﻿Jeremaia.
12.
Genuai Bidio, nago doloba pai kolesaga sesemane sogo ebao, te eno nage dali po konila eyu wabeo. Tialima, te meba kolesaga eno konesiąwani, tama eno te nagebolo hanalu obao. Magi baso te dwai kolesaga ebo bidi dabe, te augwa sesemane sogo bugagia bidibo dawe? Magi baso te gagamu selibo bidi, me tibo po wabo bidi dabe, te augwa ebo sę bugagia mu ela pidubo dawe? 
Nago augwali te tǫba munama, augwali te wiegi yai pedelali, te bidigo bulali ni tiwai elama, te ni sele tǫ tomoba pelama, te ni genuai holama, te nai walobo tiwai ebao. Sesemane sogo augwaligo nago nogi nogi eyu ebao, tialima, te augwa homu nagede digibulu elalubo dao. 
Tialima, Genuai Bidi, nago ena koneama, te eno tigidali kolesaga me konebao. Te nago eno homu kolesaga dagalubao, eno nageba haliga mu mubo, te nago konebo dao. Te eno homugo eno boi bidi dabe nago sela sąyao homu ebao, te bidi dabego sipsip elainogo sela pabo tiwai ebao. Te nago bodolu muani sogo, nago augwali ela muao. 
Genuai Bidi, nago dago tǫba genuai sęgę muani, te tigidali nosai sasia pali. Nisu sogo te sia selama, te tǫ wiegi yai ma pedalugowe? Te hasa me, ba dabe me, isila pobao, magi baso meni, te tǫde we bidi dabego dwai kolesaga me idubo sę ebao. Tama me, te we bidi dabego te po obao, “Jeremaiago daba te pedalubo sę dabe me suagasogobe dao,” po wabo dao. 
Tialima, Genuai Bidigo enabolo te tiwai po wei ponani, “Jeremaia, megi nago te gę nabo sęgę, te nosali pedelabo sęgę tiwai me egobeo. Te nage bidi dabe dali ususu si ebode te homu hę obaso da, teda magi elama nago te hos dabe dali udabo ususu si yaibawe? Te nage dua digi te wiegi yai sogo naga tǫ kantride bidibaso da, teda nage te Jordan wę genuai aselama, aluasa soabo sogo, te nage magi elama, bidaibawe? 
Te sęgę dabede te me deli te tiwai elalubao. Te naga hani dabego digi te nageba dwai sę yabo po mia salio. Te nage augwaligo nage pobeasa pabo tiwai elama, te pąde nage pageabi yainu ebo tiwai yaibao. Te augwaligo nage dali wiegi yai po obadi, te tagalao, nago augwaligo poba homu kęą pelamu dao,” wali. 
“Ena Genuai Bidi, eno tama po obao. Eno Israel tudiba muaibao, te ena we bidi da olama, sa muai. Eno te we bidi dabe godolo homu mu yali, tiali goli, megi da, eno te boi bidi dabego augwali aiyaba elalumainu ebo dao. 
Eno te we bidi dabe, augwaligo enaba boi bidi yali. Augwaligo ena aiyaba elaluainu i bomonama weyu, te laion me deligo genuai buside i wabo tiwai yali. Tialima, te eno augwali godolo homu munu me egobeo. 
Eno we bidi augwali te ba me deli tiwai gilama, te ba kemodage dabego te ba bagua sagaselama, te aga dolobo sę yalio. Te uni hasa dabe me i olama, te augwali me aselama, te ba tuagasomainao,” wali. 
“Te gasa tǫ kantri polalubo bidi dabe aselama, te eno wain gi dolaibao. Te augwaligo eno wiegi yai gi agalama, te gi te wa pai pesage naga ilaibao. 
Tama te tǫ te bidi meniama, olo bulu mu elalueibao. Tama te tǫ hobede yai gela wedu, te eno agai gela odomainu tiaibao. Te bidi mego te tǫde sęgę homu kone me palogobeo. 
Te tǫ wa pai bulu pesagede te boi bidi hauwa pedaliyu, te augwaligo tigidali nai doado bage dolabo homu yaibao. Magi baso meni, te eno dagego tǫ kantri we bidi tigidaliba dene maiabo homu ebao. Tama te bidi me deli bugagia bidainu ebaso, usu me egobeo. 
Dage Israelgo te wit wai ge bulaibao, tialima te inayani nai tau yali sabo sogo, dagego te sesani yai bono naga elalubo sueibao. Dage odolali sę dene elama, te magi nai me deli dagego me sogobeo. Dagego te Genuai Bidi eno haliga sębę naga saibao. Tama dage dwai hale mu siyąo,” wali. 
Genuai Bidigo te tama po wali, “Te Israel dabe pąde bidibo hani dabe, augwalide eno po elalubao,” wali, “augwali te dwai kolesaga ebo bidi dabe tiyu, te augwaligo eno we bidi dabeba mani tǫde dwai sę ebao. Odao. Te eno te hani boi bidi dabe te augwa tǫba digi ela gudulaibao. Te Juda dabe augwa tǫde digi te boi bidi dabego tǫ tomode bidibao, tialima eno te Juda dabe me sela sąwaibao. 
Tiali goli, eno augwali sela sąnama da, teda nosali eno te olo tau mabo wiegi yai kolesaga augwali hani tigidaliba ma yaibao, te eno augwali te augwa page buluba ma odasa paibao. 
Tama te sogo te gasa hani augwaligo te eno we bidi dabego kolesaga bugagia konea sabo sę yaibao. Polobadu te hani dabego eno we bidiba te god Bal nogide mu po waiyąo wabo po ola mawai. Tiali goli, te sogode te augwa digi eno nogide mu po dao waibao, te sesemane sogo bidada pabo Genuai Bidi dao. Te kolesaga augwaligo wali pobaso da, teda augwali me eno we bidi hani pedelaibao. 
Tiali goli, mena we bidi hani me deligo eno po odobo hagela homu ebaso da, teda eno augwali sela sąnama, te augwali mu dolaibao. Ena Genuai Bidi, eno te po wai dao,” wali. 
