﻿Jeremaia.
2.
Genuai Bidigo te tiwai po enabolo wali, 
“Nage pelama, Genuai Bidi eno te po te Jerusalem dabeba pusugi pao,” wali. “‘Eno homugo dage homu konealudu, dage eno we bidi hani pedelali sogo dagego duga homu enaba kęą pai. Te sogo dagego ena godolo mu yali, te gesi tamadi sai wego aga bidi godolo mu ebo tiwai yali. Te Isip tǫ kantri tagalama, dagego te dwai masigi kemi olo tǫ bulude, te bidi dabego gi bulusiąwai pesagede bilali goli, te dagego ena wali piduai dao. 
Te sogo dage Israel te eno gasagi yai tedali we bidi mu bidali. Dage eno gide te nai hasia mu inilama, te tau ebo tiwai elaluai. Te gasa hanigo eno te nai sobaso da, augwaligo te dwai sę yali da weyu, te eno augwalibolo dwai dene mawai dao.’ Genuai Bidi eno te po wai dao.” 
Dage Jekopgo bulai wąį wai puluba dabe, dage tigidali te Israel hani dao, dagego te Genuai Bidigo te tiwai po odiąo. 
Genuai Bidigo te tiwai po wai, “Eno mena dwai sę ebaso, te dage bulai wąį dabego te ena tagalama, digibulu mu paliwe? Waa? Koneao. Augwa te olo naiba lotu obaso, tama tiyu, augwa digi te olo nai tiwai pedelai dao. 
Augwaligo ena homu kone me ebeo. Augwaligo te eno augwali tau sali sęde homu kone me ebeo. Eno augwali te tǫ kantri Isipde selama odasa asiyu, augwaligo te genuai olo bulu pesage tǫ nogeai. Te pesagede te olo masigi kemi tǫ elaluali, tama te dwai bulu pesage dabe elalua pai. Te buluba tulubage tulisąwai pesage elaluai, te bidi dolobo pesage elaluali. Te bidi dabe bilisąwai bulu, te bulude bidi bidisąwai bulu dao. 
Eno te bulai wąį dabe odasa asiyu, te olo tǫ bulu tagalama, tama eno augwali te wiegi yai ili elalubo tǫba odasa asai. Tama megi dage te tǫde bidibao, te dage Israel te wiegi yai nai sela tuyu, te wiegi yai nai elalubo digi bidibao. Tiali goli, dage eno te tǫde bidibadi, dagego te dwai kugumini yai kolesaga ebao, te eno dageba mani tǫ te eno gedude dwai nai mu pedalubao,” wali. 
“Te pris dabego me enaba homu kone me palobeo. Te eno bomai po page koneai bidi dabe, augwaligo ena me konebeo. Te bulu tǫ kantri tonalubo polalubo bidi dabego enaba hagoma ebao. Te profet dabego te tibo god Bal nogide profetgo wabo po tiwai weyu yali. Augwaligo te augwa tau sisąbo naiba lotu wai dao,” wali. 
Genuai Bidigo te tiwai po wai, “Dagego te tobage dwai kolesaga ebaso, tama ena Genuai Bidi eno te po obao, te eno dage po tų ma ilaibao. Te eno dagego wai dabe dali, duga wąį dabe me po tų eyu, te dagego nosali pedalubo hani dabe me po tų yaibao wali. 
Edao. Dage sip sela pelama, te ailan Saiprus te giliga dega sabo badu pelama, te Saiprus dabego kolesaga suao. Tama te bidi dabe dagego te bulu Arebia dabego tǫba te giliga pedalubo badu tagala palama, te augwaligo kolesaga bugagia osola suao. Te dagego subadi, te hani me deligo te duga ebo tobage dwai kolesaga tiwai ebo suaibawe? Mu menio. 
Te hani bagego augwa god te god mu menio. Tiali goli, te hanigo augwa te god hasegelama, te gesi god wali me pabeo. Ena God, eno te genuai nogi dali bomo dali si elalubao, tiali goli dage we bidigo te ena hasegelama, te dage tau sisą yabo dwai god dabe wali pidubo dao. 
Tialima, ena Genuai Bidi, eno te po obao, ‘Dagalu, nage te Israel dabego ebo dwai sę ebo kolesagade dwai midigi mu sao. Te nage hale elama, didibili eyu, te dwai haliga mu iduao, 
magi baso meni, eno we bidi dabego te dwai sę si yali. Hasia augwaligo ena tudiba muai. Ena te ulu wę tiwai te augwali bidabo ula maiabo wę elaluali, tiali goli, augwaligo ena tagalali. Tama me, tǫ diganama, augwa digi te wę sabobo nai nigali. Tiali goli, te wę sabobo nai te alua pelama, te ąį augwalide elalubo usu ebeo.’” 
Genuai Bidigo te tama po wali, “Te Israel dabe te bidi me deli magi sę isąma olo mu bidibo tiwai elaluali. Augwali te olo sę ebo bidi tiwai me elalubeo. Te aga aya me te olo sę ebo bidi tiwai gilama me elalubeo. Tama tilama, magi baso te boi bidi dabego augwali bomonama siyu, te hwįbode doado bage sabo tiwai yaliwe? 
Te boi bidi dabego te laiongo bomonama i wabo tiwai yai dao. Augwaligo agai taun siago deyu dolama, tede bidi me bidibeo. Te agai tǫ augwaligo te olo tǫ pesage bulu tiwai pedelai. 
Israel, nage we me deli tiwai, te taun Memfis bidi dabego, me te taun Tapanes te tǫ kantri Isip bagego nage dwai hale iliyu, te nago tobolu nisi tigidali poalama, sela sąwai. 
Te naga digi yali sęgo te sę nageba pedelali. Magi baso meni, ena Genuai Bidi, naga God, eno nage te sunumidu odasa asainu yali, tiali goli, naga hagela eyu, ena tudiba muai dao wai. 
Magi baso nage te tǫ kantri Isipba pelama, te wę Nail tugi paiba obawe? Magi baso nago homu kone paliyu, te bulu tǫ kantri Asiriaba pelama, te wę Yufretis tugi pabo homu eyuwe? Te kolesagago nage dwasianu tau sainu ebaso, usu mu egobeo. Mu menio. 
Naga digi ebo dwai kolesagade te nageba dwai dene mawaibao. Nago ena tudiba mubaso, tama naga te kolesagade nageba wado ilaibao. Nago ena Genuai Bidi tagalu, te nago God, te nago ena dologoba me bidagasobe. Tama nago bugagia homu kone palama, koneao, nago te dwai kolesaga dabe mu ebogo te nageba dwai dene mobao. Ena God, Tigidali Bomo Elalubo Genuai Bidi, eno te po wai dao.” 
God, Genuai Bidigo po ma weyu, te tiwai po wai, “Israel, odao. Polobadu digi nago enaba hagoma eyu, tama nago eno nageba mani sę tagalai, tama nago te po wali, ‘Eno nago sę munu ma egobeo,’ wai. Mu tama, nage te tigidali bulu duba holoyu, tama te tigidali genuai ni dologoba sisinama, te nago tibo god dabeba lotu wali, te wego bidi hauwa dali penani igi pabo tiwai yalio. 
Hasia nage te wiegi yai wain ni eno bulai tiwai elaluali. Nage te ni wain polasa mu wiegi yai yano mu pedalubo tiwai yali. Tiali goli, magi baso megi da, nage begelama, enaba tudi ola menama, te buside dwai wain ni tiwai pedelaliwe? 
Nago naga tigi te meda sela sąbo boma pai naigo teleyu, me te wiegi yai sobu hauwago wę telabadi, te tagalao, tego nago yali dwai sę me sela sągobeo. Menio. Te dagego yali dwai kolesaga te meda dagede mu dagana sai tiwai mu dao. Ena God Genuai Bidi, eno nago yali dwai sęgę elaludubadi gebo subao. 
Tiyu, mena tama nage te eno gedude meda me pedali sabe da homu elama, nago te god Bal dabeba lotu wabe homu egowe? Waa? Israel, nago te bulu tǫ odogo pesagede nago te dwai sę yali homu kone ma palao. Nage te tigidaliba peyu, biliyu, te tibo god gegali, te so kibu kamelgo te tigidaliba pelama, udada peyu, te omai kibu kamel gegebo tiwai yalio. 
Tama nage te so uni donkigo te tǫ wa pai pesagede sesemane sogo bilidubo tiwai ebao. Aga te homu hę wai bilidu, te donki bidi gegali te aga guni ugaba sagolama, te omai donki menade bidibowe, te denami odada bilali. Te aga tama tebo sogo, dego agai tų palibo usu egowe? Bidi menio. Te sogo te omai donki dabego te so donki aga gegebo sę dene me egobeo, te augwa godolo ebo homu sia somainu tiaibao. 
Israel, nage udada biliyu, te tibo god wali pigio. Tiyu, nage sągą dolidali weyu, tama naga dogoni mu wa pabuo. Eno te tobage po wai goli, nago te tiwai po weyu, ‘Tagala,’ wali, ‘eno Genuai Bidigo po me odogobeo. Eno te gasa bidi hanigo god dabe godolo mu ebao. Eno augwali me wali pabo homu ebao,’ dagego te po wai,” wali. 
Genuai Bidigo po ma weyu, te tiwai po wali, “Te nai wi sabo bidi me deli augwaligo dąų ola sobaso da, teda te bidi hale dwai mu saibao. Te Israel hani te tiwai me bidibao. Te augwa king dabe, me augwa tobolu bidi dabe, me pris dabe, me profet dabe, me te tigidali we bidi dabe, te hale yaibao. 
Augwa te tama po obao, ‘Ni, nage da, te dena aya da, te masigi, nago da ame nani.’ Augwaligo ena tudiba naga muyu, te augwali ena pąba me asisąwai. Tiali goli, te sęgę pedalubo si da, augwaligo te tiwai i wabo dao, ‘Genuai Bidi, nago da tau sagasao,’ tama wabo dao. 
Tiali goli, tega! Juda te dage tau somainogo duga digi te nigali god dabe mena bidibawe? Augwa namba te duga taun dabe namba tobage gagawai yali. Te dageba sęgę me pedalubo sogo, augwaligo digi dage tau somainao, te augwali usu elalubaso da, te emainao,” wali. 
Genuai Bidigo po ma weyu, te tiwai po wai, “Dage tigidali enade hagoma ebao. Tama tialima, magi baso dagego po enaba wei ponoyu, eno dwai sę yali po obawe? 
Eno dagego wai puluba dabeba dwai dene mabo sę yali, te dage dodoliyu yali, tiali digi ena odolali sę dene yai. Dagego duga kolesaga me hasegelebeo. Menio. Iya! Dagego te eno dageba tagala palali profet dabe deli deli ela muna muna pela silali, te nasi yai boma pai laiongo hasa elebo tiwai yai. 
Dage megi bidibo Israel, te Genuai Bidi eno poba olo bugagia muao. Dagego homugo ena te masigi kemi olo pesagede te dwai nai da homu ebo dawe? Ma, ena te be hulia sai pesage me deli mu tiwai da obawe? Te tiwai isąyu da, teda magi baso eno we bidi dagego enabolo te tiwai po weyu, ‘Megi te dena homu wali peyu, tedela paibao. Da te nageba munu ma asogobeo,’ wali. 
Dagego homugo te gesi wegigo aga au ebo wiegi yai au dobage gegeda pabo homu yaibawe? Te we dabego te augwa bidigo kębo sogo au yali wiegi yai au dobage gegeda pabo homu yaibawe? Menio. Augwaligo gegeda painu ebaso, usu mu me egobeo. Tiali goli, tega! Dage eno we bidigo enaba hauwa sogo homu kone gegeda paludu gebo dao, bidigo nedebaso, usu egobeo” wali. 
“Israel, nago te penani kolesaga bugagia koneama, te bidi gegabo sunumi homu kone bugagia palobao. Nago koneani kolesagago te tigidali penani ebo wego koneani homu kolesaga te aiyaba elaluai, tama nago augwali te tobage dwai kolesaga ola mobaso usu yaibao. 
Te walu doado bage meni yai bidi dabego nago be alusiąbadi, tiali goli nago augwali odolali elama, tama augwaligo kaneme te nago ugwa dabede dagana sai elalubao. Nago te tobage dwai kolesaga dabe eyu, 
tiali goli, nago te tiwai po wabo dao, ‘Eno magi dwai sę me ebeo,’ wai. ‘Tama tiyu, te Genuai Bidigo enaba wado genuagia mu wagio.’ Odao. Nago te mu po me wabeo. Tama tialima, te eno nage po tų ilaibao wai. 
Nago sunumi me deli wali pali, te polo tagalama, te nago gasa sunumi wali pobao. Te Isip dabego nage tau sisąbaso, te nage dwai hale siyu, te nage Asiria dabego tau sisąbaso, te sogo te dwai hale yali tiwai gilama yaibao. 
Te nago Isip dabe me tagalu, te sogo nage hale elama, te haliga sęgę dwai yaibao. Nago koneani, te hani dabego nage tau saiba homu yali, tiali ena, Genuai Bidi, eno augwali tudiba muanio, tama tiyu, augwaligo nage tau me sogobeo. Mu menio.” Te po wai dao. 
