﻿Bugagia Bidibo Kolesagade Po Asęai Buku.
27.
Nago te hagoma homu eyu, tama nago te magi sę me deli te do yaibao olama, te po dąų me waligio. Magi baso meni, te mena sę te sogode pedelabo te nago me konebe dao. 
Te gasa bidi dabego nago nogi ugwaba sobaso da, te usu dao. Tiali goli, naga digi te tama tiabuo. Te sę te nago pedauwaligo yabo sę menio. 
Te wiegi yai homu me elalusiąbo bidigo dobo kolesagago, agai te genuai sęgę dabolo mawaibao, tama te sęgęgo te genuai masigigo sęgę, me te masigi kemi pesage holali te aiyaba elalubo dao. 
Te haliga sębę elama, te wado po wabo bidigo te gasa bidi dabeba odolali te dene mayu, tama augwaliba dwai sę mu ilibo dao. Tiali goli, te mena nai sabo homu eyu, tama te gasa bidiba dwai haliga ebo, te dwai mu elama, tama te haliga sębę me wado po wabo kolesaga aiyaba elalubo dao. 
Te nago abagigo dwai sę ebaso da, teda nago aga dali te dodolobo sę ebo kolesaga yao. Meni baso da, agai te nago agade te abagi homu ebo menio, agai te homu yaibao. 
Te abagi dabe mu dede augwaligo te nageba dene mabo te nage tau somainu ebao. Tiali goli, boi bidi dabego nageba te abagi kolesaga eyu da, dua dao, augwaligo te tibo po ola naga ola mayu tebo dao. 
Te bidi aga nai tulama, te haliga pągąna peyu, tabia pabo sogo, agai te nai ma tubo hagela homu yaibao, te hani tiwai te pusu mu ebo nai me te tagala homu yaibao. Tiali digi, te bidi nasi ebo sogo, agai te tigidali nai te wiegi yai da homu yaibao. Te ha elalubo nai me tagalao, te me te aga pedauwalide pusu naga ebo dao. 
Bidigo te aga page bulu tagalama, te subigila bilibo, te ba me deli aga be tagalama, tama te subigila bola bilibo tiwai gilama ebao. 
Sanda me te tobage wel dabe te wiegi yai denami elalubo, augwaligo dabolo te wiegi yai pemene ilibao. Tama te abagi dabego dabolo te wiegi yai pemene ilaibao, magi baso meni, augwaligo te da tau sabo homu mu elama, tama augwaligo wiegi yai mobo mabo po dabolo mabo dao. 
Nago naga abagi dabe, me naga we wai sibi te homu gegeda palama, tama augwali tudiba me munamuo. Tama te dwai sę mego nage gegebaso da, teda naga amago nage tau somai da homu elama, te nage digibulu pelama, agaba munu me hanalugi pelamuo. Te nage pąde bidibo bidigo te nage tau sabo usu yaibao. 
Eno ogwao, nago te wiegi yai kolesaga konea sabo homu sobaso da, teda ena bugai haliga mu yaibao. Tama te bidi me deligo enaba te kisilibo po obaso da, teda eno agaba te po wei ponobaso, usu yaibao. 
Te wiegi yai homu elalubo bidigo, agai te tiwai koneani, te sęgę agaba pedelainu ebaso, tama agai te geda sali. Tiali goli, te wiegi yai homu elalusiąbo bidigo, aga te aga sunumide te dwai sę edubo sulama digi, tama aga pelama, tama gesabidi si deliba unulama, tama te sęgę tolobo dao. 
Te bidi me deligo te gasa bidigo dali nai negeli wei ponaibao wai, te gasa bidigo wei ponabo usu meni baso da, teda agai wiegi yai kolesaga me ebeo. Tama te bidi me deligo nageba nai negeli sabo homu elama, tama nago koneani, agai te tobage dąų wabo po obaso da, teda nago bomo elama, te agai nai me deli siyu, te agai te negeli sali naide wei ponabo te sa mubo tiwai ebo nai sao. 
Te nago genuai po dągą olama, tama naga abagiba te kigamu mude te siade dao po obaso da, te nago agaba te po dwai wabo tobage po tiwai obao. 
Te bidi me deligo we aga te wado po weyu, po hauwa wabo we yai baso da, teda te be pedudu te dwasianu tulubage tobo sesemane tomoba asobo tiwai ebo dao. 
Agai bidigo agai te kolesaga tagalumainu ebo usu me ebeo. Te tiwai te bidigo te wali asobo te panibo tiwai, ma te wel aga nogode sela pabo tiwai ebao. 
Augwaligo te ain dulabo nai te aingo nigali. Te tiwai naga, te bidi me deligo te gasa bidigo homu te wiegi yai pedalumainu tau sabo dao. 
Te bidigo aga bulali nedu du tuabo homu eyu da, aga te ni te bugagia tonaluao. Tama te bidigo aga tonalubo bosman bidi te bugagia tonalubaso da, teda te tonalubo bosman bidigo aga nogi ugwaba sabo dao. 
Te bidigo te wę geba aiya tonobaso da, teda digi aga gesabidi subo da. Tama bidigo aga homu me, te tigidali homu me, te aga ebo kolesaga bugagia homu kone palali da, teda te aga mena tobage bidi da wabo te agai koneaibao. 
Te bidi hauwa isibadi goli te tagala, augwaligo te isali bidi dabego bidibo pesage pągąna sobaso usu egobeo. Te tiwai gilama naga, te bidigo aga homugo wei ebo te usu nainu ebaso, te usu meni yaibao. 
Siago te gol me silva usu sabo dao. Tama teyu, augwaligo te dwai pobele bage sela sąbo dao. Te tiwai gilama naga, te bidi dabego te bidigo ebo kolesaga sulama, te augwa koneainogo yai, aga te wiegi yai bidi, ma dwai bidi yaliwe naga te koneainogo tiaibao. Tama aga te wiegi yai bidi yai baso da, teda augwaligo te aga nogi ugwaba sabo dao. 
Te nago te wiegi yai homu kolesaga me elalusiąbo bidi me deli te genuai gilama mu elebaso, te pąde isabo homu ebadi goli te tagalao, agai aga te dwai sę ebo kolesaga me tagalogobeo. 
Nago te naga sipsip dabe me te meme bugagia tonaluao, 
magi baso meni, te nago mone te sesemane me elalugobeo, tama te kingo hani me te sesemane sesabi elama, me bidigobeo. 
Te nosai bobobage igulubo sogo da, teda nago te naga kibu dabego tuabo nai togolama te sisinao. Tama te gesi nosai hogonu ma pedalubo dao. 
Nago te sipsip dabego nisi selama, tama naga gudabo ugwa dabe nigabo te sao. Tama nago te meme mebade mone selama, te tǫ abelainu yao. 
Tama nago te naga meme ame pę dabe siyu, tama te naga dali, te nago we wai dabe dali tumainu yao, tama nago te naga sę ebo we dabeba me mayu ebo usu yaibao. 
