﻿Godigo Nogi Ugwaba Sabo Tęąbi Po Wabo Buku Dabe.
112.
Genuai Bidigo nogi ugwaba sao. Genuai Bidi dali wi eyu, agai bomo yai po wali pabo bidi, agai dwagi yai homu yaibao. 
Agai wai dabego genuai nogi augwali we bidi tomode elaluaibao. Godigo te dwagi yai bidigo hani dali dwagi yai sę yaibao. 
Agai we wai augwaligo mone dali nai hauwa siyu, tama augwali bugagia sesemane sogo bidaibao. 
Hulia sai elaluai, tialima ula pedelama, dwagi yai bidi dabe augwali te ulago tau sabo dao. Dwagi yai bidigo gasa we bidi dali dwagi yai sę eyu, augwali bugagia olo tau sabo homu elama, dolo bugagia bilibo dao. 
Dwagi yai kolesaga ebo bidi aga dali gasa bidigo nai negeli aga dali somainogo ebo, tama aga masigi sabo sę bisnis ebo tigidali bugagia dolo pabo, te bidigo homu dwagi yai yao. 
Dwagi yai bidi aga tula mugobeo, tama we bidi augwaligo homugo aga gegeda pogobeo. 
Agai te sęgę pedelabo po odolama, aga wi homu me egobeo. Agai Genuai Bidi dali konealubo po bomo elama, dąų wabo dao. 
Agai te magi nai dabe dali wi eyu, moni homu me ebo menio. Tama agai koneai, te boi dabe augwali hwįbo digi hagabo dao. 
Agai nai hauwa nai meni yai bidi dabe augwali mabo dao. Agai dwagi yai kolesaga sesemane sogo ebo dao. Tama agai genuai nogi agai bulude elaluaibao, tama augwaligo aga nogi ugwaba saibao. 
Dwai sę ebo bidi dabe, augwaligo te sę ebo sulama, wado po wabo dao. Augwaligo te dwagi yai bidi dali dwai homu ebo dao, tama nosali augwali mu dolobo dao. Tama augwaligo te dwagi yai nai sainogo tonaluali nai mu sogobeo. 
