﻿Jeremaia.
49.
Genuai Bidigo po te Amon dabede elalubao. Agai te tiwai po wali, “Magi yaliwe? Te Israel dabego ogwa dabe meni yani homu elama, te augwa aya dabego tǫ dabe doado bage sogobe da, agawe? Te augwali elalubadi yaibaso da, teda magi baso te Amon dabe, te tibo god Molekgo hani dabego, te Gat hanigo tǫ saliwe? Te magi baso te Amon dabe te Gat hanigo taun dabeba bidigi pai dawe? 
Ena Genuai Bidi, eno te po obao, mu tama eno bodolu muani sogo me deli elalubao, tama te sogo eno te boi bidi dabego te taun Raba teba hwįgi pomainogo tagala palaibao, te kantri Amongo genuai taun dao. Augwaligo te taun dolama, te olo pobele bage du holali tiwai elalueibao. Te boi bidi dabego te genuai taun pąde elalubo bulu dabe siago ulaibao. Tama nosali, te Israel dabego te Amon dabego sali tǫ ma saibao. Te Genuai Bidi, eno po dao.” 
“Dage Hesbon hanu Amon hani we bidi dabe, dagego bomonama gela wao, magi baso meni, te taun Ai dolalio. Dage Raba taun we bidi dabe, dagego gela waiyąo, dagego te hobede ebo ugwa gudama, te hobede ebo tęąbi wao. Te dage wi painogo, me badu udayu, gelama, gasa badu udayu yao. Magi baso meni, te boi bidi dabego Molek saibao, duga te tibo god, te gasa kantriba sela pelama, kalabus igi paibao, te aga pris dabe dali me, dage Amon tobolu bidi dabe me, te kalabus paibao,” te po wali. 
“Amon, nago koneai, te nago odogo malu bulu te mu polalubao, te nago sesemane sogo nago te bulude wiegi yai nai hauwa pedalubo po minama, te pemene ebao. Nage hagoma ebo we, magi baso nago te tiwai po wabo dawe? Nago te naga mone me doado bagede homu kone palama te po wali, ‘Dego ena dali hwįagasaibawe?’ wali. 
Tialima, odao. Ena God, Tigidali Bomo Elalubo Genuai Bidi, eno po dolo obao, te nage pąde bidibo hani tigidali eno hodolama, te augwaligo nage wi dwai mu ilagasaibao. Te augwaligo dage Amon dabe sela sąbaso, te dage tigidali tǫ habuba wi tedela pelawaibao. Te dage ma sisinabo bidi meni yaibao,” wali. 
“Tialima, nosali eno dage bidibo te wiegi yai ma pedalumainogo yaibao. Ena Genuai Bidi, eno te po wai dao,” wali. 
Genuai Bidigo te Idom kantride po elalubao. Tigidali Bomo Elalubo Genuai Bidi, agai te tiwai po wali, “Magi yaliwe? Te Teman hanu we bidi dabego te wiegi yai homu kolesaga munu me elalubo homu meni da, agawe? Te augwaligo wiegi yai homude koneani kolesaga te hagawali da, agawe? 
Dage Dedan we bidi dabe, dage te taun tagalama, wi peyu, tama te masigi ola be dabeba geme bugagia duala sigi pao. Magi baso meni. Ena Genuai Bidigo eno te dene mabo sę ebo sogo mu te Idomba pedelaibao, dage Isogo hani, te dage dolaibao. Te sogo eno te dagego dwai kolesaga yali wei ponaibao,” wali. 
“Te bidi dabego te wain du ina yani tau yai sagasobo sogo, te augwaligo tigidali me sogobeo. Menio. Te meba augwaligo ela soaibao. Te nai wi sabo bidi hulide asu, te augwaligo godolo yali nai naga sabo dao. 
Tialima, eno te Isogo wąį nǫų hani dabeba dwai dene mabo sogo, eno dagego nai doado bage tigidali dolaibao. Eno dagego geme duala sabo pesage tigidali dolama, te dage geme ma duala sogobeo. Te dage Idom badi, te dage pąde bidibo hani dabe, dage tigidali dolaibao. Tama te Idom hani tigidali mu silaibao. 
Tialima, dage Idom dabego duga wai puluba dabede homu si me igio. Te aya dage isibaso da, te ena digi eno dagego wai puluba dabe tonalueibao. Te dagego we dabe augwa digi ena nogoba mumainogo yaibao,” wali. 
Genuai Bidigo te tama po wali, “Eno te hauwa we bidi dabeba te dwai dene mabo sę yaibao. Te augwaligo dwai sę genuai me isąbadi tagalao, te eno dene augwaliba mawaibao. Te Idom, nago homugo eno nage ela soaiba homu eba, agawe? Mu menio. Eno nage me ela soagobeo. Eno nageba me te dene mawaibao. 
Ena Genuai Bidi, te ena nogide digi eno te tiwai mu po obao, eno te dagego polalubo taun Bosra dwagila mu dolaibao, te aga olo bulu pesage tiwai pedelaibao. Te gasa hani we bidi dabego eno te sę te taun Bosraba yali sę po odama, te augwa wi elama, dwai midigi saibao. Te augwa te Bosrabolo te dwai posobo po waibao. Te hanigo te augwa boi bidi dabede dwai posobo po wabo sogo da, augwa te tiwai po waibao, ‘Dage te Bosra taun dolali tiwai gilama yagameo.’ Eno te tǫ kantri Idom taun tigidali dolama, te dolali te tiwai sesemane elaludaibao,” wali. 
Genuai Bidigo ena Jeremaiabolo walali, te agai te we bidi hani dabeba te po magi po omainogo te bidi me deli tagala palu, te tiwai po walio, “Dage tigidali sisinama, te Idomba hwįgi pao. Hogodama, te boi hwįgi pabo sisi yao,” wali. 
Genuai Bidigo te tǫ kantri Idomba waliyu, te po wai, “Idom, odao. Eno nage te olo nai me tama tiwai te gasa hani we bidi dabe tomode pedalumainogo ilaibao. Te augwaligo nage begela mu dolaibao. 
Nago te gasa hani we bidi dabe wi mu ilama, te nago nage te polalubo mu da homu yali. Tialima, naga digi tibo po ola mawai. Nago genuai taun te bulu du pesage daide ugwadu elaluali. Tialima, te nago taun te ba kemodagego be daide ugwadu sę ebo tiwai elalubo, te tagalao, te nage eno aiyaba kekasa duleibao. Te Genuai Bidi, eno po dao.” 
Genuai Bidigo te tiwai po wai, “Idom dolama, te bidi dabe wi ilibo nai pedelama, elalueibao. Te gasa hani we bidi dabe te badu aselabo sogo, te augwa Idom sulama, te augwa midigi dwai mu selama, nogo hogwayu, te wi umagi mu yaibao. 
Polobadu eno te taun si Sodom me Gomora dolobadi, te pąde elaluali taun dabe me dolali, tama te bulu pesage dabe olo mu tama elaluai. Te ena Genuai Bidi, eno te po obao, te tobage sę naga te Idomba pedelama, tede bidi deli me bidigobeo. 
Te genuai uni hasa laiongo aga bulu tomo buside te wę Jordan tagalama, te sipsip dabe augwa te wiegi yai nosai tubo sę ebo madi pedelaibao. Tama pedelama, polo mu tama te laiongo te sipsip dabe daboa sabo dao. Te tiwai me, deli sogo naga mu tama, eno te Idom dabe augwa tǫde bidali ela gudulaibao. Tama eno te tǫ tonaluabo bidi me deli nigilaibao,” wali. “Eno tama tebo sogo, mena bidigo ena dali konila po waibawe? Te dego eno bomo tobage elalubawe? Te mena tobolu bidigo enaba boi bidi yaibawe? 
Te eno te tǫ pedai Teman we bidi dabeba yabo sę, me te gasa Idom kantri pedai badu yabo sę, te eno homu kone palai elalubo, te bugagia olo muao. Eno te we bidi dali, wai puluba dabe me, tigidali sela sąwaibao, te laiongo te sipsip tigidali ela munama, te augwa tigi kekasa pabo tiwai yaibao. Te Idom tǫgo digi eno te ebo sęde dwai midigi mu yaibao. 
Te kantri tǫ Idom degasa dulubo sogo da, te bugusu wabo genuai pedelama, te tǫ mumunu ilama, te mali ebo tiwai ilaibao. Tama te Idom dabego gela u wabo te genuai pedalubo sę eyu, te mama yai tamu ąį Retsi wabo tamu ąį dąįba usu nugi paibao. 
Te boi bidi dabe umagia aselama, te Bosra taun dolainogo ebao, te ba kemodage ugwaba bola holama, te tobolu nisiba mage bula selama, aiyaba dulama, te aga bogo diligasa dulu, te hasa bolo elibo tiwai yaibao. Tama te sogo te Idom ami dabe wi elama, homu si yaibao, te we dabego wai ame nainogo tigi dene ebo tiwai yaibao,” wali. 
Genuai Bidigo te kantri tǫ Damaskusde po elalubao. Agai te tiwai po wali, “Te taun Damaskus taun si Hamat me Arpat we bidi augwaligo te dwai nai augwaliba pedelabo po odama, te augwali midigi dwai mu yalio. Augwali wi ebaso, te bugagia me dugulalubeo. Augwali te tiwai te nambisde genuai ąį dini asu, te bugagia bidisąbo tiwai ebo dao. 
Te Damaskus taun we bidi dabe te bomo mu meni yani. Augwali te we me deli wi painogo ebo tiwai yali, tialima aga te wi dwai mu elama, te aga usu ebeo. Augwali te genuai dene me sęgę elaluali, te wego wai tega painu dene ebo tiwai yai dao,” wali. 
Te taun Damaskusde bidali bidi me deligo te po wali, “Te taun da, genuai nogi elalubaso, te ena wiegi yai pemene yali. Tiali goli, te boi bidi dabe teba pedalubaso, te magi baso te we bidi augwali te taun tagalama, wi pabewe?” te po wali. 
“Ena Tigidali Bomo Elalubo Genuai Bidi, eno po dolo obao, te sogo te boi bidi dabego te Damaskus gesi ogwa bidi dabe ela munama, te augwali bidi sisinama, po mibo pesagede degasa pai munalua paibao. Te boi bidi dabego te Damaskus ami bidi dabe tigidali ela muaibao. 
Eno te taun Damaskus bagulali obo isigo ulama, tama te isigo te king Benhadatgo bomai be dabe me siago daibao,” wai dao. 
Genuai Bidigo po te Kedar hanide me te wa pai tǫ pedai Hasorde elalubao. Te Babilon king Nebukatnesargo boi hwįnama, te hani dabe aiyaba elaluai. Hasia bolo God Genuai Bidigo te Kedargo boi bidi dabeba te po walali, “Dage hogodama, te Kedarba boi hwįgi pao. Te giliga pedalubo pedai badu te we bidi mu silao. 
Te ugwa be dabe, me te augwaligo sipsip dabe, me te ugwa bede mubo ugwa dabe, me te augwaligo gasa nai dabe selama, te sela pao. Te augwaligo kamel dabe me sela pao. Te augwaliba e tama i wao, ‘Te dage wi ilibo nai, te tigidali badu elalubao.’ Te po augwaliba i wao,” Genuai Bidigo te po wali. 
Tama Genuai Bidigo te taun Hasor we bidi augwaliba te tiwai po wali, “Dage wi peyu, te digibulu mu masigi ola be dabeba geme bugagia duala sigi pao, magi baso meni, te Babilon king Nebukatnesargo agai dage dolabo sę yabo nai dabe te homu konea sai elalubo dao,” wali. 
Genuai Bidigo te Babilon dabeba te tiwai po wai, “Dage hogodama peyu, te bugagia dugulalu, te magi nai me delide homu kone isąbo hani we bidiba boi hwįgi pao. Augwaligo taun obo meni dao. Te gasa hani we bidi dabe augwali pąde me bidibeo. 
Dagego augwaligo te kamel dabe, me genuai bulmakau hani dabe, me sipsip dabe tigidali me sagameo. Te augwa gebo badu tobolu nisi pęwadage togobo bidi hani dabe eno sela sąnama, te augwali tedela paibao. Ena Genuai Bidigo, eno te tǫ pedai tigidali badu boi bidi pedalumainogo ilama, tama te dene mabo sę ebo sogo mugo te Hasor dabe gegaibao. 
Tama Hasor te uni yowigo bulu pesage pedelama, te aga dolali sesemane tama elalueibao. Tama te taun olo mu elalu, tede bidi me bidigobeo,” wali. 
Genuai Bidigo te tǫ kantri Elamde po elalubaso, tama agai te po te profet Jeremaiabolo mawai, te Sedekaia te Juda king bidali sogo dao. 
Tigidali Bomo Elalubo Genuai Bidi, agai e tama po wali, “Enesigi da, te Elam dabego boma pai nai dao, te augwaligo boi bidi dabe aiyaba elalubo bomo mu yai. Tiali goli, te eno augwaligo enesigi togwaibao. 
Eno te boi bidi dabe tigidali badu hodolama, te augwaligo Elam dabeba boi hwįagasaibao, te bomai waligo augwali dolagasobo tiwai yaibao. Te Elam dabe eno te tigidali tǫ pedaiba tedela pelama, te tigidali tǫ kantride te Elam dabe meba bidada paibao. 
Te augwali ela muabo boi bidi dabe subo sogo, eno te Elam dabe augwali wi mu ilaibao. Ena Genuai Bidigo, eno te dwai nai mu te Elamba pedalumainu elama, te eno haliga sębę ola mawaibao. Te bidi dabego augwaliba boi bidi ilibo sę eyu, augwali ela mumainogo yaibao, te tigidali isiboba usu naibao. 
Ena Genuai Bidi, ena dugabo sia king te Elamba munama, te eno Elam king dali, te aga ofisa dabe dali ela muaibao. 
Tialima, te nosali sogo eno te Elam bugagia ma dugulalubo sę pedelaibao. Ena Genuai Bidi, eno te po wai dao,” wali. 
