﻿Esekiel.
3.
Te Godigo enabolo te tiwai po wali, “Tǫde bidio, nago te buku tuao. Tama nosali nage pelama, te bukude po te Israel we bidi augwaliba pusugi pao,” wai dao. 
Tialima, eno pedauwali a olama, agai te buku enabolo mawai dao. 
Tama agai te tiwai po wali, “Tǫde bidio, megi eno nagebolo te mabo buku nago tuao. Nago haliga tego pągąnao,” wali. Te eno tuali, te eno pusu mu yali, te ganima bunu ge pusu ebo tiwai yalio. 
Nosali Godigo enabolo te tiwai po wali, “Tǫde bidio, nage te Israel we bidi augwaliba pelama, te eno nagebolo pusali po tigidali pusao. 
Eno nage te haniani gasa gasa po wabo we bidi haniba me nage tagala palobeo. Menio. Eno nage te Israel we bidi augwali naga bidiboba tagala palobao. 
Te eno nage te genuai genuai tǫ pedai kantri te nago konesiąwai we bidi hani augwaliba nage eno tagala paligi sogo da, teda te tǫ pedai kantri we bidi augwaligo nago po wali pigi dao. 
Tiali digi, te Israel dabego da, me tegobeo. Te augwali me deligo nago po wali me pogobeo. Augwaligo te eno wabo po digi me odisąwaibao, te magi elama augwaligo nago po odaibawe? Magi baso meni, augwaligo tobolu te masigi dila pai tiwai elalu, te tigidaligo po naga sela sąbo bidi dao. 
Tiali goli, megi te eno nago homu kolesaga te augwaligo homu kolesaga dila pai elalubo tiwai ilama, te nage augwalide didibili homu me egobeo. 
Te eno nage te masigi daimon dila pai tiwai pedalomainu yaibao, te nago bomogo te augwaligo bomo aiyaba elalueibao. Te nage augwalide wi elama, didibili me igio. Menio. Augwali te po sela sąbo bidi dabe naga dao,” te po wali. 
Te Godigo gasa po me weyu, te tiwai wali, “Tǫde bidio, te eno nageba wainogo ebo po tigidaliba olo bugagia muao, te nago po me deli homugo me gegeda pelamu dao. 
Tialima, nage te nage abagi dabe te boi bidi dabego Babilonba sela asali bageba pelama, tama nago te tigidali po ena Genuai Bidi, eno nageba mani po te nago pusao. Te nago augwaliba te tama po wao, ‘Te po God aga po digi dao.’ Nago eno po augwaliba mao, te augwaligo olo bugagia munama odobaso, ma menisąbaso, te tagalao, te nago eno po augwaliba pusa mao.” Te po wali. 
Nosali Godigo Mobo Noma Bidigo ena ugaba sagoasa holali. Te ena tudi badu, te pedauwali me delidu te tiwai i bomonama wabo odali, “Genuai ula me bomo te dagalude bidibo Genuai Bidi elalubao. Te aga nogi ugaba sao,” walio. 
Te me si me si nai te bidi tiwai te bola pabo gagalali, te deli deligo bogo sabi ununulu pelama, te mego bogo sabigo mego bogo sabi badu elali, tama eno te gosege wabo odali. Tama eno te wil kidagalo wabo odalio. Te tigidaligo te kidagalo wabo genuai mu pedalama, te genuai wali u wabo tiwai pedelai dao. 
Tama Godigo Mobo Noma Bidigo ena ugaba sagoa selama, te ena tolasa palio. Te Godigo genuai bomo enaba pedelama, te ena dwai dene ebaso, ena sębę eyu palio. 
Te Godigo Mobo Noma Bidigo ena te taun me nogi Telabipba odasa pali, te ąį Kebar pąde da, te Israel augwali te taunde kalabus bidali. Eno te suali nai dabego ena haliga sęgę dwai mu ilibaso, ena te taunde dugulalu bididualio, tama eno te magi sę me deli yabo bomo meni baso bididubadi, te Sarere deli, te a naga olama, si sogo tama bidai dao. 
Te a naga olama, si, te Sarere deli tiwai wali sogo silibo si da, teda Godigo po enabolo ma mawai dao. 
Agai te tiwai po enabolo wali, “Tǫde bidio, eno nage te Israel dabe tonalubo bidi pedalumainu ilalio. Te eno augwaliba pusabo bomai po elalubaso da, teda eno nageba munama, te nago augwaliba pusagameo. 
Te eno suali, bidi me deligo dwai kolesaga ebaso, eno te po weyu, aga isimainao po obaso da, teda nago te dwai kolesaga yali bidi agabolo pusao. Nago agabolo waliyu, te aga homugo ebo kolesaga hasegelibaso, te aga me hagagobeo. Te nago agabolo walisąbaso da, teda aga sęgę te tiwai naga elalubadi, te aga isaibao. Tialima, te eno gedude da, te aga isabo page nagede elalubaso te aga isali dao. 
Tialima, nago te dwai sę yali bidi agabolo te po pusao, tama aga te dwai kolesaga tagalisąbaso da, teda te dwai kolesagago aga dolama, te aga isaibao. Tiali goli, te page nagede me elalubeo, tiyu nage me isigobeo,” wali. 
“Te eno magi usu sabo sę me deli te wiegi yai bidiba pedalumai hagede sula tagalabaso, tama agai te doloba pai kolesaga tagalama, te dwai kolesaga ebaso da, teda te tebo sogo nago te bidibolo te dwai kolesaga ebo tagala po walao. Te nago agaba wasiąbaso da, teda aga dolama isaibao. Eno agai polobadu te yali wiegi yai kolesagade homu kone me palogobeo. Menio. Te eno agai megi te ebo dwai kolesaga sulama, te eno aga dolomainu sula tagalobaso, te aga dolama isaibao. Tialima, eno gedude te aga isabo page te nagede elalubaso aga isali dao. 
Tialima, nago te wiegi yai bidi me deliba te po bomonama, te dwai sę igio po obadi, tama agai te po wali pelama, te dwai sę me isąbaso da, teda aga me isigobeo. Te nage me nage bugagia bidaibao.” Godigo te po enabolo wali. 
Ena te bulude bididubadi, tama te Genuai Bidigo bomo enaba asida walio. Tama agai enabolo te tama po wali, “Nage hogodama, nage te odogo buluba pao,” wali. “Nage teba sabalobo si da, teda eno po nage dali waibao.” 
Tialima, ena hogodama, ena te odogo bulu pali, tama te badu eno te Godigo genuai ula pedalubo suali, eno te wę Kebar pąde suali sę tiwai yalio. Tama tibaso, eno gesabidi te tǫba pǫgulai dao. 
Tialima, te Godigo Mobo Noma Bidi enaba aselama, ena hodolobaso, ena dologulali. Tama Genuai Bidigo enabolo te tiwai po wali, “Tǫde bidio, naga buluba pelama, te naga be tomoba bula sigi pelama, te sunumi paliao,” wali. 
“Tama nosali bidi mebago te dila pai haliga seselama, tama tego nage kęnaibao. Tama nago te be tagalama, te we bidi dabe augwali sugi painu ebo usu me egobe dao. 
Te eno nago pedauwali pania somainogo ilama, tama te po sela sąbo bidi dabeba te nago po bomo elama, augwaliba me weyu, augwaligo te dwai kolesaga tagalao po bomo elama me wagobeo. 
Tiali digi me sogo eno homugo nago eno po te we bidi dabe augwaliba pusumainogo ebo sogo da, teda te eno nago po wabo usu ilaibao. Te nago augwaliba te tama waibao, ‘Te po da, te Genuai Bidi God aga po da.’ Te nago po augwaliba pusubo si da, te mebago nago po odaibao. Tiali digi, mebago nage tudiba mueibao, magi baso meni, augwali te po sela sąbo we bidi dabe naga bidibao,” te po walio. 
