﻿Godigo Nogi Ugwaba Sabo Tęąbi Po Wabo Buku Dabe.
127.
Te Genuai Bidigo te be me deli sę igi menigi sogo da, te kamda dabego sę odolali igi dao. Te Genuai Bidigo taun me deli tonalugi menigi sogo da, teda te tonalubo bidi dabe augwali te odolali tonalugi dao. 
Da te kigamu digi mu hodaluama, tama sę dene ela pidubadi, te be hulia saboba usu nani, te mone me nai dabe sabo sę eyu tebao. Tiali goli, teyu, te da odolali sę dene yabuo. Magi baso meni, Godigo te aga wei ebo we bidi dabeba te toma nabo sogo mabo dao. 
Godigo dabolo dwagi yai sę eyu, tama te wai dabe te wiegi yai nai mu tiwai mabo dao. Te wiegi yai nai dabe mu dago te Godide sabo dao. 
Te gesi bidigo wai ogwa te ami bidi me deligo nogode te enesigi ene tolalubo tiwai ebao. 
Te wai ogwa hauwa elalubo bidi, aga te wiegi yai pemene yao. Te agai te aga boi bidi dabe dali te po tų ebo pesagede te po tų ebo sogo, te augwaligo aga tau saibao. Tama aga te po tųde hagamainu me egobeo. 
