﻿Aisaia.
5.
Eno ena abagi me delide balia po waibao. Te baliago aga wain gi po pusali. Te ugwadu bulu du dwasianu mede tǫ ili hauwa me elaluali. Tede eno abagigo wain gi tede yali. 
Agai tǫ elama, tama masigi tigidali sela sąwai dao. Tama dwagi dwagi yai wain nologo bulali. Te gi tomode agai be sęani, te aga tede bidiyu, te gi tonaluainu. Tama te masigi pesage me delide agai te wain du mimiabo digi te nai nigali, tǫ dedage nigali. Tigidali sę silibo si, agai te homu yali, ‘Eno ni wain du bugagia mu walaibao,’ homu yali. ‘Tama wain du pusu mu yaibao.’ Tiali goli, meni. Te ni dabe du bugagia me walobeo. Tama te du dabe dwasianu mu elama, tama pedauwalide ha yali. 
Tama tibaso, eno abagigo te po wali, “Dage Juda we bidi, me Jerusalem hanu we bidi, dagego enabolo walao. Te dego tiabo sę yaliwe? Enawe? Ma, eno wain gigo dawe? 
Eno koneani. Eno dwagi yai sę yali, te gide dwagi yai wain du walaiba weyu, tiali goli magi baso mu te wain du dwasianu mu walama, tama pedauwalide ha yaliwe? Te gi tonalubo sę me deli te eno bugagia dolo ebewe? 
Megi da, dagebolo ena wain gide yaiba homu yali po dagebolo eno pusa mawaibao. Te eno wain gi obo hųgia sąwaibao. Awe, te obo dolama, tama te bulu hasa dabe te gi tomoba pelama, tama te wain ni tulama, dolomainu yaibao. 
Te eno te tǫ dolama, tama busi holama, nosai holiyu, tama te sesane ni dabe holama, te gi halua somainu yaibao. Tama eno te wain ni ma tonalubo sę ma egobeo. Te me eno te gi tǫba tulubage me tulamo olama, habu selaibao,” eno abagigo te po wali. 
Te Juda we bidi, me Israel we bidi, te Genuai Bidigo Tigidali Bomo Elalubo Bidigo wain gi tiwai dao. Agai godolo mu elama, agai augwali bugagia mu tonalubo dao. Te we bidi dabego wiegi yai doloba pai kolesaga naga emaina homu ebo dao. Tiali goli, augwaligo dwai kolesaga ebo dao. Agai homugo augwaligo gasa we bidi dabe dali wiegi yai kolesaga emai homu ebo dao. Tiali goli, augwaligo gasa we bidi aiyaba elaluama, tama augwaligo augwali dali boi bidi homu kolesaga ebo dao. Tama te aiyaba elaluali we bidi dabego i wabo agai odali. 
Dage te tǫ dabe, be dabe hauwa abelama, duga naga pesage hola sabo bage, dage dolaibao. Te tamadi tama dagego tigidali tǫ me, bulu me, sese sela silaibao. Tama gasa bidi dabe meba bidabo bulu menia saibao. Tama dage naga tama bidaibao. 
Eno odali, Genuai Bidi Tigidali Bomo Elalubo Bidigo te po wabo eno odali, “Mu tama, te genuai dwagi yai be dabe dolama, te olo elaluaibao. Awe, bidi dabe te wiegi yai be dabe me bidigobeo. 
Tagala, augwaligo wain gi hauwa bulu badi goli, me wain du dabe hauwa me walogobeo. Tama augwaligo dwasianu wain ąį naga nigaibao. Tagala me, augwaligo nogo si begi te wit ge augwaligo te gide bulai. Tama te wit ininama, augwaligo togolama, te begi deli digi bueibao,” Genuai Bidigo te po wabo eno odali. 
Dage dolaibao. Dage te kigamu hulide hodaloama, wain wę tuyu, te haniani bomai wę tubo bage, dage dolaibao. Dagego te wę tulama, polodubadi be huli sesabi edelebo dao. 
Te nai daa tuyu, wain wę tuyu, me haniani musik gitago eliyu, genagego eliyu, hąbidigo eliyu ebo, te dagego mu koneani. Tiali goli, Genuai Bidigo yainu ebo, te sę dabe dagego munu me konebeo. Dagego te sę dabe te olo nai dabe da homu ebo dao. 
Tama tibaso, Genuai Bidigo te po wali, “Mu tama, eno we bidi dabe dagego ena konebo hagela yali. Tama tibaso, boi bidi dabego dage gasa buluba me kalabus elama, odasa paibao. Te genuai bidi dabe nai menia saibao. Te olo we bidi dabe te ąį nogone eyu bidaibao. Tama augwali mu dolaibao. 
Megi dage wiegi yai homu elama, gana paide dagego daa hauwa mu te tubao. Tiali goli, mu tama, te gų pagede te kele ą olama, tama te Jerusalem bulu genuai bidi dabe, me olo we bidi dabe dalainu polo no munalubao,” Genuai Bidigo te po wali. 
Te tigidali we bidi hale mu yaibao. Tama te we bidi augwa digi augwa nogi ugwa sabo we bidi dabe augwali nogi mu menia saibao. 
Te agai doloba pai kolesagago Genuai Bidi Tigidali Bomo Elalubo Bidigo te we bidi dabego bomo aiyaba elaluaibao. Tama aga deli naga genuai nogi saibao. Tama agai te dwagi yai doloba pai kolesaga naga ebogo agai te we bidibolo ola mawaibao, aga te tedali gasagi yai mu dao. 
Te hanu dabe sese dolaibao. Tama nosai dabego bulu mesega saibao. Tama sipsip kibu de meme kibu sigo te mone hauwa elaluali bidi dabego be elaluali pesageba nosai tuagasaibao. 
Te dage dolaibao. Dagego te gasa bidi dabe ili po walama, sęgę te soba. Te sęgę dabe dage tigi dagana selama, tama dagego sela sąbo usu egobeo. 
Dagego te po wabo dao, “Dago odobo Israel dabego God, aga te Dwagi Yai Doloba Pai Kolesaga Naga Ebo God dao. Ma, agai dabolo magi sę me yabo homu ebaso da, teda agai polo emainao. Tama tibaso, dago sulama, tama dago aga homu kolesaga koneaibao. Awe, agai te sę polo emainao,” wabo. 
Dage dolaibao. Te dagego haniani nai hasegelama, tama te po wabo dao, “Dwai kolesaga te wiegi yai dao, te wiegi yai kolesaga te dwai dao,” wabo dao. Me, dagego te po wabo dao, “Te hulia sali te ula dao. Me, te ula ebo te ma huli sali dao,” wabo dao. Tama me dagego te po wabo dao, “Te ha ebo nai te pusu ebo, ma te pusu ebo nai te kelede ha ebo,” po wabo dao. 
Dage dolaibao. Te dage bidi duga homugo dagego kolesagago gasa bidi dabego kolesaga aiyaba elaluali dao homu ebo bidi dabe, dage. 
Dage te bomai wę tubode genuai nogi elalubo bidi dabe, dage dolaibao, te dagego bomo de kolesaga si da, te haniani wę sįsįbo delide naga dao. 
Te dagego po tų odobo sogo da, dagego te augwaligo nogode te ili po wabo po tų abelebo masigi dagego selama, tama te dwai sę yali bage olo taga palobo dao. Tiali goli, dagego te po sęgę meni yai bidi dabego po bugagia osola subo menio. 
Tama tibaso, dage te ni sasia pabo tiwai elama, tama te ni pedali mobia pelama, tama te ni yabe dabe tau elama, tegalubo tiwai yaibao. Te dwai sę dage tigiba polo tama pedalaibao, te isigo nosai delama, silibo tiwai tama yaibao. Magi baso meni. Dagego te Genuai Bidi Tigidali Bomo Elalubo Bidigo bomai po sela sąbaso, dagego Israel dabego God tudi ola mabo. Aga te Dwagi Yai Doloba Pai Kolesaga Naga Ebo God dao. 
Tama tibaso, Genuai Bidi agai aga we bidi dabe dali sębę eyu, te sębę posolo mu ebao. Tama megi da, agai nogo ugwa sagua selama, dolainu no munalubao. Agai nogogo deli sogo elebaso, te tigidali tǫ dabe bulu du dabe elebaso, memenege elama, bulu du dabe aluasa dulaibao. Tama we bidi hauwa isila paibao. Tama augwaligo tigi dabe te hanu sunumi dabede olo pobele bage dabe munalua pabo ąǫ yaibao. Genuai Bidi agai tama tiaibao. Tiali goli, te tama tibogo Genuai Bidi agai sębę siligobeo. Menio. Agai nogo me ugwaba me dodolalubao. 
Genuai Bidigo te digibulu ami bidi dabe aga we bidi dolagasomainu i wabo sa muaibao. Awe, te digibulu mu bidibo bage asomainu eyu, agai ho bomonama waibao. Tama te ami bidi dabe bomona togwa asaibao. 
Te ami bagego bidi dabe da, te bomai bidi dabe naga dao. Te augwali me deli sągą dili telega elama, tulaluainu yai me menio, o te agai gedu godege magana pai me menio. Augwaligo kibu waligo te gudali ugwa bugagia kęnama, asaibao. Augwaligo bomai su sągą sendol guda sesa paibao. Te togwa pabo ąǫ isąwai me gudugobeo. 
Augwaligo ene da, mu poa pai. Tama augwaligo enesigi dolama, tama enabo no sealubuo. Augwaligo hos dabe da, boma pai mu dao. Tama te hos dabego sągąde kapa dabe te dila pai masigi tiwai, tama togwa pogobeo. Augwaligo karis dabe bomona mu pabo dao. Tama te karis wili dabe da, te wali ebo ąǫ ebo dao. 
Te ami bidi dabego te hai wabo te laion yowigo bulu hasa ela munama, dągą wabo tiwai waibao. Augwaligo boi bidi dabe toulama, tama sela paibao, te laion yowigo bulu hasa elama, sela pabo tiwai yaibao. Tama bidi mego augwali ma sogobeo. 
Tama te sogo boi bidi dabe aselama, Juda bulu dolagasaibao. Tama augwaligo kulukulu genuai mu waibao, te tamu wę holama, wę kemi saneba asiyu, u wabo tiwai yaibao. Tama te bidi dabego te buluba tonagasobo si da, teda augwaligo te bulu sisi pǫgo mesega selama, giliga ula sininai suaibao. Tama te bulu mu hulia sai suaibao. 
