﻿Aisaia.
35.
Te masigi kemi bulu me, tǫ wa pai bulu dali, te augwali pemene wiegi yai mu yaibao, magi baso meni, te sawi mu yai plaua pedelama, te badu mesegelaibao. 
Te wa pai bulu tǫ tonobo te sawi wiegi yai mu yaibao. Te aga genuai i hai dali weyu, genuai pemene yaibao. Te wiegi yai sawi yai nai hauwa mu pedaliyu, te bulu tonobo wiegi yai sawi me tedali eyu, te Lebanon genuai busi tonobo tiwai eyu, te Saron bulu odogo tonobo tiwai yaibao. Te we bidi dabego bomonama tonoyu, te genuai nogi, me te dago Genuai Bidi Godigo wiegi yai au dali elalueibao. 
Dagego te bomo meni yai bidi dabe dąų waliyu, te haliga wi ebo bidi dabe, me didibili ebo bidi te dąų waliyu yao po wai dao. 
Te tabi haliga homu kolesaga te bomo isąwai bidi dabebolo te tiwai po wao, “Dage te bomonama dolalu, te wi me elamuo,” wao. “Te dagego God ma asiyu, dage dobola ma selama, te boi bidi dabe dwai dene mu mawaibao,” wali. 
Tialima, te gedu widai bidi dabego gedu ma pedaibao, te olo degai bagego po ma odaibao. 
Te sągą dwai penelai bidi dabe gesa soyu, posoga palaibao, me te pedauwali pania sai bage te i weyu, pemene yaibao. Te wę dabe te masigi kemi tǫde pedaliyu, te tigidali habuba usu nama paibao. 
Te olo kemi tǫ bulude te sigi ąį tiwai pedelaibao. Te wa pali tǫ dologode me wę ulu pedelaibao. Te polobadu te uni yowi dabe naga te wa pali tǫde bidali. Tiali goli, te sogo te nosai, me awi hauwa tede pedelaibao. 
Tama genuai sunumi me deli te badu elalueibao. Te genuai sunumi nogi e tiwai waibao, “Godigo Tedali Gasagi Yai Genuai Sunumi Digi Dao,” wai. Te God gedude wiegi yai isąwani bidi dabe, augwali te sunumide me biligobeo. Mu menio. Te Godigo we bidi dabego sunumi naga elalueibao. Te homu kolesaga meni yai bidi dabe, te augwali te pąba me pogobeo. 
Te dwai laion me, dwai hasa dabe me, te sunumidu me soagobeo. Menio. Te Godigo augwali ma sali we bidi dabe naga, augwali naga te sunumidu bilaibao. 
Te Genuai Bidigo ma dobola sali we bidi dabe, te augwali wiegi yai pemene dali te Jerusalemba ma asaibao. Te augwa genuai po dagą weyu, balia weyu, te sunumidu aselawaibao. Te augwa wiegi yai bugagia mu dugulalu, te augwa pemene umabo mu yaibao. Augwa te wiegi yai pemene ebo munu me sia sogobeo. Te dene, me haliga sęgę, te augwalide munu ma me elalugobeo. 
