﻿Jeremaia.
23.
Genuai Bidigo te tiwai po wali, “Genuai sęgę te eno we bidi dolobo tobolu bidi dabeba pedelaibao. Augwali te dwai tonalubo bidigo te sipsip dabe dolama, te augwali subigila tedela palobo tiwai ebao. 
Tama tibaso, ena Genuai Bidi, ena duga Israelgo God, eno po dolo te dage eno bidi tonalubo sę ebo bidi dabeba obao. Dagego eno sipsip dabe ela gudulama, te augwali pobelama, besela palio. Dagego augwali bugagia me tonalubeo. Tibaso, ena Genuai Bidi, eno po dolo obao, te dage eno bugagia tonalu, te dagego yali dwai kolesaga wei ponainogo tebo dao. 
Tama ena digi eno te dwasianu elalubo sipsip hani te eno augwali sela sąwani tǫ kantride sisinaibao. Tama eno te augwali te augwa obo tomoba ma odasa asaibao. Tama augwaligo te wai hauwa ame nenama, te umabo hauwa pedelaibao. 
Te ena Genuai Bidi, te eno gesi noma tonalubo bidi nigilama, tama augwaligo te sipsip dabe bugagia tonalueibao. Tama te sipsip dabego magi nai me delide wi me egobeo. Tama te sipsip deli me hagagobe dao,” wali. 
“Ena Genuai Bidi, eno te po obao. Eno te wiegi yai bidi mu me deli te Devitgo hanide pedelabo sogo bodolu mueibao, te ni nologode gesi ni kulubi holobo tiwai yaibao. Te bidi te king bidiyu, agai te wiegi yai doloba pai homu kolesaga wali paibao. Tama agai te tǫde we bidi tigidaliba doloba pai kolesaga mu yaibao. 
Te aga king bidibo sogo, te Juda dabe me Israel dabede te sęgę mu meni yaibao. Te eno augwali ma selama, te augwali bugagia bidaibao. Tama augwa te king nogi te tiwai waibao, Genuai Bidi aga te dago doloba pai kolesaga ebo page bidi da, waibao,” te po wai dao. 
“Ena Genuai Bidi, eno te tiwai po obao. Eno te we bidi dabe sela sąwani, tialima, te eno augwali te augwa tǫba ma odasa asabo sogo bodolu muani elalubao, te augwa bugagia bidaibao. Megi augwa po dąų walobo kolesaga e tiwai ebao. Augwaligo te po wali, ‘Te sesemane sogo bidada pabo Genuai Bidigo nogide eno nogo guni sisu mobao, te eno mu po obao,’ wali. ‘Agai da te Isipde selama, odasa asalio.’ Tialima, te eno augwali odasa asali sogo, te kolesaga hasegelaibao weyu, augwa te tama po waibao, ‘Te sesemane sogo bididubo Genuai Bidigo nogide eno nogo guni sisu mubao, te eno mu po obao. Agai da Israel hani dabe te tǫ kantri not pedai badu, me gasa tǫ kantri badu selama, agai da te badu sela sąnama, tama agai da te dena page buluba ma selasa asai dao.’ Augwaligo te tobage po waibao,” Genuai Bidigo te po wali. 
Jeremaiago te tiwai po wali, “Eno te Genuai Bidigo wiegi yai doloba pai po eno koneai, tama eno te profet dabede homu kone palobo sogo, eno homu doloyu, te ena wi elama, te eno dili dabe didibili mu ebo dao. Ena te bomai ąį wain hauwa tuai bidi tiwai pedelama, te gęǫ elama, te wabo pabo tiwai ebo dao. 
Te tǫ kantri we bidi dabego te Genuai Bidi tagalama, te we sai bidigo me bidigo sai wego te subigila penani ela bilibo tiwai dao. Te we bidi dabego dwai kolesaga ebaso, te Genuai Bidigo aga po wali peyu, te tǫ dolai dao. Tigidali kala tǫ bulu wa pai yaibaso, te tǫgo hobedai gela obao. Sesemane sogo te me profet dabego dwai sunumi wali peyu, tama augwa te dolo isąwai kolesaga ebo sę bomo ebo dao,” wali. 
Genuai Bidigo te po wai, “Te profet dabego me, pris dabego me, te Genuai Bidigo po konesiąwai bidi dabe ebo kolesaga tiwai yali. Te eno be tomode digi dwai sę ebadi, te tagalao, augwa te dwai kolesaga ebo me geana sogobeo. 
Tama tibaso, te eno augwaligo sunumi te mu kikila palama, te hulia sabogo augwali mesegalueibao. Te eno augwali bomonama pogwa palama, te augwali tula mueibao. Ena Genuai Bidi, eno te augwali dolabo sogo bodolu muai elalubao, tama te sogo eno dwai dene augwaliba mawaibao,” wali. 
“Polobadu eno te Samaria profet dabego te tiwai dwai kolesaga ebo suali. Augwaligo te tibo god Balgo nogide profet po pusulama, tama augwaligo eno we bidi dabe te dwai sunumiba odasa pali. 
Tialima, megi eno subo, te Jerusalem profet dabego dwai kugumini yai kolesaga mu ebao. Augwaligo te we sabo kolesaga doloyu, te tibo po wabo kolesaga me ebao. Augwaligo te dwai kolesaga ebo bidi dąų walaibao. Tama tiyu, te mena bidi mego te tobage kolesaga tudiba me mubeo. Eno suali, tigidali Jerusalem we bidi te dwai mu, te Sodom dabe me Gomora dabe tiwai mu elalubo dao.” 
“Tama tialima, ena, Tigidali Bomo Elalubo Genuai Bidi, eno te profet dabeba homu kone palama, te po obao, Te eno genuai dene augwaliba mawaibao. Te eno ha ebo marasin augwaliba menama, te augwaligo tumainogo ebo tiwai yaibao, tama eno te bidi dolobo dwai wę mabo ąǫ yaibao. Magi baso meni, te Jerusalemde bidali profet te haiden kolesaga wali pelama, megi da, te kolesagago te tǫ tigidali usu nubo dao,” te po wali. 
Te Tigidali Bomo Elalubo Genuai Bidigo te Jerusalem dabeba te tiwai po wali, “Dagego te profet dabego dageba pusubo po me odogio. Augwaligo dage tibo po ola mayu, dage bugagia bidaibao po obao. Augwaligo te augwa homude digi te na yali po pusaibao. Eno augwaliba te po me mabeo. 
Te we bidi augwaligo eno po sela sąbaso, te profet dabego augwaliba te tiwai po waibao, ‘Te dage bugagia bidaibao.’ Te hagoma elama, augwa homu wali pabo we bidiba, te profet dabego augwaliba te tiwai po waibao, ‘Te dwai nai dageba me pedalogobeo.’” 
Tama Jeremaiago te tiwai po wali, “Te profet dabe me deli te Genuai Bidigo po sisinama mibo pesagede bidama, te po me sagasobeo. Te augwali me deligo te Genuai Bidigo poba bugagia olo me mubeo. 
Odao. Genuai Bidigo haliga sębę te dwai bidi dabeba pedalubo, te bomai wali me tulubage polo asobo tiwai yaibao, tama te poboge ebo genuai waligo te augwali tobolude agabo tiwai yaibao,” wali. 
“Genuai Bidigo haliga sębę elaludu, te agai homude yaibao wali tigidali sę ela siliyu, usu naibao. Te bodolu muani sogo asobo side, dage we bidigo te sę dabe page bugagia koneaibao,” wali. 
Genuai Bidigo te po wali, “Eno te profet dabe me tagala palobeo, tiali goli, augwaligo po asesa pusugi pobao. Eno po augwaliba me mabeo, tiali goli, augwaligo te profet po pusubo dao. 
Te augwali eno sisinama po mibode bidigi sogo da, te augwaligo eno we bidiba te mu po dolo pusugi pobao homu igi da. Tama te pogo te we bidi dabe dwai sunumi bilali tagalu, te augwa yali dwai kolesaga tagaligi da homu ebo dao.” 
“Ena Genuai Bidigo, eno dageba te tiwai hanalu wabo homu ebao, dagego homugo ena te pedai badu God naga da homu eba, agawe? Menio. Ena te tigidali badu God elalubao. Ena pąde bidiyu, te ena digibulu me bidiyu ebo dao. 
Te bidi me deli gasa badu me dula sigi pobaso, te ena Genuai Bidigo, eno aga sugobe homu ebawe? Te eno aga sueibao, magi baso meni, ena Genuai Bidi, ena te tigidali badu te dagalude me tǫde bidibo dao,” wali. 
“Te profet dabego eno nogide te tibo po pusubo eno odalio. Augwaligo te tiwai po wabo dao, ‘Eno na yalio! Eno na yai dao!’ te po wabo dao. 
Nisu sogo mu te profet dabe augwa digi te tibo po te we bidi dabeba pusubo kolesaga tagalaibawe? 
Augwaligo te augwaba digi te na yali po pusuyu, te augwaligo homugo te tebogo te eno we bidigo te enaba homu kone ebo kegeda paloba homu ebao, te polobadu augwa wąį nǫų dabego te tibo god Balba lotu weyu, te enaba homu konesiąwai tiwai yaibao homu ebo dao. 
Ena Genuai Bidi, eno po dolo obao, te profetgo odolali na yali da, agai te na yali po miaibao. Tialima, eno te bidi me deliba po mawai ebaso da, teda agai eno te po dolo pusao. Eno po da, te wiegi yai nai wit ge wai tiwai elalubao, tama te profet dabego po wit aga bo ma wali tiwai olo nai dao. 
Ena Genuai Bidi, eno po dolo obao, eno po te isi tiwai elalu, tama te genuai hamago te masigi dabe haluama, te kakali pedalubo tiwai ebo dao.” 
“Tama tialima, odao. Ena Genuai Bidigo, eno po dolo obao. Te augwa deli sę ebo profet dabede po wi selama, te po enade sai dao wabo profet dabe dali eno boi bidi yabo homu ebo dao. 
Mu tama, ena Genuai Bidi, eno te tiwai po odolali wabo profet dabeba boi bidi yaibao, ‘Te e po Genuai Bidigo po da,’ wabo dao. 
Ena Genuai Bidi, eno te profet dabego augwa tibo na yali po selama, te augwaligo te we bidi dabeba pusa mayu, te eno augwaliba mawai po da wabo, te profet dabeba eno boi bidi yabo homu ebao. Augwaligo te haniani tibo po pusulama, te tama tebogo te we bidi digibulu kegasa pabo dao. Eno augwali me tagala palisąma, te eno sę augwaliba me mabeo. Tama te we bidi augwaligo tau me dwasianu me sisąwai. Mu menio. Ena Genuai Bidigo, eno te po wai dao,” wali. 
Genuai Bidigo Jeremaiabolo te tiwai po walali, “Te we bidi dabego, ma profet me deligo, ma te pris me deli, te aselama, nageba te tiwai po hanalu waibao, ‘Genuai Bidigo sęgę yai po meba elalubo, ma meniwe?’ obaso da, teda nago eno te po agabolo pusao, ‘Ena Genuai Bidigo, eno po dagede elalubao. Dagego enabolo sęgę mawai. Tialima, te eno dage sela sąwaibao.’ Nago eno te po agabolo pusao. 
Te profet me deligo, ma te pris me deligo me, ma te olo bidi me deligo te po weyu, ‘Genuai Bidigo po sęgę mu elalubao,’ obaso da, teda eno te bidiba me, te aga haniba dali, dwai dene mawaibao. Tama te tobage po wagio. Menio. 
Te dagego duga abagi dabe dali, me duga ama dabe dali, po mibo sogo da, teda duga te tama po wao, ‘Genuai Bidigo mena po wei ponaniwe?’, ma ‘Genuai Bidigo mena po pusaliwe?’ te po wao. 
Tialima, dagego te tama po ma wagimio, ‘Genuai Bidigo po sęgę mu elalubao,’ wagio. Menio. Duga pogo digi duga sęgę mobao. Te duga digi eno po selama, tama po yalelebo po wabo sę ebao, ena sesemane sogo bidibo God, ena Tigidali Bomo Elalubo Genuai Bidi, ena duga God dao. 
Te bidi me deligo te profet me deliba hanalu wainu eyu da, teda agai te tiwai po wao, ‘Genuai Bidigo magi po nageba wei ponaniwe?’, ma ‘Genuai Bidigo mena po pusaliwe?’ 
Tialima, dagego te po weyu, ‘Genuai Bidigo po te sęgę mu elalubo,’ obaso da, teda ena Genuai Bidi, eno po dolo dagebolo obao. Eno dageba te tobage po pusubo habu selali, tiali goli, dagego eno po sela sąnama, dagego te po ma weyu, ‘Genuai Bidigo po sęgę mu ebao,’ wabo dao. 
Tama tialima, mu tamao, te dage eno selama, te enade digi sągi paibao. Eno dageba tama tilama, te eno dagego wąį nǫų dabeba mani tǫ taun me te dageba digi te eno digibulu tagala palaibao. 
Eno dage te hale dwai mu ilama, tama te hale sesemane sogo elalua paibao, tama dagego tede homu kone palobo te ma tagalogobe dao,” wali. 
