﻿Aisaia.
51.
Genuai Bidigo te tiwai po wali, “Dage te eno homu kolesaga wali pabo sę dene eyu, te doloba pai kolesaga ebo hani dabe, dage eno po odiąo. Dagego te Abraham de Sarai siba ma homu kone palao, aga te duga wąį aya monu, me duga ida auwa mosi si dao. Augwali si te dage hani bulali wąį nǫų mu dao. Te eno Abraham i wali sogo, aga wai meni yai, tiali goli eno augwali siba te wiegi yai sę bugagia elama, te augwa si wai elaluai, tama augwali sigo hani wai dabe te genuai hani we bidi mu pedelai dao.” 
“Ena Genuai Bidi, eno te Jerusalemde homu dene mu yali, te taun dolai elaluali, te eno agai sęgę tigidali sia somainu yaibao wali. Megi te olo masigi sane pesage elaluai, tiali goli eno te wiegi yai sę hauwa pedalumainu elama, tama te tonobo gasa sawi mu eyu, te eno nigali Iden gi tonobo tiwai yaibao. Te wiegi yai homu genuai pemene ebo pesage pedelama, te sesemane sogo aga we bidigo te enaba usu da wabo balia po waibao.” 
“Dage eno we bidi dabe, eno po odao. Eno te wiegi yai bugagia bidabo kolesaga te tigidali hani we bidiba ola mayu, te eno te po tų dodolobo doloba pai kolesaga te tigidali bulu tǫ kantride ula tiwai elalueibao wai dao. 
Te eno augwali tau siyu, ma sabo sogo, te pąba pedelalio. Te ena bomogo digi eno te tigidali tǫ kantri tonalueibao. Te digibulu bulu pesage we bidigo te eno bomoba homu dąų weyu, te eno augwali tau sabo tonalueibao. 
Dagego te dagaluba ugwaba tonoyu, te tǫba aiyaba tonoyu yao. Te dagalu tigidali te hano sia sabo tiwai mu yaibao, tama tǫ te gudubo ugwa dolobo tiwai yaibao. Te tigidali we bidi te dinai sibi isila pabo tiwai yaibao. Tiali goli, eno te we bidi tau siyu, ma sabo kolesaga, te sesemane sogo elalua pidubadi, te me sia sogobeo,” wali. 
“Dage te doloba pai kolesaga bugagia koneama, te eno bomo yai po dąų ola sabo hani dabe, dage te bidi dabego dwai po weyu, dage dolobo po obaso, te dage wi me igio. 
Te hani dabe te ugwa asobago tologolama, te silibo tiwai eyu dolaibao. Tiali goli, eno te we bidi dabe tau siyu ma sabo kolesaga, te me sia sogobeo. Menio. Te sesemane sogo elalua pidu elalueibao,” wali. 
Genuai Bidi, nage hogodao. Nage hogodama, te nage genuai bomo dali aselama, te da tau sagasao, te nago polobadu yali tiwai yao. Nago tama nago te Rehap enani, te tamu ąįde bidali moni hasamani, te nago dwasianu dedelege miani. 
Nago tama nago te tamu ąį sula somainu ilama, te sunumi tomodu pedelali, te nago ma sali we bidi dabe soabo sunumi nigilai dao. 
Te naga ma sali hani dabe tau sali, te augwa wiegi yai pemene elama, te Jerusalemba ma aselama, te augwa balia po weyu, genuai po dagą te sunumidu ola asaibao. Te augwa bugagia mu bidiyu, te augwa pemene umabo mu yaibao, augwa te pemene ebo me sia sogobeo. Te dene me haliga sęgę augwali dali me elalugobeo. 
Genuai Bidigo aga we bidiba te tiwai po wali, “Ena digi eno dagego haliga dąų walama, te dagego tigidali sęgę sia somainu ilibo dao. Tama magi baso dage te gasa bidi dabede wi ebo dawe? Augwa bomo me elalubeo. Tigidali bidi isama, te nosai polo sia sabo tiwai gilama ebo dao. 
Te dagego Genuai Bidi, enaba homu kone gegeda palali homu yali. Eno tama eno dage nigali. Eno te dagalu aga pesagede muani, te eno nigilama, eno te tǫ page dąų walali. Magi baso dage te elaluama, te dolainu ebo dwai bidi dabede wi ebawe? Te bidi dabego dageba magi sę me egobeo. Augwa haliga sębę te odolali silaibao. 
Te kalabuside bidali hani, augwaligo pibia selama, wi ebo bage, augwali te kalabus sęgo me isigobeo. Menio. Te augwali kalabuside polo silama, te augwali olo bidaibao. Te augwa tuabo nai hauwa elalueibao.” 
“Magi baso meni. Ena da Genuai Bidi, duga God. Eno te tamu ąį hodolama, te genuai ąį dini pedelama, te genuai mumunu ebao. Eno nogi te tiwai, Te Tigidali Bomo Elalubo Genuai Bidi dao. 
Eno po te dageba mawai, te dagego pedauwalidu te po pusumainu yali. Te eno nogogo dage bugagia geme dualali. Ena Genuai Bidi, eno te dagalu diniginama, elalubao. Tama eno me tǫ aga bidabo pesageba munama, dąų walama, elalubao, eno dage te Jerusalem we bidi dabeba te tiwai po wali, dage te eno we bidi hani dolo mu dao, wai.” Te po wali. 
Jerusalem, nage hogodao. Nage hogodama, bomonama ma dolugulao. Genuai Bidigo haliga sębę te wain ąį me deli te nageba mani tiwai ebao. Te agai nago te ąį tulama, silainu ebo tiwai yali. Te naga gęǫ page mu elama, umuna palali dao. 
Te nago ogwa dabe deli me bidisąwai, te nago nogo tolasa, te nage dolo somainu ilabo te meni yai. 
Nago sęgę genuai mu tolama, te dego nage homu dene elama, te nago haliga wiegi yai usu ma iligowe? Te boi bidi dabego aluama, nage dolagasali. Te augwaligo nago we bidi me hauwa te bainatgo elali. Te genuai nasi nageba pedelali sogo tiali. Te eno mena sęgo nage tau selama, nago te haliga sęgę elalubo siligowe? 
Te nago we bidi dabego bomo meni yai, te augwa gedu gęǫ page elama, te augwa degasa dulama, te augwali tigidali sunumi bagude pila muna muna palio. Augwali te hasa bade tuali tiwai elaluali. Augwa te magi sę yabo usu me ebeo. God, Genuai Bidigo te augwaliba wado po olama, te aga haliga sębę ebo kabude te ąį tumainu ilali, te augwali dodolo pelama, elaluai dao. 
Odao. Jerusalem, nago te sęgę hauwa tolama, tama nage te ąį tuai gęǫ page yai we bidibo tiwai yali. Tiali, nage te wain ąį tulama, gęǫ page ebeo. Menio. Te Genuai Bidigo haliga sębęgo naga nage gęǫ page yai dao. 
Nago Genuai Bidi, te Godigo nago te boi bidi dabe dali hwįbo tau selama, dage ugwa ela holobo ilali, agai te tama po wali, “Suao. Eno te haliga sębę yali kabu te eno nageba menama, te nago tulama, te gęǫ page dwai mu elama, te umuna sali. Tiali goli, megi da, eno te kabu nago nogode ma sali. Te eno nosali nage te kabude ąį ma tumainu me egobeo. 
Tiali goli, eno te kabu te nage dolobo bidi dabe nogoba mueibao. Augwaligo nage te tǫde pimainu ilama, te augwaligo nage agalama, te nage tudi daide biliyu, te augwa olo tǫ bulude bilibo tiwai yai dao,” te po wali. 
