﻿Esekiel.
25.
Genuai Bidigo enabolo te tama po wali, 
“Tǫde bidio, nago te Amon dabego tǫba tonao, te augwali dolabo po wao. 
Augwaliba te tama po walao, ‘Dage Amon dabego ena God Genuai Bidigo poba bugagia olo muao. Dagego eno be dolali, me te boi bidi dabego te Israel dabego tǫ dolali me, dagego suali, te Juda dabe selama, te digibulu buluba kalabus igi pali. Tama dagego te sę dabe ebo sulama, tega weyu, wiegi yai homu pemene eyu, dili elebo kolesaga yai dao. 
Tialima, eno te bidi hani me deli te giliga asobo badu asomainu ilama, te augwaligo dage dali boi hwįagaselama, te dagego tǫ saibao. Te augwaligo sel ugwa be dabe te dagego tǫde sę elama, tede bidaibao. Te augwaligo nai dagego tǫde sela tuyu, te dagego bulmakau ame pę dabe sela tuyu yaibao. 
Te eno taun Raba, te dagego genuai taun, te dolama, te kibu kamel dabego nosai tubo pesage pedelaibao. Te tǫ kantri Amon te kibu sipsip dabego obo dabe nigibo pesage pedelaibao. Tama dagego te tiwai koneyu, ena digi ena Genuai Bidi mu da po wagameo,’ te po te Amon bagebolo wao,” te po wali. 
“‘Te eno te sę dage dali magi baso yaibawe? Te ena God Genuai Bidigo te tama po obao. Eno koneani, dagego te Israel dabe godolo homu meni isąwani, te Israel tǫ kantri dolali sogo, dage wiegi yai pemene elama, nogo bada eliyu, wele siyu, kęnę wai dao. 
Dagego te tama kolesaga yali, tibaso te eno dageba dwai dene momainogo te gasa hanigo dage sagasomainu elama, te dageba dwai dene momainu yali. Te eno dage dolobo sę mu elama, tama dage te tǫ kantri me deli bidibo tiwai me egobeo. Te tiwai dagego bugagia koneyu, ena digi ena Genuai Bidi da po waiagameo,’ te po te Amon we bidiba pusao,” Genuai Bidigo enabolo te po wai dao. 
Genuai Bidigo po ma weyu, te tama po wai, “Ena God Genuai Bidi, eno po obao, te Moap dabe me Seir dabe, augwaligo te homu yali, te Juda dabe te gasa hani bidi dabe tiwai si da homu yai dao. 
Tialima, eno te boi bidi dabe aselama, te tǫ kantri dąį pąde elalubo te Moap dabego bomai taunba hwįagasomainu yaibao. Te augwaligo te wiegi yai taun dabe dolaibao, te taun Bet Jesimot, me taun Balmeon, me taun Kiriataim dao. 
Te boi bidi dabe te giliga asobo badu asama, te Moap dabeba me, Amon dabeba dali siba boi hwįnama, te augwali aiyaba elaluama, te augwaligo tǫ saibao. Tama te Amon dabe te tǫ kantri pedai tiwai me deli ma bidigobeo. 
Awe, eno te dwai dene mabo sę te Moap dabeba ebaso, tama augwa te tiwai bugagia koneama, ena digi ena Genuai Bidi mu da po omainu yaibao,” wali. 
Genuai Bidigo te tama po wali, “Ena God Genuai Bidi, eno po obao, Idom dabego dwai kolesaga mu te Juda dabeba wei ponani, tialima te Idom dabego yali dwai sę te genuai mu igi pai dao. 
Te eno megi te po obao, eno te Idom dabeba dwai dene umabo mu menama, te tigidali we bidi ela munama, te augwa kibu sibi dabe tigidali me elaibao, te not badu te distrik Temande gagalama peyu, te saut badu te taun Dedanba usu naibao. Te tǫ kantri Idom olo mu elaluaibao. 
Eno te Idom dabego dwai kolesaga wei ponabo homu yali, tibaso te eno ena we bidi augwali te Israel dabe, te augwali elali boi hwįgi pomainu tagala palaibao. Te kolesagade te Idom dabego eno haliga sębę genuai ebo koneaibao. Tialima, te Idom dabego te tiwai bugagia koneaibao, ena digi eno augwaligo dwai sę yali wei ponobao homu yaibao. Ena God Genuai Bidi eno te po wai dao.” 
Genuai Bidigo po ma weyu, te tama po wali, “Ena God Genuai Bidi, eno te po obao, te bobobage sogo te Filistia dabego te Israel dabe godolo homu me isiąma, te augwaliba boi bidi ebo sę yalio. Te Filistia dabe augwaligo dwai sę wei ponobo sę umabo mu eyu, te augwali mu dolai dao. 
Tibaso, megi da, eno te po obao, eno te Filistia dabe augwaliba dwai dene mabo sę mu elama, tama eno te nambisde bidibo we bidi tigidali mu silabo sę yaibao. 
Eno haliga sębę dwai mu augwalide elama, tama augwaligo yali dwai kolesaga tigidali dolo wei ponaibao. Tama augwaligo te tiwai bugagia koneama, ena digi ena Genuai Bidi dao,” te po wai dao. 
