﻿Esekiel.
6.
Genuai Bidigo enabolo te tama po wai, 
“Tǫde bidio, nago te Israel dabe augwaligo bulu du dabeba tonono eyu, te eno po augwaliba pusao. 
Te Israel dabe augwaligo bulu du dabe, me odogo bulu dabeba te tama po wao, augwaligo te ena God Genuai Bidigo, eno augwaliba wainogo ebo po odiąo po wao. Eno te boi bidi dabe tagala palama, te Israel dabe augwaligo te tibo godiba lotu wagi pabo bulu du dabe dolaibao. 
Te boi bidi dabe augwaligo te kibu dabe ofa ebo alta tigidali, me te wiegi yai denami ilibo ofa ebo alta me tigidali dolaibao. Tama augwaligo te Israel we bidi hauwa ela munama, te augwali tigi dabe te augwa te tibo god dabego piksa noma elalubo pąba sąsąwaibao. Tama te augwali dili dabe augwa te alta tǫde pąde wilalua paibao,” te po wai dao. 
Agai po ma weyu, te po wai, “Te boi bidi dabe augwaligo te Israel tǫ kantri taun tigidali dolobadi, te tibo godiba lotu wabo pesage tigidali me dolaibao. Augwaligo te dagego alta tigidali dolama, te duga gedude meda yai mu elalueibao. Te augwaligo te dagego tibo godigo piksa noma dabe mu dola silama, te wiegi yai denami ebo pauda ulubo pesage dabe aluama, besela sąwaibao. Tama te Israel dabego yali dwai kolesaga tigidali te sia saibao,” po wali. 
“Te boi bidi dabe te Israel tǫ kantri pedai tigidaliba pelama, te we bidi hauwa ela mueibao. Tama te gasa Israel dabego te tama tebo sę bugagia te tiwai koneyu, ena digi ena te Genuai Bidi dao po waibao,” wali. 
“Tiali goli, te boi bidi dabego te we bidi tigidali ela mumainogo me egobeo. Me badu we bidi bidalubadi, te eno gasa tǫ kantriba ela gudulama, tedela palaibao. 
Augwali te digibulu bulude bidibo sogo augwaligo ena homu kone palaibao, tama augwa te tiwai koneaibao, te augwaligo tibo godiba gedu eyu, te wali pali kolesagago ena haliga sęgę mu ilama, tama ena augwaligo mu tagalalio. Tama augwa te yali dwai kugumini yai kolesagade hale dwai mu eyu, tama tiai sę yai dao. 
Tama augwa te tiwai tama koneagasu, ena digi ena augwa Genuai Bidi bidibadi konesiąma iduai yabo po waibao. Tama augwa te tiwai koneama, eno megi e wabo bomai po, te olo po me ola tagalu wabe da homu yaibao,” te po walio. 
Tama God Genuai Bidigo te tama tiwai po enabolo ma walio, “Nogo hogwayu, te haliga sęgę ebo iliyu, te tiwai po wao, ‘Hobede mu ebao, te Israel augwaligo dwai kolesaga hauwa mu yalio,’ te po wao. Awe, augwaligo te tobage kolesaga ebaso, tama tiyu, te boi bidi dabe aselama, augwali ela muagasaibao. Tama te nasigo me gasigo augwali dolaibao. 
Te tigidali isimainu yaibao. Te boi bidi dabego augwali ela muagasaibao. Tiali goli, te me badu digibulu bidali da, augwali te gasi selama isaibao. Te we bidi me badu bidalubadi yai baso da, te augwali me te nai mu sǫą pelama, te nasi elama isaibao. Te tebo kolesaga ebogo te eno haliga sębę yali mu usu naibao. 
Te boi bidi dabego te Israel dabe augwaligo tigi te augwa tibo god dabe me te alta dabe pąba sąsąwaibao, tama te lotu wabo pesageba me, te bulu du dabe daide me, te tigidali genuai ni dabe dologoba me, te augwa tibo god dabeba te ofa dabe ula mabo pesage tigidaliba te augwali isasa pali bidi dabego tigi sąsą paibao. Te sogo te tigidali Israel dabego koneama, ena digi ena Genuai Bidi bidibao po waibao. 
Awe, te eno augwaligo tǫ kantri pedai mu dolaibao. Te eno augwaligo tǫ pedai tigidali te olo bulu pesage tiwai pedalubo yaibao, te tǫ wa pai bulu Diplatde gagalaibao. Eno te Israel dabe bidibo bulu pesage deli me sula tagalogobeo. Menio. Te eno tigidali dolama, te tigidali olo bulu pesage naga elalueibao. Tialima, te we bidi tigidaligo bugagia koneama, ena digi ena Genuai Bidi mu bidibo yabo po omainu yai dao,” te po wai. 
