﻿Aisaia.
45.
Genuai Bidigo te tiwai po wali, “Eno te Sairus sa munama, te Persia bulu tǫ kantri king pedalumainu yali, te agabolo eno te gasa bulu tǫ kantri dabe aiyaba elaluama, te gasa kingo bomo dabe silimainu yabo bomo mawai. Ena digi eno te taun obo sunumi dala palama, te Sairus tomoba pelama, te taun somainu elali. Te Sairusbolo eno te tiwai po wai dao, 
‘Te nage pabodu ena polasa peyu, te bulu du pesage dabe me alula tagalama, te doloba pai pesage nigilaibao. Eno augwaligo te brasgo nigai genuai hanu sunumi aluama, te boma pai ba aingo te dąų walali sunumi te me aluama, dala sąwaibao. 
Eno te mone nageba mayu, te hani dabego te bidigo susąyabo pesagede dualali wiegi yai dila pai nai dabe te nageba mawaibao. Tama tialima, te nago koneaibao, ena naga Genuai Bidi da waibao. Te nago koneyu, te Israelgo Godigo naga te nago nogi olama, te nage i wabo da homu koneaibao. 
Te eno sę bidi Israel hani tau sagasao po olama, eno nage i wali, te Jekopgo hani we bidi te ena digi sa muani. Mu tama, nago ena konesiąwai, tiali goli eno nage nogi olama, te genuai nogi nageba mawai dao.’” 
“‘Enaduba deli naga ena Genuai Bidi da, te gasa god me bidibeo. Sairus, nago ena konesiąwai, tiali goli te eno naga te bomo nageba mabo dao. 
Eno tama tibaso, te tigidali tǫ habu pedai we bidigo te tiwai konemainu yali, ena deli naga ena Genuai Bidi, te gasa god munu me bidibeo. 
Eno naga eno te po obaso, te be posoyu, be huliyu ebao. Te eno naga te we bidi bugagia bidimainu ebao, te eno augwali te genuai sęgę somainu yaibao. Genuai Bidi eno naga, eno te sę tigidali pedalumainu ebo dao.’” 
“Dagalu, nage te dage pǫ dabe me, dagego te wiegi yai sogo augwaliba ilibaso, te tulubage tǫba tulumainao. Te augwa bugagia bidimainu, te wiegi yai doloba pai kolesaga bomo elama, pedalumainu ebao, te tǫgo tulubage selama, te gide nai dabe bugagia holobo tiwai emainao. Ena Genuai Bidigo digi, eno te sę dabe pedalumainu tebo dao,” te po wali. 
Mena bidigo te Godigo aga nigalide wado po wabo bidi da, te bidigo kolesaga te umuna sai mu yali, magi baso meni, da bidi te olo nai gagawai dao. Da te tǫgo nigibo sene pepeda pelama, e tǫde tedali munalua pabo tiwai elalubao. Te tǫgo nigibo senego te nigibo bidiba te tiwai po hanalu, “Nago magi nai nigibawe?” po wagawe? Menio. Te tǫgo te po wabo homu yaibao, “Nago te nai nigibo konesiąwai dao,” te tobage po wabo usugowe? Mu menio. 
Mena bidigo te aga aya idabolo te tiwai po hanalu, “Te magi nai dage sigo ame nani dawe?” te po wabo bidigo kolesaga te umuna sai mu dao. 
Genuai Bidi, Israelgo Wiegi Yai Doloba Pai Kolesaga Mu Ebo God da, te God agai te Israel deli hani we bidi pedalubo sę ilali, agai te tama po wai, “Te nosali pedelabo nai po wabode dagego te eno ena wai puluba tonalubo sę po munu me wagio, te mena kolesaga te eno ena sę eyu, wali pabo po me wagio. 
Eno naga eno te tǫ nigali, te bidalubo we bidi dabe me nigali. Te ena digi eno te giliga, me polua, me hǫ dabe tonalubo dao. 
Te eno digi eno te king Sairus hodolama, te eno ena sę wiegi yai doloba pai emainu yali. Te eno aga painu ebo sunumi tigidali dodolaibao. Te agai eno taun Jerusalem ma nigimainu yaibao. Te agai eno we bidi dabe kalabuside bidali te olo tagala palama pomainu yaibao. Te sę dabe ebo te bidigo aga me abeligobeo. Menio. Aga olo mu sę yaibao. Ena, te Tigidali Bomo Elalubo Genuai Bidigo, eno te po wai dao.” 
Genuai Bidigo te po wai, “Te Isip tǫ kantrigo mone doado bage tigidali, me te tǫ kantri Sudango doado bage tigidali me, te dage Israelgo saibao. Te boi bidi dabego te tǫ kantri Seba bobobage bidi dabe te kalabus ilama, te augwali dageba tagala palaibao. Tama augwaligo nogo te sen dabego dunama, augwali dage wali asu, te augwali dagego olo sę ebo bidi dabe pedelaibao. Te augwaligo dageba kidu sugunama, tama wi eyu, te tiwai po waibao, ‘Mu tamao, God dage dali bidibao,’ waibao. ‘Aga deli naga te God mu, te gasa god me bidibeo,’ waibao. 
‘Nage te Israelgo God, nago te naga we bidi dabe ma sabo God dao, te gasa we bidi dabede nage te naga digi geme duala selama elalubo dao. 
Te tibo god piksa nigibo bidi dabe, te augwali hale mu yaibao. Awe, te augwali tigidali te hale ebo kolesaga tomoba mu paibao. 
Tiali goli, Genuai Bidigo dage Israel ma selama, te sesemane sogo agai dage ugwaba igulama, ugwa ela holomainu ilaibao. Te dage gasa we bidi hani dabede munu ma hale me isąma, te dage sesemane sogo bugagia bidada peyu, bidada paibao.’ Te Seba tǫ kantri bagego te tobage po waibao,” Genuai Bidigo te po wai. 
Genuai Bidi naga te God. Agai te dagalu dali, tǫ dali si nigali bomo mu pedelali. Agai te tǫ olo elalumainu nigibeo. Menio. Agai te tǫ page bugagia dodolama, tama tigidali nai tede elalumainu nigali. Agai te tiwai po obao, “Enaduba deli naga ena Genuai Bidi, te gasa god munu me bidibeo. 
Ena geme dualalu, digibulu me bidibeo, ena te be hulia sai pesagede, digibulu geme me dualalu, te eno po pusubeo. Te eno ena we bidi dabe, te Israel dabeba, te tiwai po weyu, ‘Dagego ena te olo bulu pesagede gegebo sę odolali yao,’ wabeo. Menio. Ena Genuai Bidi, eno te mu po naga pusubo dao, te eno po tigidali dolo wabo dao,” wali. 
Genuai Bidigo te tiwai po wali, “Te tigidali tǫ kantri we bidi dabe, dage sisinagasiąo. Te hwįani sogode dolisąma bidalubo we bidi dabe, dage tigidali te po tųba asiąo. Tama dego te tibo god piksa dali sela asobo bidi, aga homu kolesaga mu meni ebao. Aga te tibo godiba gedu haluasa po weyu, aga tau somainu tiaibao, tiali goli te god te bidigo nigo dulama naga nigali, tama agai te bidi tau sabo usu me egobeo. 
Dage tigidali we bidi, dage aselama, dagego po te po tųba pusagasao. Dagego duga haside digi hanalu, te gega suyu bolo yao, mena god mugo te polobadu mu po wali sę po te megi tama pedalubo dawe? Ena Genuai Bidi, ena deligo naga eno te nai dabe pedelaiba po pusali. Tama suao. Te gasa god munu me bidibeo. Ena te doloba pai kolesaga naga ebo God, eno te ena we bidi dabe ma dobola sabo God da, enaduba deli naga ena bidibo dao.” 
“Dage tigidali bulu tǫ habu we bidi dabe, dage enaba asiąo, te dage bugagia bidaibao, magi baso meni, enaduba deli ena God, te gasa god munu me bidibeo. 
Ena Genuai Bidi, ena nogide digi daide ugwadu mu po obao, te eno pedauwalide wali po te me hasegelegobeo. Eno te tama po wali, te tǫde tigidali we bidi enaba aselama, te enaba kidu sugunagasaibao, te augwali tigidaligo ena dologode naga bidabo po dąų waibao, te po wai. 
Te augwaligo te tama po waibao, ‘Genuai Bidigo naga te da tau siyu, te da dąų waliyu, te doloba pai kolesaga ugwa igulama, ugwa ela holomainu yaibao,’ te po augwaligo waibao,” wali. Tigidali we bidi agaba asobaso, te agaba haliga sębę ebo hani dabe te augwali dwai hale mu yaibao. 
Tialima, te Jekopgo bulai hani wąį dabe, te augwa ugwa ela holama, te genuai nogi elalumainu elalide, te augwa wiegi yai pemene Genuai Bidiba yaibao. 
