﻿Esekiel.
12.
Genuai Bidigo enabolo te tama po wali, 
“Tǫde bidio, te abagi dabe augwali megi nage dali bidibo bage, augwali te hagoma elama, po sela sąbo bidi dabe da. Augwaligo gedu elalubadi, tiali goli te augwaligo bugagia me tonogobeo. Augwaligo olo elalubadi digi, tiali digi augwa bugagia me odobeo, magi baso meni, augwali te hagoma elama, po sela sąbo bidi dabe bidibaso tebo dao. 
Tialima, megi da, tǫde bidio, nago doado bage sisi ilama, te bidi aga bidali page bulu tagalama, te digibulu buluba kalabus igibu pabo tiwai yao. Te nage be hulia sisąbadi pabo gagalama pobaso, te tigidali we bidigo nage sueibao. Eno homugo nago te sę ebo page te augwaligo konemainu ebao. Tialima, augwali te hagoma ebo bidi dabe da, tama augwaligo te sę ebo page konegobe, eno te homu ebo dao. 
Te giliga nanalubadi te nago doado bage dodolao, te tiwai ebaso augwaligo nage sueibao, augwaligo tononalubadi, teda nago te naga be paialide dedage dogolama, tama te dedagedu te naga doado bage selasa buluba teda soao. Te be pio mu ebadi, te nago doado bage te nagede tolasa te bidibo pesage tagalao, te nage digibuluba kalabus painu ebo tiwai yao. Tama nago ebo sę dabe te we bidi augwaligo sumainu yao. Nage pabo sogo da, naga gesabidi mesega selama, te nago sunumi susąbo tiwai yao. Nago te tama tebo sę dabe ebogo, te we bidi augwaligo homu hodolobo sę ebo dao,” wali. 
Genuai Bidigo po ola simini baso da, teda eno agai enabolo te po wali tiwai sę yali. Te siade eno doado bage dodolali, tama te be pio mu ebo side te eno be paialide te dedage dogali. Eno te nai me deli tolalu te dedage dogobeo. Menio. Eno nogogo naga sę yali. Tialima, ena te dogali dedagedu buluba dįą soalio. Tama te be huliainu ebo sogo, eno ena doado bage selama, te nąba munama, tolasa palio. Tama te we bidi augwaligo eno tama tebo suai dao. 
Te kigamu Genuai Bidigo enabolo te tiwai po walali, 
“Tǫde bidio, te hagoma ebo Israel we bidi augwaligo nagebolo nago te yali sę po page nageba me hanaluba, agawe? 
Tialima, nago te God Genuai Bidigo po augwaliba mao. Eno te kingba dali, te Jerusalemde bidalubo we bidi dabeba pedelabo sę po elalubao. 
Nago te nage dali bidalubo we bidi dabe augwaliba te tama po walao. Nago te tiali sę page te Jerusalem dabeba pedelabo piksa begelama, ela mabo sę yali. Boi bidi dabe te Jerusalemba pelama, te augwali selama, te augwali gasa tǫ kantriba odasa pelama, te kalabus bidi dabe pedelabo sę tiwai page ola mani dao. 
Tama te hulide te Juda king bidi aga doado bage dabe selama, wi paibao. Tama te bidi dabego te taun bagulali obo badu te king bidi te taundu buluba dįą soabo obo dedage dogaibao. Te aga gesabidi mesega selama, te aga pabo sunumi naga sulama paibao.” Te po wai dao. 
“Tiali goli, eno ba bono gaga kekelama, tama king tego tola saibao. Tialima, eno aga te Babilon taunba sela paibao, tiali goli agai e bulu gesabidi me sugobeo. Aga te Babilonde bididubadi aga isibo sogoba usu naibao. 
Te eno aga dali bidali bidi tigidali ela gudulama, te augwali tedela paibao, te aga ami polalubo ofisa dabe, me aga tonaluali ami bidi dabe me, te aga gasa ami bidi dabe me. Eno te boi bidi dabe tagala palama, te augwali pobeasa pelama, te augwali ela muna muna pelawaibao,” po wai dao. 
“Tialima, te hwįbogo me, nasigo me, gasigo me, te Juda tigidali me isila siminigobeo. Menio. Te eno dwasianu hani bidimainu sula tagalama, te augwali eno gasa tǫ kantriba tagala palaibao. Augwa te tiwai tama konemainu yaibao, ena digi ena Genuai Bidi da. Tama te Juda dabego augwa te yali dwai kolesaga po te gasa hani dabeba po mimi paibao. Tama me, te eno tama augwaliba te dwai dene mani po te gasa hani augwaliba pusaibao. Te hani augwaligo me odama, te tiwai augwaligo me bugagia koneama, ena digi ena te Genuai Bidi da omainao,” wali. 
Tialima, nosali Genuai Bidigo enabolo te tama po walali, 
“Tǫde bidio, nage te nai tuyu, ąį tuyu ebo sogo nage midigi yao, tama nago te nage wi dwai mu ebo tiwai mu yao. 
Te nago naga abagi dabeba te tiwai po walao, ena God Genuai Bidi, eno te Jerusalemde bidalubo we bidi dabe augwalide pedelabo sę po obao. Te we bidi augwaligo te augwa abagi dabeba sesemane sogo dwai sę ebao. Tama tialima, te dwai sę ebo bidi dabe augwali te nai me wę tubo sę ebadi, te augwali wi dwai mu elama, midigi saibao, magi baso meni, te boi bidi dabego hwįagaselama, te augwaligo doado bage tigidali te tǫ kantride elalubo da selama saibao. 
Tama augwaligo te taun dabe mu dolama, te tǫ kantri olo pesage tiwai pedelaibao. Te tebo sogo te Israel dabego te tiwai koneama, ena digi ena Genuai Bidi da, augwa te po waibao,” wali. 
Genuai Bidigo enabolo te tama po wali, 
“Tǫde bidio, te Israel dabego sesemane sogo wabo po me deli elalubao wali. Te po e tiwai da, ‘Te profet dabego te po weyu, te nai dabe pedelaibao wali. Tialima, te kibu be hauwa palima, te dago subo augwaligo te wali po mu po menio, geda mubao,’ wali. Tialima, eno te Israel dabego wabo po eno godolo me egobeo. 
Megi nago God Genuai Bidi, eno po augwaliba mao. Te eno augwaligo te wabo po tigidali tagalomainu elama, augwaligo te tama po ma omainu me egobeo. Nago te po hasegeleyu, augwaliba te gesi po me deli mao. Gesi po e tiwai wali, ‘Te profet dabego po weyu, te nai dabe pedelabo po wali. Te megi da, augwaligo po mu pedelaibao,’ wai dao.” 
“Megi da, te Israelde bidalubo profet dabe augwaligo te nade subo tiwai wabo te tibo po obao, te augwaligo we bidi tibo po ola mabo po pusubao. Tialima, eno te kolesaga ebo mu siminaibao,” te po wai. 
“Te ena God Genuai Bidi, ena digi eno te Israel dabeba te po menama, tama eno te po wali sę dabe polo tama pedelaibao. Dage hagoma ebo bidigo, odiąo. Te dage bidibo sogo, eno te sę dabe yaibao. Ena God Genuai Bidi, eno te po wai dao,” wali. 
Te Genuai Bidigo enabolo te tama po ma wali, 
“Tode bidio, te Israel dabego te tama po wai, ‘Esekielgo te nade subo nai tiwai sulama, tama agai te nai dabe pedelabo po pusali. Tialima, agai te po wali nai dabe, augwali te me pedalubeo. Menio. Augwali te nosali mu pedelai dao.’ Augwaligo te po wai. 
Tialima, ena God Genuai Bidi, eno te Israel dabe augwaligo po te tiwai wei ponaibao,” wali, “‘Te eno ma tonalubo sę me egobeo. Eno dageba te po wali nai augwali megi naga eno te sę yaibao.’ Ena God Genuai Bidigo, eno te po wai dao,” wali. 
