﻿Jeremaia.
50.
Genuai Bidigo te kantri Babilonde po elalubao, te Kaldia dabego tǫ kantri, tama agai te po profet Jeremaiabolo mawai. Tama Jeremaiago te tiwai po pusali, 
“Tigidali we bidi haniba pelama, te po pusao. Te ugwa plak ugwaba sao, te bidi dabego sulama, te po odagasomainao. Te po geme dualubo tagalao. Augwaliba te tama po wao, ‘Te boi bidi dabego Babilon salio. Bel, te Babilon dabego tibo god, aga hale dwai mu yaibao. Te god Marduk me te midigi dwai mu saibao. Te Babilon dabego dwai tibo god dabe te hale dwai mu elama, te midigi dwai mu saibao.’” 
Babilon dolaibao, magi baso meni, bidi hani me deli te not badu pedai tagalama, te Babilonba hwįagasu asaibao. Te boi bidi dabego te Babilon mu dolama, te olo bulu pesage pedelai elalueibao, tama tede bidi me bidigobeo. Tigidali bidi me hasa te Babilon tagalama, te wi paibao. 
Genuai Bidigo te tiwai po wali, “Te sę dabe te Babilonba pedalubo sogo, te Israel we bidi me Juda te sisinama, gela weyu, te augwa Genuai Bidi, God ena gegaibao. 
Augwali te Saion bulu duba painogo da, teda augwa teba pabo sunumi hanalu waibao. Te augwa te tiwai po waibao, ‘Tegoba, da pelama, te Genuai Bidi dali po dąų wagi pelainao, te da aga hani we bidi bidaibao. Tama te dąų wali bomo yai po sesemane elalueibao, te bidigo agade homu kone me gegeda palama tagalamu dao.’ Augwaligo te sogo te po waibao.” 
“Eno we bidi dabe augwali te hagawai sipsip hani tiwai bidali. Te augwali tonaluali bidigo augwali te wiegi yai sunumi tagalomainogo ilama, te bulu du pesagede tedela palama, bilaluali. Augwali te bulu dude bilalu, te augwali toma tuabo madi te homu kone me ebeo. 
Te subigila bidi hanigo augwali sulama, te augwali dolali. Tama te boi bidi dabego te tiwai po wali, ‘Te dago augwali dolabo page elalubaso, me dolobeo. Magi baso meni, augwa digi te Genuai Bidiba dwai sę yali. Genuai Bidi da, te augwali bugagia toma neyu, bidabo pesage tiwai elalubao. Te augwa wąį nǫų dabego konealubo homu dąų olama, te agai augwali tau somainogo tonaluai. Aga te augwaligo Genuai Bidi dao,’ te boi bidi dabego te po waibao,” wali. 
Genuai Bidigo po ma weyu, te tama po wali, “Dage Israel me Juda, dagego te Babilon tagalama, wi piyąo. Dage poligibu te gasa kalabus bidi dabe tudiba ilao, te omai meme poligibu te gasa meme dabe geanobo tiwai yao. 
Dagego Babilon tagalao, magi baso meni, eno te not pedai badu te haniani tǫ kantride bomai bidi hauwa hodolama, te augwali odasa aselama, te Babilonba hwįagasomainogo yaibao. Augwali te lainde wasilama, te hwįnama, te Babilon dabe aiyaba elalueibao. Te boi bidi hani augwaligo te enesigigo hwįbo mu konea pai bidi, te augwaligo ene enebo sogo da, te munu me geda mugobeo. 
Te augwaligo te Babilonde wiegi yai nai dabe umabo saibao. Te deli deli bidigo te nai hauwa mu selama, te augwa homu godolo yali te mu siminaibao,” te po wai. 
Genuai Bidigo e tiwai po wali, “Dage Babilon, dagego eno tǫ kantri dolama, te eno we bidi hani augwaligo doado bage sali. Te dage pemene umagi mu yai, te bulmakaugo agai te wit dili ge agaga pabo sogo te nai meba tuyu, aga pemene ebo tiwai yali. Te dagego i wabo dagą genuai weyu, te omai hos dabe gą wabo tiwai yali dao. 
Tialima, dage Babilongo tǫ kantri te hale dwai mu elama, te aga genuai nogi elaluali mu tulalueibao. Te aga tǫ kantri dwai mu elalu, te gasa hani we bidi tigidali tomode nogi elalugobeo. Te tǫ wa pai bulu pesage te olo bulu pesage elalueibao. 
Ena Genuai Bidi, eno dageba haliga sębę umagi mu elama, eno te tiwai sę ilibaso, te dagego tǫ kantri dolama, tede bidi me bidigobeo. Te gasa hani bidi dabe teba pedalubo sogo, te augwaligo dage Babilonba pedelali dwai sę sulama, te augwali midigi dwai mu elama, nogo hogwayu, te wi umagi mu yaibao,” te po wali. 
Genuai Bidigo te Babilongo boi bidi dabeba e tiwai po wali, “Dage te enesigigo ene enebo mu konea pai hani dabe, dagego te genuai taun Babilon bagulama, te lain wasilama, boi hwįao. Dagego enesigi umagia kekelama, te ene hauwa agaba enao. Dagego te taunba umabo sę mu yao, magi baso meni, te Babilon dabego ena Genuai Bidiba dwai sę ebo dao. 
Te dagego agai bomai bagulali obo aluali sogo, te agai ma hwįabo hagela ebaso, te dagego aga somainogo gogola tagalali, tialima, dagego te tigidali pedai habuba genuai dagą olama, i waiyąo. Tialima, megi da, dagego aga mu dolao, te agai gasa hani dabe dolali tiwai yao. Dagego agabolo te dwai dene mabo sę umagia mu ilao, magi baso meni, te kolesagade ena Genuai Bidi, eno agabolo te dwai dene mabo sę ilibo dao. 
Dagego te Babilon tigidali silao, te nai wai bulabo bidi deli me bidisąma, te inayani nai sabo bidi me meni yaibao. Te Babilonde bidali gasa hani we bidi tigidali, augwali te dage Babilon dolobo sę ebo bidi dabede wi mu yaibao. Te augwa Babilon tagalama, te augwa page buluba ma pelama, te augwa hani we bidi dabe dali digi bidigi paibao,” te po wai. 
Genuai Bidigo e tiwai po wai, “Israel te sipsip me deli tiwai, te gasa tǫ kantri dabe te laion tiwai elama, aga dolainogo elama, te augwaligo aga pobeali. Hasia te Asiria kingo aga pageabi elama, tuali. Te nosali, te Babilon king Nebukatnesargo te agai nogo sągą dili dabe halua tuai dao. 
Tama tibaso, ena Tigidali Bomo Elalubo Genuai Bidi, ena te Israelgo God dao, eno obao, eno te Babilon kingba dwai dene mabo sę te agai bulu tǫ kantriba yaibao, te eno polobadu te Asiria kingba dwai dene mani tiwai gilama yaibao,” wali. 
“Eno te sipsip Israel te aga page buluba ma odasa asaibao, aga te bulu du Karmel, me te tǫ pedai Basan, me te Efraim bulu du pesage, me te tǫ Gileat pedai, te bulu dabede wiegi yai nosai tumainogo yaibao,” wai. 
“Te ena Genuai Bidi, eno te po obao, te sogo eno te dwasianu hani Israelgo sęgę sela sąyu, te augwali bugagia bidimainogo yaibao. Tama me, eno te Judago yali dwai sę sese sela sąwaibao. Tama te dwai sęgę ma dwai sę te augwalide me elalugobeo. Te bidi dabego augwali hani siba po kisilama obaso da, te usu me egobeo,” Genuai Bidigo te po wai. 
Genuai Bidigo te Babilongo boi bidi dabeba e tama po wali, “Dagego te Babilon augwaliba hwįgi pao. Te Merataim tǫ, me Pekot tǫ, te bulu si we bidi dabeba hwįao. Te augwali elibo sę umabo eyu, te augwaligo nai doado bage dolao. Dagego eno po tigidali wali piąo. 
Odao! Te hwįbo u wabo genuai pedaluali, te tǫ kantri mu dolobao. 
Babilon te hama me deli tiwaigo te gasa tǫ kantri dabe pepeda sąbo tiwai yali. Tialima, megi da, dage te Babilongo boi bidi dabe, dagego te Babilon pepeda sąnama dolao. Te gasa tǫ pedai kantri hani we bidi augwaligo aga subo sogo da, te augwali midigi dwai mu saibao,” te po wai dao. 
Genuai Bidigo e tiwai po wali, “Babilon, eno nage tola sabo hagani mubo wa me deli muani, tialima, aga menade elalubo nago me konebeo. Nago ena Genuai Bidiba boi bidi yali, tibaso, nago tede konesiąbadi te hagani muani wago nage polo tola saibao,” te po wai. 
Genuai Bidigo Babilonde haliga sębę elama, te agai hwįbo nai mubo be te agai sunumi dalama, te boi hwįbo nai doado bage sali. Magi baso meni, God, Tigidali Bomo Elalubo Genuai Bidi, agai te genuai sę me deli te Babilonde yabo elalubao. 
Dage tigidali pedai badu bidibo boi bidi dabe, dagego te Babilonba hwįagasiąo. Dagego te wit nai mubo be dabe tigidali aluao. Tama te Babilongo nai doado bage tigidali selama, te bidigo wit dabe pesage du holobo tiwai gilama yao. Tama te nai dabe dagego mu dolao. Dagego te bidi deli me elalumainogo me sula tagalamu dao. 
Te Babilon bomai ami tigidali ela silao, te bidi dabego te bulmakau omai dabe ela wialubo tiwai yao. Tigidali dolomainao, magi baso meni, te Genuai Bidigo augwaliba dwai dene mabo sogo te pedalubao. 
Te Israel me Juda meba te Babilon taga soyu, te Saionba wi ma asali. Odao! Augwa e tiwai po obao, “Genuai Bidi dena God, agai be dolali hani dabeba te dwai dene wei ponama, mabo dao,” wabo. 
Genuai Bidigo Babilon augwa boi bidi dabe e tiwai po walali, “Dage te enesigigo enebo mu koneai bidi dabe, dagego te Babilonba hwįagasao. Dagego te Babilon bugagia odogolama, bagua sao. Dagego te Babilon dabe me deli wi pomainu me elamuo. Te augwaliba dwai dene mayu, dagego ela munama, mu dolao, te augwaligo gasa hani dabe dolali tiwai yao. Magi baso meni, Babilongo te enaba hagoma eyu, te hasamani tigi gagea pabo tiwai mu yali, te Israel dabe augwa Genuai Bidi dao, ena te magi dwai sę munu me isąwai te wiegi yai doloba pai kolesaga ebo God dao. 
Ena Genuai Bidigo, eno po dolo obao, te sogo dage boi bidi dabego te Babilon gesi ogwa bidi dabe ela munama, te bidi sisinibo bulu pesagede pągąnalua paibao. Te dagego Babilon ami bidi augwali tigidali ela mueibao,” te po wai dao. 
“Babilon, nage te hagoma ebo tǫ kantri, ena te Tigidali Bomo Elalubo Genuai Bidi, eno po dolo nageba obao, eno nageba boi bidi ebao. Te eno nagebolo dwai dene menama, nage ela muyu ebo sogo, te pedelai dao. 
Nage te hagoma ebo bulu tǫ kantri, te nage tula munama dolaibao, te nage ma hodolabo bidi deli me meni yaibao. Te eno nago taun dabe isigo ulama, tama te siago nago doado bage tigidali daibao,” te po wai. 
Tigidali Bomo Elalubo Genuai Bidi, agai te tama po wai, “Te boi bidi augwaligo te Israel me Juda aiyaba mu elaluai. Te boi dabego augwali kalabus ilama, augwali tagala palabo homu me ebeo, tede hagela homu ebao.” 
Tialima, te augwali ma sabo bidigo, agai bomo elaluai, agai nogi e tiwai dao, Tigidali Bomo Elalubo Genuai Bidi dao. Agai bomonama eyu, augwali tau selama, te augwa boi bidi dabe aiyaba elaluaibao. Te agai tigidali bulu tǫ kantri we bidi augwaliba te bugagia homu tegaluama bidabo sogo mawaibao, tiali goli, te Babilon dabe me tegobeo. Menio. Agai augwali te dwai mu tama bididumainogo yaibao. 
Genuai Bidigo e tiwai wali, “Te bulu tǫ kantri Babilon dolomainao. Te Babilon we bidi augwali te augwa tobolu bidi dabe me, kolesaga koneai bidi dabe dali, bobobage hwągo dolomainogo yao. 
Te Babilon tibo profet bidi dabe dolama, augwali te esela pabo bidi tiwai pedalumainao. Te Babilon ami bidi dabe dolobaso, te augwa wi dwai mu yaibao. 
Te Babilongo hos me kekebo karis dabe te dolomainao. Te gasa hani ami bidi dabego te Babilon tau sali, te ami tigidali dolaibao. Augwali te we dabe tiwai elama, bomo meni yaibao. Te Babilongo wiegi wiegi yai doado bage tigidali dolao. Te boi bidi dabego sagaselama, sela paibao. 
Te poi pibo sogo bobobage sesabi elama, te Babilonde elaluama, te agai wę tigidali sula somainao. Magi baso meni, te tibo god dabego piksa te tǫ kantride pągąnaluali. Te Babilon augwaligo te tibo god dabe wali pidubaso, augwali te esela pelama, wabo pabo bidi tiwai pedelaibao. 
Tama tialima, te Babilonde bidi munu me bidisiąbadi, te nosali sogoba me usu nama, tama tiwai elaludaibao. Te uni hasa dabe, me uni yowi dabe, me te dwai ba dabe naga bidalueibao. 
Polobadu eno te taun Sodom me taun Gomora dolali, te taun dabe augwali pąde elaluali me, te megi da, te bulu dabe olo pesage elalubao. Te ena Genuai Bidi, eno obao, te tobage deli sę naga te Babilonba pedelama, tama tede bidi me bidigobe dao,” te po wai. 
“Suao! Te ami dabego te not badu bidali tagalama, asainogo ebao. Augwali te bomai hani mu te king hauwa elalu, te digibulu mu bidibao. Megi da, augwaligo te boi hwįabo nai sisi ebo dao. 
Augwali te homu dene eyu tau sabo kolesaga me isąbo bidi dao. Augwaligo te gasa bidi dolabo homu godolo yaibao. Augwaligo te enesigi me ene tolalubao. Augwali te hos dabede dugulasa asaibao, tama te genuai kulukulu pedelaibao, te nambisde genuai ąį dini dabe bugusu wabo tiwai yaibao. Augwali te lainde wasilama, te dage Babilon bageba hwįainu sisi elalueibao. 
Babilon kingo te boi hwįabo boi bidi dabe asobo u wabo odama, aga te wi mu elama, te aga nogo sągą dili kimi meni yaibao. Aga wi elama, te kone palobo dwai mu yaibao, te wego wai ame nainu tigi dene ebo tiwai mu pedelaibao,” te po wai. 
“Te polo tama naga, te eno Babilon dabe augwa tǫde sela sąyu, te laingo sipsip dabede ebo tiwai yaibao. Laion aga te wę Jordan busi tomode bidali tagalama, te sipsip dabe nosai tubo pesageba polo mu pelama, pobeasa bilibo tiwai yaibao. Tama eno te tǫ tonaluabo bidi me deli nigilaibao. Eno te tama tebo sogo, mena bidigo ena dali konila po waibawe? Te dego eno bomo tiwai elalubawe? Te mena tobolu bidigo ena dali boi bidi yaibawe? 
Eno te tǫ kantri Babilonba yabo sę homu kone palali elalubo, tede elalubo po te bugagia olo muao. Eno te tigidali we bidi me wai puluba dabe sela sąwaibao, te laiongo sipsip tigidali ela munama, te augwa tigi kekasa pabo tiwai yaibao. Te Babilon tǫ digi eno te ebo sęde dwai noma mu saibao. 
Te boi bidi dabego te Babilon sabo sogo, te genuai u pedelama, te tǫ mumunu yaibao. Tama te Babilongo gela wabo te genuai umagia mu pedelama, te gasa hani we bidi augwaligo odaibao,” wai dao. 
