﻿Kolesaga Koneai Bidigo Pusali Po Elalubo Buku.
11.
Nago sę tigidali pedai badu ebaso, te nosali nago yali sęgo dwagi yai du walaibao. 
Nago konebe, mena sogo dwai sę e tǫba pedelabo elalubao, tialima nago mone sabo bisnis sunumi te nogo a naga olama, me badu si, ma a naga olama, me badu sela, te badu munama elalumainao. 
Te haowade ąį pągąna pobaso da, teda tulubage te tǫba tulaibao. Te ni degali saut badu elalubaso, me not badu elalubaso, te tagalao, teda aga te ni degali pesagede munalubo dao. 
Nago te wali me tulubage wiegi yai asobo tonalubo sogo yaibaso da, teda nago te gi sę elama, te inawai nai sela tugobeo. 
Godigo tigidali nai nigali. Tialima, te waligo wali pabo tų menadewe, te dago konebe. Ma, magi elama te gesi wai bǫų te idago haliga tomode bidibo ula elaluali, te me dago konebeo. Te tiwai naga te Godigo ebo sę dabe te dago koneabo usu meni ebo dao. 
Nago te nai wai hani te kigamu meba wasilama buliyu, te pio meba wasilama buliyu yao. Nago konesiąwaibao, te nago kigamu wasilama bulali nai wai, ma te pio naga bulali nai wai bugagia holobowe, ma te nani si dali bugagia holobo, te konegobeo. 
Ula te wiegi yai nai dao. Te dago giliga ula sulama, dago wiegi yai pemene ebo dao. 
Da tǫde bidalubo tigidali kibu bede dago wiegi yai pemene yao. Te dago kibu be hauwa bidali digi, tagalao, dago te sęde homu kone gegeda paligio. Te da kibu be hauwa mu te da isali bidi dabego hulia sai bulude bidaibao. Tigidali sę nosali pedelabo elalubao, te augwali olo nai dabe tiwai naga dao. 
Dage gesi ogwa bidi dabe, dagego te dage gesi tigi elalubadi, wiegi yai pemene yao. Dagego te duga homugo godolo homu wali pobao. Tiali goli, dua da, Godigo dagego yali kolesaga te agai po tųde dagalaibao. 
Te dago gesi bidi bidibo te sesabi elama, bobage sogo mu bidigobeo. Menio. Te olo nai tiwai elalubao. Tialima, dageba te nai dabego sęgę mobaso, te dagego homu hauwa igio. Tama dagego te duga tigiba dene mabo kolesaga wali pelamo dao. 
