﻿Godigo Nogi Ugwaba Sabo Tęąbi Po Wabo Buku Dabe.
107.
Dago Genuai Bidiba puba hwi po wao. Magi baso meni, agai daba te wiegi yai mu ebao. Sesemane sesemane sogo agai da wei mu ebo dao. 
Dage tigidali we bidi, Genuai Bidigo dage te boi bidi dabego nogode ma sali, dage dali, ena me, dago te Genuai Bidi nogi ugwaba sinao. 
Agai dage we bidi dabe te gasa bulu tǫ badu, te giliga pedalubo badu, ma giliga dega sabo badu, me te not badu, ma saut badu, te ma sai dao. 
Meba te genuai bulu te kemi tǫ wa pai bulude bilaluai dao. Te augwali bidigi pabo madi te taunba pabo sunumi me deli te me subeo. 
Augwali te nasi mu elama, tama te wę nogonego siyu, tama augwa homugo te augwali dolaiba homu yai. 
Augwali te tiwai dwai bidibaso, teda augwa te Genuai Bidiba i obaso, tama agai wiegi yai sę mu eyu, te augwali tau sai dao. 
Agai augwali pabo dodolama, tama augwali odasa peyu, tama augwali te taun me deliba pedelama, te augwali tede bidai. 
Tialima, augwaligo te Genuai Bidiba usu da mu waiyąo, te sesemane agai augwali homu dene mu elama, tama agai augwali tau sabo sę wiegi yai mu yalio. 
Agai te wę nogonego dogoni wa sali we bidi dabeba te wę mayu, tama augwa te wę tulama mu usu yali. Tama agai te nai hauwa te nasi ebo bidi dabeba menama, tama augwa te dwagi yai nai tulama, tama augwa tabi pągąna pali. 
Meba te be hulia sai madi, te kalabus be tomode bidali. Te bidi dabego augwali te sengo kalabus elama, tama augwaliba te sęgę mawai. 
Magi baso meni, augwaligo te Tigidali Bomo Elalubo Godigo pode hagoma eyu, tama augwaligo agai po sela sąyu ebaso, te augwali kalabus eyu, sęgę mawai dao. 
Augwali te tigi dene sę mu elama, tama augwa bomo tigidali sia sai. Tama augwali te tǫba degasa dulama, tama augwali tau sabo bidi meni yani. 
Augwali te tiwai dwai bidibaso, teda augwa te Genuai Bidiba i obaso, tama agai augwali tau selama, tama augwalide elaluali te sęgę dagala sąwani. 
Genuai Bidigo augwali selama, tama augwali te hulia saide bidali tagalu, tama agai augwaligo te sen togolama, tama augwali te kalabus ma elalubeo. 
Tialima, augwa te usu da mu te Genuai Bidi wao. Sesemane sogo agai augwali homu dene mu elama, tama agai wiegi yai sę mu eyu, augwali tau salio. 
Agai augwaligo te brasgo nigali sunumi dabe aluali, tama te kalabus be bagulali obo ain ba aluama, togogo pai dao. 
Meba te augwa yali dwai kolesagade gasi sali. Augwa te dwai sę hauwa ebaso, tama tialigo augwa te sęgę tolai dao. 
Augwa te nai tubo hagela yai, tama tiyu, augwa pąde isainu yali. 
Augwa te tiwai dwai bidiyu, tialima augwa te Genuai Bidiba i obaso, tama agai augwalide te sęgę dagala sąyu yalio. 
Aga digi po obaso, tama augwa tigi usu ma ilama, tama augwali te gų pagede ma dobola sai dao. 
Tialima, augwaligo te Genuai Bidiba usu da mu waiyąo, sesemane sogo agai augwali homu dene mu elama, tama agai augwali tau selama, te wiegi yai sę mu yai dao. 
Augwa te agaba usu da wabo ofa emainu yao. Tama augwa te pemene ebo tęąbi po weyu, tama te we bidi dabeba te agai wiegi yai sę yali po pusao. 
Bidi meba te moni geba sipde boskru sę eyu, tama augwali te genuai tamu ąįdu te tigidali buluba tedelama pobao, tama te walu selasa pabo bisnis sę te bidi dabede ebo dao. 
Te boskru dabego te Genuai Bidigo ebo sę dabe subao. Augwaligo agai te genuai tamu ąįde wiegi yai sę ebo subo dao. 
Genuai Bidigo po weyu, tama agai te genuai boma pai wali te nai hodolama, tama tego te moni dobo dwai biksi hodolubo dao. 
Te sip dabe ugwaba mu holama, tama aiyaba mu dulu ebao. Tama tiyu, te boskru dabego te augwali dolaiba homu elama, tama augwa wi dwai ebo dao. 
Augwali te sipde umuna sai biliyu, te bomai wę tuai bidi tiwai ebao, tama augwaligo te sip tau siyu, te magi sę me deli ebaso, te usugobeo. 
Augwali te tiwai dwai bididubaso, teda augwa te Genuai Bidiba i olama, tama agai augwali tau selama, tama augwalide te sęgę dagala sąwaibao. 
Agai te moni wali me biksi silimainu elama, tama te tamu ąį ma hogodalugobeo. 
Augwaligo te tamu ąį dua digi bidibo sulama, tama augwa wiegi yai pemene mu elama, tama Genuai Bidigo augwali odasa pelama, te taun sesege, te augwa painu yali madiba, sabalubo dao. 
Tialima, augwa te Genuai Bidiba usu da wao, sesemane sogo agai augwali wei mu ebao, tama agai augwali tau siyu, wiegi yai sę mu ebo dao. 
Te augwali Godigo we bidi dali sisinibo sogo, augwaligo te agai genuai nogide po pusa mao. Augwali te tobolu bidi dabe dali sisinama, tama augwaligo agai nogi augwa tomode ugwaba somainao. 
Genuai Bidigo te genuai wę te mu sula somainu elama, tama te tǫdu pedalubo wę tigidali sula somainu ebo dao. 
Te ili elalubo tǫgo te tamu elalubo tǫ pedalumainu elama, tama tede te magi nai deli me pedalisiąwai. Magi baso meni, te badu bidi dabego te dwai kolesaga ebaso, tama Genuai Bidigo te tama tiwai sę ebo dao. 
Genuai Bidigo te tǫ wa pai bulude te wę hauwa pedalumainu elama, tama te wa pai bulude wę hauwa elalumainu yalio. 
Tama agai te tubo nai meni yai bidi dabe tede bidimainu ilama, augwali tede bidalu, tama augwa te taun nigilama, tama augwa tede bidali. 
Augwa te nai dabe, me te ni wain dabe bulama, tama augwa te nai me wain hauwa salio. 
Genuai Bidigo te aga we bidi dabeba wiegi yai sę ela mani. Tama tiyu, augwa te wai hauwa ame neyu, tama agai te bulmakau dabe me hauwa pedalumainu ilalio. 
Te boi bidi dabego augwali te hwįyu, aiyaba elaluama, te augwali hale emainu ebo sogo, tama augwali aiyaba mu elaluama, tama augwaliba dene mawai. 
Genuai Bidigo te boi bidi dabego tobolu bidi dabe te olo nai tiwai naga pedalumainu elama, tama agai augwali te wa pai bulude te sunumi meni yai madi bilalumainu yalio. 
Tiali goli, te magi doado bage meni yai bidi dabe te dwai bidibaso, agai augwali tau sali. Tama agai te augwaligo wai dabe te hauwa te sipsip dabe tiwai pedalumainu yai. 
Te doloba pai we bidi dabego te sulama, tama augwa bugai haliga yalio. Tiali goli, te dwai bidi dabego po meni yani. Augwa pedauwali pania siyu naga yalio. 
Tialima, dage te wiegi yai homu elalubo we bidi dagego te sę tigidali bugagia homu kone palao. Tama dagego te Genuai Bidiba po hanilama pusuyu, te sesemane sogo da wei mu ebo da po waiyąo. 
