﻿Bugagia Bidibo Kolesagade Po Asęai Buku.
31.
Godigo te sęgę yai po te king Lemuel aga idabolo olama, tama agai te po te kingba pusali. 
“Eno ogwao, ena digi nage ame nani, tama eno nage wei homu mu ebao. Eno Godiba hanalubaso, tama nage enaba mawai dao. 
Nago te we dabede gagali me isiąyu, tama nago bomo tigidali me tagalabuo. Magi baso meni, augwaligo te king dabe me dolomainu ebo dao. 
Lemuel, te king dabego te wain wę tulamuo. Ma, augwaligo te bomai ąį bia tuabo homu bomonama ebaso da, te dwai mu dao. 
Tiyu, augwaligo te wę tubaso, tama augwa te bomai po dabe, me tama augwaligo te doloba pai kolesaga te magi nai meni yai bidibolo ebo, te kolesaga dali homu kone tua peyu, tagalabuo. 
Te bomai ąį me wain ąį te isabo homu ebo bidigo dabego tubo ąį, ma te genuai sęgę elalubo bidigo tubo ąį dabe dao. 
Te augwa tuabo homu wei ebaso da, augwa te tumainu eyu, tama augwa te magi nai meni yai bidabo te homu kone me isiąyu, tama augwa te genuai sęgę elalumainogo eyu, te tama tebo dao.” 
“Te bidi dabego augwa sęgę po pusisąbo bidi dabe te nago augwali tonaluyu, tama nago te augwali tau sabo po weyu yao. Tama nago te magi nai meni ebo bidi dabede te po tų ebo tau sabo po weyu, te doloba pai kolesaga ebo sę bomo yao. 
Tama naga digi te po tų odobo sogo, nago te doloba pai kolesaga eyu yao. Tama nago te magi nai meni yai te hobedagia bidibo bidi dabe tau sao,” te po wali. 
Te bidigo te wiegi yai kolesaga mu ebo we sabo homu ebo da, agawe? Teda aga gegebo sę dene mu yaibao. Te tobage tiwai wego te tobage te gasa sawi yai masigi dabe te aiyaba elalubo tiwai ebo dao. 
Te tobage we aga bidigo te wego wiegi yai kolesaga sesemane sogo wali pabo te bugagia koneaibao, agai tede homu si ebo menio. Tama wego aga tau siyu, te aga doado bage hauwa elalubo dao. 
Te wego te wiegi yai kolesaga naga aga bidiba sesemane sogo ebo dao. 
Te agai te sipsip nisi dali, gasagi yai nisi dali siyu, tego haniani hobi nigilama, tama agai te tobage haniani ugwa hobolobo sę eyu, te aga wiegi yai homu pemene ebo da. 
Te aga wai dali, aga bidi dali, augwa te tobage nai hauwa elalubao, magi baso meni, aga te nai sigi peyu, te digibulu mu peyu ebo dao, te genuai sip dabego ebo tiwai gilama tama tibo dao. 
Te wiegi yai wego da, te be posisąbadi digi hodaluama, tama aga wai me bidi te nai ulama, tama aga tau sę ebo we dabe sęba dobabo dao. 
Te bomai wego da, te agai abelainu ebo tǫ te hasia bolo bugagia osola sulama da, tama nosali aga bisnis yali sęde te mone selama, tama te gesi ni wain wai abelama bulaibao. 
Te deli sogo aga hagela me ebeo. Aga te bomai we me ebaso, tama aga bomo deliba sisina siyu, tama te sę yaibao. 
Te aga lam sole habude te wel ąį pągąnaluyu, te ula edubao, tama aga sę ela pidubadi te be huli tomoba mu igi peyu, te aga dobu si ebo bisnis sę ebo te bugagia ebo subo sogo tiaibao. 
Te tobage tiwai wego te aga digi te hobi dabe nigilama, tama te ugwa dabe hobolobo dao. 
Te agai suali, te bidi dabe te doado bage menia siyu ebo sogo, agai augwaliba te doado bage mabo dao. Awe, agai te nai sǫą pai bage tau sabo dao. 
Te talua ge tulubage tulubadi digi, agai te aga wai puluba me bidide te homu si me isiąma te sę yaibao, magi baso meni, agai te augwaligo ugwa dabe te wiegi yai name ugwago nigibo dao. 
Tama aga digi te aga bede selama piabo blanket dabe me nigaibao. Tama agai te wiegi yai tedela yai name ugwa, me te mama yai name ugwa wiegi yai me selama, tama aga gudubo ugwa dabe nigaibao. 
Te bulude bidalubo polalubo bidi dabego te genuai nogi agai bidiba mawai. Tama aga bidi te polalubo bidi dabe bidalubo digi te aga me te polalubo bidi bidibo dao. 
Hauwa sogo te wego te wiegi yai ugwa dabe me, te kukulu dabe me nigiyu ebo dao, tama te bisnis bidi dabe aselama, abelagasu ebo dao. 
Te aga sę eyu, mone sabo te genuai nogi te aga ugwago sę tiwai elaluyu, tama aga bomo elaluali. Agai te agaba nosali pedelabo sęde te homu si me isiąwaibao. 
Agai te we bidi ola mayu, agai po dua digi naga wabo dao. Tama agai tigidali po wabode te wiegi yai homu me kolesaga pedaluyu yai. 
Te aga bede doado bage dali, sę ebo dali si tonalubo sogo, aga hagela me egobeo. Menio. Agai sę bomo eyu, tama wiegi yai sę ebo dao. 
Te wego wai dabego te we bidi dabego gesabidide augwa idago ebo kolesagade dwagi yai po wabo dao. Tama aga bidigo me aga nogi ugwaba mu siyu, tama po wali, 
“Te da bidibo bulude te wiegi yai kolesaga mu ebo we elalubadi, tiali goli nago augwali aiyaba elaluama, te nage uganu mu ela holalio.” Aga bidigo te po wai. 
Te we me deligo dabolo te pusu yai po waibao, tiali goli agai kolesaga te gasagi yai tedali elaluai. Te gasa sawi yai we mu subo, aga sesemane sogo te tiwai me bidigobeo. Tiali goli, Genuai Bidide wi eyu, aga dologode bidibo wego nogi te dago ugaba sabo usu yaibao. 
Dago te wego ebo wiegi yai kolesaga, me te agai ebo wiegi yai sę ebo, tede te dago homugo koneama, tama agaba genuai nogi mao. Te tigidali we bidi te sisinibo pesageba aselama, tama aga nogi uganu sao. 
