﻿Aisaia.
7.
Te Ahas te Jotamgo ogwa, aga wąį Usia, aga te Juda dabego tuni bidi bidibadi, hwįbo sogo pedalali. Resin, Siria bulu tuni bidi, me Peka, te Ramaliago ogwa, Israel dabego tuni bidi, augwali sigo Jerusalemba hwįgi pali. Tiali goli, augwali sigo te hanu sabo usu ebe. Te hwįbo Jerusalemba sabolisąma ebadi da, 
te Juda dabego tuni bidigo te e tama po odali, te Siria ami bidi dabe te Israel bagego tǫba polo asai dao wabo po odali. Tama tuni bidi aga we bidi hani dali augwali wi mu eyu, haliga midigi sali, te bomai waligo te ni silide elalubo ni yabe dabe memenege ilibo tiwai yali. 
Tama Genuai Bidigo Aisaiabolo te po walali, “Naga ogwa Searjasup oda selama, tuni bidi Ahas sugi pao. Dage te wę sabo wę gamia Jerusalem ugwa badu piąo. Tama dage sigo te tuni bidi te name ugwa wę telabo pesageba pabo genuai sunumide te tuni bidi tiąba pao. 
Te tuni bidibolo aga homu dąų olama bidao, tama te haniani po dabego agai homu elalumainu elamo dao po walao. Aga yaide dua bidama, tama te tuni bidi Resin aga hani dali, me te Israel dabego tuni bidi dabe dali, wi igio po wao. Te tuni bidi sigo sębę te isi pąde sula sainu dabo tiwai ebao. Te sula sainu hano naga holobo tiwai te ebao. 
Te mu tama, te Siria dabe augwaligo te Israel dabego tuni bidi dali augwaligo po mia sali, te Ahas aiyaba elaluaio olama, 
augwaligo te po wali, augwali te Juda buluba hwįagasaibao po wali. Tama we bidi wi ilama, tama te bulu selama, tama te bidi Tabelgo ogwa tuni bidi bidimainu sa muaibao, augwaligo te po mia sali,” wali. 
“Tiali goli, ena God, Genuai Bidi, eno te po te obao, te nai dabe te me pedalogobeo. Mu tama, augwaligo te sę ebo usugobeo. 
Magi baso meni. Te tobolu bidi Resin agai bomogo naga te genuai hanu Damaskus tonalubo dao. Tama Damaskusgo bomogo te Siria tǫ kantri tonalubo dao. Tiali goli, te Resin da, te aga bidi naga dao. Te tiwai me, Ramaliago ogwa Peka agai bomogo naga te Israelgo genuai hanu Samaria tonalubo dao. Tama te Samaria hanugo bomogo te Israel tǫ pedai kantri tonalubo dao. Tiali goli, te Peka da, aga bidi naga dao. Te 65 kibu be tomode te Israel bulu dolama, tama te we bidi sese besela pelama, tama augwaligo nogi mu tama sia saibao. Tama ma, te Juda dabe dagego eno pode homu dąų wasiąma yali da, teda dage me bobobage sogo me bidigobeo,” Genuai Bidigo te po wali. 
Tama Genuai Bidigo Ahasbolo gasa po me wali. 
Agai Aisaiabolo te Ahasbolo te po wao po wali, “God naga Genuai Bidibolo hanalu wao, te nagebolo bidigo gedugo susiąwai bomai sę me ola momainu. Nago agabolo mena tama bomai sę, me nago suabo homu ebo sę me, nago agabolo hanalu wao. Ma, nago te bomo yai sę te bidi gų pagede suabo homu ebaso me, o ma nago dagalude bomai sę pedalobo suabo homu ebaso, o ma menade me naga homugo godolo me ebo digi te tobage sę suabo homu ebaso da, nago Godibolo hanalu wao, tama Godigo nage ola mawaibao,” wali. 
Tiali goli, Ahasgo te po wali, “Menio. Te eno agabolo bomai sę me suainu me hanalugobeo. Eno Genuai Bidigo bomo usu sabo hagela ebo,” wali. 
Teda Aisaiago po wei ponoyu, te po wali, “Dage tuni bidi Devitgo wąį dabe, dagego bugagia odao. Dagego ebo kolesagade da te bidi dabego dage hagela mu yali. Tama megi ma eno Godigo tonalubo kolesaga te dagego usu sogowe? 
Teda Genuai Bidi aga digi dage bomo yai sę me deli ola mawaibao. Te sę da e tama tiwai dao. Te gesi wegi me tabi elama, tama agai ogwa ame naibao, tama agai nogi Emanuel poaibao. 
Tama nosali te ogwa aga te homu kolesaga elama, te mena kolesaga dwai yaliwe, ma mena kolesaga wiegi yai yaliwe wabo sogode, tama te sogo agai hani bunu ąį, me sis augwaligo kau kibu ame pęgo, me sipsip kibu ame pęgo nigai nai, tuaibao,” wali. 
“Ahas, megi da, nago te tuni bidi side nage wi ebo dao. Tiali goli, augwali sigo bulu dolama, tama augwaligo tǫ olo elaluaibao. Tama te nai sę da, te ogwa wai bǫųgo mena kolesaga dwai yaliwe, ma mena kolesaga wiegi yai yali homu konesiąbadi, te sę yaibao. 
Tama Genuai Bidigo dwai sogo taga palama, tama nage me, naga we bidi me, naga ayago togali seseba taga palaibao. Te sęgęgo da, te polobadu yali te sęgę mu edelama, mu yaibao, te Israel dabego Juda tagalama, taga palidu gagalasa, megiba usu nagasali. Te sęgę e dao, Genuai Bidigo Asiria tuni bidi Juda buluba sela asaibao,” Aisaiago te po wali. 
Tama te sogo Genuai Bidigo Isip dabeba ho obaso, augwali augwa bulu tagalama, tama augwali te dinai sibi asobo ąǫ yaibao. Tama agai te Asiria haniba ho wabo si, tama augwali te mano sibi isidigi asobo tiwai asaibao. 
Tama augwali te bulu Juda tǫde mu pągą yaibao. Tama augwali te tigidali dwai pesage me, masigi dedage me, dwagi yai nosai elalubo pesage me, sesane yai bono elalubo pesage me, mu usu naibao. 
Tama te sogo Genuai Bidigo te Asiria tuni bidi te wę Yufretis u badu oda saibao. Aga te Genuai Bidigo nisa tiwai elama, dagego nisi poawaibao, te dage Juda dabego tigi nisi. Agai dagego penane nisi me, tobolu nisi me, tigi nisi me, tigidali agai poawaibao. 
Tama te sogo da, te boi bidi dabego dagego kibu bulmakau dabe, sipsip kibu dabe sese ela silaibao. Tiali goli, bidi me deligo kau kibu deli bidiyu, me meme kibu si me bidibaso da, 
augwaligo ame pę hauwa mu nigilaibao. Tama agai te ame pę selama, tama te tubo nai sis geselaibao. Tama te dwasianu we bidi bidibo bage augwaligo te sis dali, hani bunu ąį dali si tuyu yaibao. 
Te sogo da, dagego gi dabe dola silaibao. Megi te dagego dwagi yai wain ni gi deli delide te 1,000 wain ni bono elalubo, tama te ni dude dagego masigi 1,000 kina te sabao. Tiali goli, te dwai sesane ni me, sesane bono si holama, te ni mesegelaibao, te dwagi yai gi dabe, tama bidi dabe olo bilibo wi yaibao. Ma, bidi dabe augwali teba poloba painu da, teda augwaligo enesigi me selama, hasa kegegi paibao. 
Megi da, bidi dabego te dwasianu bulu dude dabe te augwa gide nai sabo dao. Tiali goli, te ni sesane yai ni dabe holiyu, bono dabe holiyu elama, te gi mesegelaibao. Te bidi dabe augwali te sesane dabe wi ebaso, teba pelama, gi dabe ma egobeo. Menio. Te da, augwaligo te kau kibu de sipsip kibu naga te pesageba bilama, nai teba gegegi pomainu sula tagalaibao. 
