
Gesi laion dabe augwaligo tuabo hasa dabe gegeyu, i bomonama ebo dao. Augwaligo hasa Godigo augwali momainogo gegebo dao. 
Tama giliga asobode, augwa bidibo dedageba ma pabo dao. 
Tama bidi dabe hodaluama, augwali sęba pabo dao, tama augwali sę idubadi, giliga iba dega sigi pabo dao. 
Genuai Bidi, nago nai hauwa nigai! Nago genuai homu kolesagago koneama, te nai tigidali nigai. Nago nigali nai tigidali tǫde mu pągąwai. 
Tamu ąį genuai mu yai, tama genuai sųgų, me dwasianu sųgų, me gasa nai meba hauwa te tamu ąįde bidibao. Dago nedebo usu egobeo. 
Tama tamu ąįde sip geba dabe augwali uga soayu, eda soayu elama, bilibo dao. Tama polobadu nago nigali genuai sųgų, augwali me te tamu ąį tomode biliyu, posoga palu ela bilibo dao. 
Tigidali sųgų augwali nage tonalubo dao, augwali nasi ebode nago nai momainogo ebo dao. 
Nago nai augwali mobaso, te nai augwaligo tubo dao. Nago naga augwali nai mabo dao, tama augwaligo haliga pągąwai. 
Nago augwali tudiba mubaso, augwali wi ebo dao. Tama nago augwaligo mobo sela sąwani da, te augwali isilama, tǫ tiwai ma gagawaibao. 
Nago mobo augwali mobaso, augwaligo bidibo ula sabo dao. Nago tigidali nai tǫde gesi ma pedelabo dao. 
Eno homugo Genuai Bidigo genuai nogi dali, ula dali, sesemane sogo bidada peyu, bidada pao. Tama Genuai Bidigo aga nigali nai tigidali dali dwagi yai homu yagameo. 
Agai tǫba tonalubaso, te tǫ memenege eyu, mali ebo dao. Agai te bulu duba nogo mubaso, te bulu dude sia hano ebo dao. 
Eno bidibo ula elalubo te sogo, eno Genuai Bidi dali tęąbi yaibao. Eno Godigo nogi ugwaba selama, tęąbi eyu, ena isiboba usu nigi paibao. 
Agai ena dwagi yai homu ilai, tama eno homugo agai eno tęąbi ebo godolo emainogo ebao. 
Genuai Bidi, nago te dwai sę ebo we bidi tigidali dolao. Eno homugo dwai sę ebo bidi dabe augwali mu haga yabo homu yai. Eno Genuai Bidigo nogi ugwaba sobao. Genuai Bidi agai nogi ugwaba mu saibao. 
