﻿Esekiel.
43.
Te haniani nai usu sali bidigo ena te giliga asobo badu obo sunumiba odasa pali. 
Tama eno Israel dabego Godigo moni ula elalubo suali. Tama te ula te giliga asobo badu asobo suali. Tama te ula pedalobo si da, eno agai po wabo dogoni te genuai tamu ąį kulukulu wabo tiwai tama eno odali. Tama Godigo ulago tǫ ula genuai mu yali. 
Tama te sę yali eno nade megi ebo eno subo ąǫ yali. Te da te eno polobadu suali te na yali te na tiwai mu ma yali, te aga te Jerusalem dolainu asali sogo, tama te eno te Babilon bulu ąį Kebarde polobadu suali na tiwai ma suali. Eno te ula sulama, tama eno bogoli sugunama, tama eno gesabidi tǫba pogulama elaluali. 
Tama Genuai Bidigo te ula te giliga asobo badu te sunumiba dula pelama, tama Genuai Bidi Godigo be tomoba dula pali. 
Tialima, Genuai Bidigo Mobo Bidigo ena ugwa daboa selama, tama ena odasa, te dwasianu sisinibo pesage Godigo be gesabidi badu te sisinibo pesageba odasa pali. Tama eno Genuai Bidigo boma pai ulago te be pągąna pai suali. 
Tama te bidi ena pagede me dolalubadi, eno po me te Godigo be tomode po wabo odali. 
Te da te Genuai Bidigo pedauwalidu po wali. Tama agai enabolo e tama po walali “Tǫde bidio, eno sia king te be tomode te elalubao. Tama te pesage da, te we bidi augwali aselama, enaba lotu wagasabo madi dao. Ena tigidali sogo ede bidada paibao, te ena we bidi Israel dabe tomode. Tama nosali Israel dabe, me augwa king dabe, augwaligo nosali eno wiegi yai nogi aiyaba munu ma me elalugobeo. Polobadu te we bidi dali, te king bidi dabe dali, augwaligo ena tagalama, te tibo god dabeba lotu po odu geai dao, we bidigo dwai penane sę ebo tiwai yali. Tiali goli, megi da, te augwaligo te tibo godiba lotu po te ugwanu elalubo madide me weyu egobeo. Tama te king dabe augwaligo eno tempel be pąde mu augwaligo be me ma sę yagasiyu me egobeo. Polobadu augwaligo be te tama elaluai dao, tama te king dabe augwali augwa bede isibo sogo augwaligo eno be meda iliyu yai dao. Tama me augwaligo dwai damua pai kolesaga eyu, augwaligo eno nogi aiyaba elaluyu yai dao. Tama tibaso, eno augwali dali sębę elama, tama augwali dolai dao. 
Megi da, te Israel dabe augwaligo tibo godiba lotu me wabo tagalao. Tama augwaligo augwa king eno be pąde isimainu sula tagalamo dao. Tialima, augwaligo eno po wali peyu da, teda ena augwali dali tigidali sogo mu bidaibao,” te po wali. 
Genuai Bidigo ena dali po genina ma weyu, e tama po wali, “Tǫde bidio. Nago Israel dabebolo po weyu, ‘Godigo tempel be e tiwai elalubo eno suali,’ te po olama, tama nago te tigidali suali naide po pusao. Tama augwaligo te be te tiwai elalubo bugagia konemainu eyu, tama augwaligo augwa yali dwai kolesagade hale dwai mu emainu yao. 
Augwali hale eyu da, teda nago augwalibolo eno bede tigidali be habude, me te doado bage dabede po augwalibolo wao. Augwalibolo tigidali te nai dabe magi po weyu, me te sunumi dabe muabo pesage ola mayu, me te be sę ebo kolesaga sese ola mayu yao. Tama augwalibolo te be tomode sę yabo bomai po dabe ola mao. Augwaligo te be te nago suali tiwai dolo mu sę yainogo eyu, me augwaligo te bede elalubo bomai po dabe bugagia wali pomainu eyu, nago te po sese te bukude asęnama, augwali mao.” 
“Eno bego bomai po da e dao. Te be da, te aga pesage te bulu dude tama elalueibao. Tama te be mesalo bagulama elalubo te tǫ te eno tǫ mu elaluaibao, tedali gasagi yai mu elaluaibao. Te eno bego hage yai bomai po dao,” wali. 
Genuai Bidigo po genina ma weyu, te po wali, “Te alta dabego dąį dabe da, te e tama dao. Te wę gamiago e alta bagulai elaluali. Te wę gamia aiyanu dulali te 50 sentimita usu nama dao. Tama aga genuai yali me te 50 sentimita usu nama tama dao. Te wę gamia te dwasianu obogo bogo badu bagulai elaluali. Te obo ugwaba bobobage te 25 sentimita usu nama dao. Te alta dabe nigibo magi te ugwaba mu holai dao. Augwali te e tama tiwai dao. 
Altago bugai sela elalubao. Te aiya badu bugai badu te wan mita usu nama tama dao. Tama tomode te dąį ugwaba holobo te dąį te 2 mita usu nama dao. Tama dage ugwa badu te ofa ebo nai dabe ulabo alta sai dao. Te ugwanu holali te 2 mita usu nama dao.” “Te tomo tigi genuai me bobobage yali, te aiyadu bobobage me genuai tiwai si menio. Magi baso meni. Tomo tigi te tomoba te 50 sentimita usu tomoba ugwa pai dao, te aga tigidali bogo badu. Tama ugwa badu tigi te uganu mu genina 50 sentimita usu nama mu pai dao. Te tigidali bogo badu usu nama, tama te alta ugwadu saide te me si me si dage badu da, te kau kibu gąų tiwai nai te dolalubao. 
Te alta ugwadu daide te genuai yali me, bobobage yali me, te deli tiwai dąį naga yali, te 6 mita usu. 
Tama te alta tomode te genuai yali me, bobobage yali me, te deli dąį usu nama naga dao, te 7 mita usu. Tama te alta tomo tigi bogo badu te dwasianu obo dolaluali. Te obo ugwaba bobobage te 25 sentimita usu nama dao. Te obo te alta tomo tigide te bagulali te ąį gamia bogo badu elalubao. Tama te gamia te genuai te 50 sentimita usu nama dao. Tama te giliga asobo badu te alta daiba ugwa holobo te togobili me deli elalubao,” wali. 
Genuai Bidigo enabolo e tama po wali, “Tǫde bidi, nago ena God Genuai Bidigo po odao. Augwaligo te alta nigibo sę silibo si da, tama augwaligo tede te sese delabo ofa yainu, tama te hasa kaneme dabe te daiba sąbo si da, teda nago e tama bomai po wali pao. 
Nago kau kibu omai me deli selama, tama Sadok hani pris dabebolo mao. Ena God Genuai Bidi eno te po obao. Te Livai hani bidi dabego naga augwali deli naga ena pageba aselama, tama augwali eno sę emainao. Tialima, te pris dabe augwaligo naga te kau kibu elama, tama augwaligo naga te sęgę sela sąbo ofa uluyu emainao. 
Tama nago te kau kibugo kaneme meba selama, tama te altago gąų me si me side munama, tama me alta me si me si dage badu tomode, me te dwasianu obo te alta tomode bagulali tede mubadi yao. Tama nago te ebo kolesagago te altago meda sela sąyu, tama te alta eno gedude wiegi yai pedalaibao. 
Tama nago te kau kibu tigi mi selama, tama nago augwaligo te sa muani te pesagede ulao, te eno tempel be bulu badu elalubo, te pesage. 
Tama pilama, nosali te si wabo sogo da, te sogo da, teda nago meme kibu omai kenigo agai tigi me dolisąwai selama, tama sęgę sela sąbo ofa yao. Tama nago te meme kibugo kaneme selama, tama nago kau kibu kanemego yali te kolesaga tiwai ma yao, te alta meda sela somainu yao. 
Nago te sę polo elama da, teda nago gesi kau kibu omai me deli, me sipsip kibu omai me deli te kenigo augwaligo tigi me dolisąma yai selama, 
tama nago augwali si ena pageba sesao. Tama te pris dabe augwaligo tamu te ela muani kibu si tigi miba nogogo telala pelama, tama augwaligo isigo mu dela silibo ofa ulumainao. 
Tama te sogo gagalama, te dei namba 7 wabo sogoba usu nama, nago te meme omai me deli sesao, te sęgę sela sąyabo ofa tiwai. Tama me kau kibu omai, me sipsip kibu omai deli me te isigo mu dela silabo ofa tiwai sesao. Nago wiegi yai hasa dabe naga sesao, te keni dabego augwaligo tigi dabe me dolisąma yai dabe sesao. 
Te a naga olama si sogo te pris dabego te tobage ofa idubadi geaibao, te alta meda sela sąyu, te eno gedude wiegi yai pedalobo siba usu naibao. Tialima, augwaligo te ebo kolesagago te alta te eno mu dao olama, augwaligo sa muaibao. 
Tama te Sarere silibo si da, teda te alta aga sę yabo polo kegalubao. Tama te dei namba 8de te pris dabe augwaligo dage Israel dabego ofa ebo gagalomainao. Augwaligo te isigo mu dela silibo ofa eyu, me ena dali haliga deli ebo ofa eyu emainao. Tama augwaligo te tama tibode da, teda eno dage dali wiegi yai haliga yaibao. Ena God Genuai Bidi, eno po polo wali dao,” te po wali. 
