﻿Profet Aisaiago Po Asęai Buku.
1.
E bukude te profet Aisaiago po elalubo, aga te Emosgo ogwa dao. Te nade ebo tiwai Genuai Bidi God agai po te Aisaiabolo mani, te Aisaiago te Juda we bidibolo, me Jerusalem we bidibolo pusa momainu. Aisaiago te po te tuni bidi king Usia, me Jotam, me Ahas, me Hesekia, tama bage deli deli te Juda dabe tuni bidi bididubadi pusai dao. 
Dagalu, olo saganama, odao. Tǫ, nago me odao. Magi baso meni, Genuai Bidigo te po wai dao, “Te wai dabe eno tonaluama, genuai yali. Eno augwali bugagia negali. Tiali goli, augwali da, augwaligo eno po sela sąbo dao. 
Te kau kibu dabego augwa aya konebo dao, me te donki kibu dabego augwa ayago nai mabo pesage konebo dao. Tiali goli, eno Israel we bidigo kolesaga menio. Te kau kibu de donki kibu sigo kolesagago augwaligo kolesaga edelalio,” wali. 
Tega, te we bidi dage dolama, dagego kolesaga me mu doali. Tigidali sogo dagego dwai sęgę sabo dao. Te duga dwai sęgęgo dage aiyaba kegebo dao. Dage Israel dabego duga Genuai Bidi tagalai dao, aga te Dwagi Yai Doloba Pai Kolesaga Naga Ebo God dao. Tama dagego aga tudi ola manio. 
Magi baso dagego Godigo po me sela sądubawe? Dage tigidali sogo dene sabo hagela meniwe? Israel, nage te bidi me bidi dabego elai bidi tiwai dao, te agai tigi sese mu dolama, bomo mu meni yai. Agai tobolu keni kenigo pągąna pai. 
Te kenigo agai toboludu gagalama, sągąba usu nigi pali, tama agai tigiwali olo me elalubeo. Te haniani kenigo agai tigide pągąnama, tama agai tigi deda pali. Augwaligo agai tigi penama agai keni sįsibeo. Te augwaligo madasin me pilibeo. 
Awe, te boi bidi dabego dagego bulu polo dola silai dao. Tama augwaligo dagego hanu dabe ulali dao. Te dagego tonalubadi, augwaligo dagego gi nai dabe sai dao. Te gasa bulu bidi dabego bulu mu dolama, tama dagego tǫ olo mu elalubao. 
Hobedagia! Jerusalem deli naga augwaligo tagalali. Agaduba deli naga elaluyu, tama bomo mu meni. Aga te bidi dabego olo gi be sę yai ąǫ elalubao, te bobi gide sę yani dwasianu be tiwai naga elalubao. Aga te boi bidi dabe bagua sai hanu ąǫ elalubao. 
Ma, Genuai Bidi Tigidali Bomo Elalubo Bidigo da meba bidimainu sula tagalisąma menigi sogo da, mu tama, teda da polo dolama siligi dao, te hanu Sodom de Gomora si dolali yali tiwai gilama, polo dologi dao. 
Dage tobolu bidi dabe, me dage Jerusalem we bidi dabe, dage te bidi dwai dabe te hanu Sodom de Gomora side polobadu bidali bidi dabe tiwai mu tama dao. Megi da, dagego olo bugagia munama, tama Godigo bomai po odao, dago Genuai Bidi. Agai dabolo mawainu ebo po bugagia odao. 
Genuai Bidigo te po odu gebao, “Dagego homugo, dagego haniani ofa enabolo mabo te eno godolo ebawe, homu ebowe? Mu menio. Dagego te sipsip kibu dabe hauwa dagego seselama, te isigo ula silabo ofa yainogo ebo dao. Tiali goli, ena mu hagela mu yali. Tama eno dagego dwagi yai genuai dagego sesebo hasa ili dabe eno godolo ebeo. Ena te kau kibu omai kaneme me, me te sipsip kibu gǫųgo kaneme, me meme kibu omai kaneme dabego enabolo usu yai dao. 
Magi baso meni. Te dage lotuba asobo sogo, dage dua aselama, eno obo tomoba asobo menio. Menio. Dage asobo yaide, duga olo bilagasu, kulukulu genuai wainu asobo dao. 
Dage odolali bomai sę elama, ofa nai dabe enaba sesigimio. Magi baso meni. Eno augwalibolo hagela yai dao. Tama me, dagego ulubo pauda denami eno gunide dwai denami pedalobo dao. Eno dagego gesi poluade, me Sabatde, me gasa lotu dabe dagego wabo eno me subo, hagela ebo. Magi baso meni. Duga dwai sęgęgo duga lotu dabe dolali. 
Eno dagego te gesi poluade lotu wabo, me gasa bodolu mani lotu dabe dagego wabo eno godolo mu menio. Te nai dabe tigidaligo enabolo sęgę mabo. Tama eno tolobo mu hagela ebo. 
Te dagego nogo ugwa selama, gedu haluasa po enabolo wabo si da, teda eno dage sugobeo. Tagala, dagego gedu haluasa po hauwa sogo obadi, me teda ena olo palia saibao. Magi baso meni. Te bidi dabe dagego elali bidi dabego kaneme dagego nogode me daganalubao. 
Eno dage suali mu doali. Dage wę paugi pįa, tama duga digi duga pęnama, tama dwai sęgę dage elalubo sela sąyao. Tama dwai sę ma igio. 
Te dwagi yai doloba pai kolesaga ebo kolesaga konea sao. Tama te tobage dwagi yai kolesaga ugwa ela holomainu yao. Tama eyu, te gasa bidi dabego aiyaba elaluali bidi dabe tau mao. Te po tų ebode te tiana wai dabe bugagia tau sao. Tama me te wilawe we dabe te po tų ebode tau sao. Te tama bidi dabego augwali dali dwai sę ebaso da, dagego augwali tau sao.” 
“Odao. Da deliba sisinama, po mimainao. Dagego sęgę hauwa elalubadi me, tagala. Te dage te nala ugwa tiwai bidai goli, hoda naigo polo dolai dao. Ena Genuai Bidi, eno te po obao, eno te dage te tedela ais tiwai ma ilaibao. Awe, te hoda nai mu dąų wai goli, eno dage te tedela yai sipsip kibu nisi tiwai ma ilaibao. 
Ma, dagego eno po mu odama, tama te homu kolesaga wali peyu da, teda dage bidibo me bugagia bidiyu, me duga gide bulubo wiegi yai nai dagego tuyu, bidaibao. 
Tiali goli, dagego hagela elama, eno po sela sąyani da, teda boi bidi dabego dage ela muagasaibao. Ena Genuai Bidi, eno po polo wali.” 
Mena tama te pedalaliwe? Hanu Jerusalem, polobadu nago eno po wali dolo pai dao. Tiali goli, megi da, nage penani we gaga wali. Tega! Polobadu nagede bidali bidi dabego te po tų dodolobo kolesaga dolo yai dao. Awe, polobadu nage te dwagi yai doloba pai kolesaga ebo bidi dabego pągąwai dao. Tiali goli, megi da, nage bidi ela mabo bidigo pągąyani. 
Polobadu nage dwagi yai silva tiwai da. Tiali goli, megi da, nage yaba yai kapa tiwai dao. Polobadu da, nage pusai wain tiwai goli da. Tiali goli, megi da, nage olo wę tiwai dao. 
Jerusalem, nago genuai bidi me, tobolu bidi me, augwali te po odisiąwai dabe bidiyu, tama nai wi sabo bidi dabego abagi dao. Tigidali sogo augwaligo te mone pesą eyu, augwaligo te bidi dabe augwali dali mone dabe sainogo ili po wabo bidi dabe tau sabo homu ebo dao. Tama te po tų odobo sogo, augwali te tiana wai dabe tau sabo homu ebo menio. Tama me, augwaligo te wilawe we dabego homu sęgę ebo dodolobo odama, dodolabo homu ebo menio. 
Tama tibaso, Jerusalem, Godigo po dabe megi odao. Tigidali Bomo Elalubo Genuai Bidi te Israel dabego boma pai God dao. Agai te po wali, “Ena Genuai Bidi, eno te ena boi bidi dabebolo dwai dene wei ponaibao. Usu dao. Tama augwaligo enabolo sęgę ma magobeo. 
Jerusalem, eno bomai sę me deli nagede yaibao, te nago dwai sę yali dodoliyu, eno nage posolai isigo ulaibao. Te bidi dabego te kapa nogi silva iside ulama, tama dwai pobele bage dagana saibaso, te sela sąwainu isi ulubo tiwai yaibao, te posolai iside. 
Tama eno dwagi yai tobolu bidi me, po tų dodola mu odabo bidi dabe ena digi dąį ilaibao, te polobadu nago bidali bidi dabe yali gilama. Tama bidi dabego nage nogi te doloba pai kolesaga ebo hanu dao waibao. Tama Godigo po dolo wali pabo hanu dao waibao.” 
“Genuai Bidigo Jerusalem bugagia doloba pai kolesaga dali aselama, tama te bulu ma dobola saibao. Tama te dwagi yai kolesagade naga agai Jerusalem we bidi ma oda saibao, te augwaligo augwa yali te dwai sęde ge neyu, homu begelama, tama augwa yali dwai sęde hobede ebaso. 
Tiali goli, te we bidi dabego po sela sąnama, dwai sę elama, God tudi ola mabo we bidi, agai augwali dolama, tama agai augwali mu silaibao.” 
“Magi baso meni, dagego genuai ni silide te tibo god dabeba lotu olama, tama tede dwagi yai homu eyu bidai dao. Tama me te gi elama, tama lotu wabo digi dao olama, hage yai dao. Tiali goli, dage te yali kolesaga dabede hobede elama, tama hale genuai mu yaibao. 
Te dage te genuai ni kali sasilama, mobia pabo tiwai yaibao. Tama dage te gi wę meni yai gi tiwai dage tama tiaibao. 
Te kala sasia pai da, te isi deli sogo tama dela pabo dao. Tama te tiwai sę te doado bage hauwa elalubo bomai bidi dabede yaibao. Augwa digi dwai kolesaga ebogo augwali deli sogo tama dolaibao, sia saibao. Tama te sogo augwali tau sabo bidi meni yaibao.” Genuai Bidigo te po wali. 
