﻿Aisaia.
8.
Genuai Bidigo enabolo walali, “Te po tede asęabo genuai nai me sao, tama ugwadu nago te po asęao, ‘Polo wi sa, polo sela pa.’ Nago bugagia asęao, tama te bidi dabego bugagia nedebo usu yaibao. 
Tama te po sagoa maiabo bidi si nago sao, te dwagi yai bidi pris Uria, me Sekaraia, te Jeberekiago ogwa,” wali. Tama eno te tama yali. 
Nosali ena ena we dali piali. Tama aga haliga elama, ogwa ame nani. Tama Genuai Bidi enabolo te po wali, “Nago te nogi agabolo mao, ‘Polo wi sa, polo sela pa’. 
Tama te waigo ida aya wabo gagalisiąbadi da, te Asiria bagego te Damaskus de Samaria sigo wiegi yai nai dabe tigidali wi sagasaibao, tama augwa tuni bidiba sela paibao,” wali. 
Genuai Bidigo enabolo te po ma wali, 
“Ena Genuai Bidi, ena te wę Jerusalemde gebo dabo tiwai dao. Aga tigidali sogo dua soabo dao. Tiali goli, te Juda we bidi dabego homugo eno bomo meni da homu ebo. Tama augwaligo homugo te Aram tuni bidi Resin dali, te Israel dabego tuni bidi Peka, augwali sigo bomo te genuai mu dao homu ebo. 
Tama tibaso, ena Genuai Bidi, te eno te wę Yufretis genuai mu ilama, tama te wę gisigiluyu, tigidali pesage mesega sigi pomainu yaibao. Te węgo tigidali bulu mesega saibao. Te wę Yufretisdu gagalama, tama Juda buluba sabolagasaibao. Tama te wę gebo dabo te bidigo dogoni dąį yagasaibao. Te wę Yufretis te Asiria tuni bidigo piksa tiwai dao, te aga ami bidi dabe dali sigo tiwai. Te bage augwali aselama, te Emanuel nago tǫ usu nagasaibao.” Godigo te po wali. 
Bugagia odao, dage te we bidi digibulu bidibo me, pąde bidibo me, dage Israel hani isąwai bage. Dagego hwįabo no muyu, bomo selama elalubo sę yao. Tiali goli, dagego bomo da, toga paibao. Tama dage noma selama, kone tųą pebela waibao. 
Duga homugo mena sę yabo homu yali po duga maiąo. Tiali goli, dagego te sę ebo usu egobeo. Dagego te po da, aga nai meni yaibao. Magi baso meni. God da dali bidibao. 
Eno Genuai Bidigo bomo enaba asobo gagama yali. Tama agai enabolo te po wali, “Nago te we bidi dabego homu dali deli igio. Tama nago augwaligo ebo kolesaga wali pigio,” wali. 
“Te we bidi dabego te po obaso da, ‘Bidi hani mebago Juda bulu dolaibao po mia salio,’ po obaso, nage dali, naga hani dali, dagego te po mu dao homu igimio. Tama me, te we bidi wi elama, noma sobaso da, dage augwali ebo gilama wi elama, noma selamuo. 
Dagego e tama koneao. Ena Genuai Bidi Tigidali Bomo Elalubo Bidi, ena te wiegi yai doloba pai kolesaga naga tigidali sogo ebo God dao. Dagego ena deli naga wi elama, noma sao. 
Ena te we bidigo geme duala sabo bomai pesage dao. Tiali goli, ena te Israel de Juda sigo we bidigo sunumide masigi tiwai bidibao. Tama augwali te masigide sągą dani tuą palama, tama tulaluama, tama augwali dolaibao. Tama te Jerusalem we bidide da, te ena te kę tiwai, augwali tola sabo bidibao. Tama augwali hauwa te kęde tola saibao,” wali. 
Te ena skul ogomani gesabidide eno te Genuai Bidigo enabolo mani po mesegelama, haluali. Tama eno asęnama, tama eno dąį tede ilali. 
Megi da, eno te Genuai Bidi agai yaibao wali te sę ebo deli naga tonaluaibao. Agai Israel we bidiba polo tudi ola mawai dao. Tama agai augwaliba te begela ma tonogobeo. Tiali goli, eno agai bomo deli naga konealuaibao. 
Genuai Bidi Tigidali Bomo Elalubo Bidi aga te Saion bulu dude bidibao. Agai ena te wai dabe mawai dao. Tama agai da te Israel we bidide yabo sę dąį tiwai ilali. 
Te we bidi dabego dagebolo te isai bidi dabego noma dali po wabo we bidiba pao po waibao, tama augwaligo homu kolesaga sigi pao po waibao. Te isai bidi dabego noma dali po wabo bagego augwaligo pedauwalidu pomu po weyu, keledude haniani dwasianu po waibao. Tiali goli, te isai we bidi dabego te bidibo we bidi dabe homu kolesaga mabo usu egobeo. Te tama tiali goli, magi baso mu augwali te isai we bidiba udalama, tama augwalide te kolesaga sabo dawe? Augwali augwa Godiba pomainao. 
Te augwaligo te augwa Godiba pelama, tama agai homu kolesaga siyu, agai bomai po sigi peyu eyąo. Ma, augwaligo tama tisąma yali da, teda augwali hulia sai madi me bididuaibao. Tama wiegi yai sogo me sugobeo. 
Menio. Augwali dwai dene mu saibao. Te augwali genuai homu sęgę mu elama, nasi elama, tama augwali subigila te bulude bilaibao. Nasigo augwaligo haliga sębę mu elama, tama augwaligo augwa tuni bidibolo, me augwa Godibolo dwai po waibao. Te augwaligo dagaluba tonoyu, 
tǫba tonoyu yaibao. Tiali goli, augwaligo dwagi yai nai dabe me sugobeo. Menio. Te augwaligo te dwai sęgę, me dwai sęgęgo augwali tigidali bulude bilibo digi te hulia saigo augwali mesegasa bilibo tiwai yaibao. Tama augwali wi pelama, te dwai sęgę gedelabo sunumi mu meni yaibao. 
