﻿Godigo Nogi Ugwaba Sabo Tęąbi Po Wabo Buku Dabe.
146.
Te Genuai Bidigo nogi ugwaba sao. Ena digi eno te aga nogi ugwaba sabo dao. 
Te ena tǫde bidibo tigidali sogo, te eno aga nogi ugwaba saibao. Te eno ena Godigo nogi ugwaba sabo balia po odubadi, te ena isiboba usu nigi paibao. 
Te king dabego, me te tǫde bidi dabego nage me dobola sogobeo. Tama tiyu, nago homu te nosali isabo bage augwaliba me muidalio. 
Te augwali isibo sogo, augwali te begelama, te tǫ ma pedalubao. Tama te sogo augwaligo te yaibao po wali sę tigidali te me egobeo. 
Te bidi me deligo te Jekopgo Godiba homu kęą pelama, te agai aga tau siyu, te God dali kęą pelama, te aga Genuai Bidi da homu eyu da, teda aga pemene emainao. 
Godigo te dagalu, me tǫ, me tamu ąi, me te tigidali elalubo nai pedalumainu yali. Tama sesemane sogo te Godigo aga dąų walali po tigidali wali pabo dao. 
Te boi bidi dabego dologode dwai mu bidibo te we bidi dabe te Genuai Bidigo tau sabo dao. Tama agai te nai sili bidalubo we bidi dabe nai mabo dao. Genuai Bidigo te kalabuside bidibo bidi dabego kalabus silimainu ebo dao. 
Tama agai te gedu widai bage te ma tonono yabo usu ma elama, tama te sęgęgo augwali aiyaba elalubo bidi dabe te sęgę augwalide dagala sąyu ebo dao. Genuai Bidigo te aga doloba pai we bidi dabe wei mu ebo dao. 
Agai te dago tǫde bidibo te gasa bulu bidi dabe tau sabo dao. Tama agai te wilawe we dabe tau siyu, tama te tiana wai puluba me tau sabo dao. Tiali goli, agai te dwai sę ebo bidi dabego yainogo ebo sę dabe te augwali homu kone tųą palobo dao. 
Genuai Bidi te sesemane sogo king bidada peyu, bidada paibao. Te Saion we bidi dabe, dage Israel dabe, te duga God te sesemane king bidada peyu, bidada paibao. Te Genuai Bidigo nogi ugwanu sinao. 
