﻿Aisaia.
50.
Genuai Bidigo te Israel we bidi dabeba te tiwai po wali, “Taun Jerusalem te duga ida tiwai elalubao. Dagego homugo eno aga tudiba mubao homu eyu, te bidigo we sabo kolesaga bolama, te sai we mu sela sąbo tiwai homu eba, agawe? Te dagego tama homu ebaso da, teda te tama po wali pepa mena elalubawe, eno aga mu sela sąwaniwe? Tama me, te eno bidi me delide negeli sali me elalubeo. Te tama homu dagego magi baso ebawe, eno wai dabe eno dage te gasa bidi dabeba te olo sę ebo bidi tiwai ilama, tagala paliyu, eno te negeli sali dodolabo mone saliwe? Mu menio. Te dagego dwai sę hauwa ena haliga sębę ilibaso, eno te Jerusalem tudiba munama, tama eno dage te gasa bidi dabego nogoba muai dao.” 
“Eno dage gegagasali sogo, magi baso eno te bidi me deli bidibo subewe? Te eno dage i wali sogo, magi baso dagego eno i wali wei ponobewe? Dagego homugo te eno dage ma sabo bomo meni da homu yali da, agawe? Odao. Eno te po obaso, te tamu ąį tigidali mu sula saibao. Eno te po obaso, te genuai soabo ąį te masigi sane olo elalueibao. Te sųgų dabe isilama, kugumini dwai yaibao. 
Tama eno te dagalu me sisi mu emainu eyu, te aga bidi isaide te wego homu dene ebaso gudubo ugwa tiwai yaibao. Mu tama, eno te tobage sę yabo homu elalubao,” Genuai Bidigo te po wali. 
God Genuai Bidigo enabolo te wiegi yai po wabo kolesaga ola mawai, tama eno te wiegi yai po te bomo meni yai we bidi dabego haliga dąų walu, waibao. Tigidali sogo kigamude agai enabolo te wiegi yai gesi sę po ola mawainu ebo po odabo homu godolo mu ebo dao. 
Genuai Bidigo eno olo dalama, te agai po odomainu yali, te eno agade hagoma eyu, te agai enaba mawainu ebo sęde te habu bulu me kilasa pabeo. 
Ena te bidi dabego keloago tudide elama, eno penane nisi gudumainu yalio. Te augwaligo enaba dwai posobo po weyu, eno gesabidiba pesą sąyu yali, eno ena gesabidi te augwaliba dualubeo. 
Te augwaligo dwai po wabogo ena aiyaba me elalugobeo, magi baso meni, God Genuai Bidigo ena tau sabo dao. Te ena digi ena dąų walama, te ena sę yali. Eno te tiwai koneani, eno ebo sęde te ena hale me sogobe homu ebao. 
God pąde bidiyu, te agai te po waibao, eno dwai sę me ebeo. Te bidi me deligo ena po tų ilabo homu eba, agawe? Teda agai ena te po tųba odasa pelama, te agai ena po tų ilabo po pusumainao wali. 
God Genuai Bidigo ena tau siyu, tama dego te po weyu, eno dwai sę me yalio waibawe? Ena po kisilama wali hani bage, augwali te ugwa asobago togolama silibo tiwai mu yaibao. 
Dage te Genuai Bidi dologoba pelama, te agai sę bidigo po wali pabo hani dabe, dage wi me igimio. Te dage hulide biliyu, te dage ula meni yai, te dage konealubo homu Godiba dąų wao, te Genuai Bidigo dage tonalu, agai dage tau saibao. 
Tiali goli, dage te Genuai Bidiba konealubo homu dąų wasiąbo hani dabe, te duga digi isi ula ilama, te dage be hulia side bidibo bage, dagego te sole dabe domonama, tego duga pabo sunumidu te sole uladu pao. Tiali goli, Genuai Bidigo te dage bidigi pabo pesage dąį ilali, te genuai dene sabo pesage dao. 
