﻿Esekiel.
47.
Tialima, te bidigo ena Godigo tempel be polalubo sunumiba ma odasa asali. Tama eno te ąį te sunumi dologodu pedelama, tama giliga asoboba geasa pabo suali. Magi baso meni. Godigo be giliga pedaloboba gesabidi tonalubo suali. Tama te ąį te sunumi saut badu pedelama, tama te ąį te saut badu te alta sesegedu peyu, te alta edelebo suali. 
Tialima, te bidigo ena te u badu not badu elalubo sunumi elaluboba da si pali. Tama da si Godigo be bagulali genuai obo bulu badu pali. Da si biligi pelama, tama da si giliga asobo badu sunumiba saboligi pali. Tama eno te ąį te saut badu te sunumi dologode pedelama, tama pabo suali. 
Tama te bidigo aga usu sabo haliga bono selama, tama te ąį wali peyu, usu sesa pelama, te 500 mita usu nigi pali. Tama agai enabolo ąį nogeao po wali. Tialima, eno ąį nogelama, tama te ąį ugwanu eno sągą aiyadu sągą sawali bogoli dąį yali. 
Tialima, agai te ąį wali 500 mita ma pali, tama agai enabolo te ąį ma nogeao po wali. Tialima, eno te ąį nogeali. Tama te ąį gebo delama, tama eno bogoli ugwadu dąį igiluali, te ena sągąde. Tama agai te ąį 500 mita ma pali. Tama te ąį tede eno tigi tomoba ugwa holama, tomo dąį yali. 
Tama agai te węį dulu ma dulama, tama 500 mita ma pali. Tama te wę gebo dąį elalubaso, tama ena nogeabo usu meni yani. Te pesagedu te bidi dabe wę paluama, nogeabo usu elaluali. 
Te bidigo enabolo e tama po walali, “Tǫde bidi, nago te sę yali dabe po sula silaliwe?” Agai po ola silibo si, da si te ąį dulu ugwaba ma holali. 
Te da si ma geasa pabo sogo eno te ąį u badu me, e badu me, te ni dabe hauwa dolalua pabo suali. 
Tama agai enabolo e tama po walali, “Te ąį te giliga asobo badu pelama, tama Jordan ąį odogo malu badu pelama, tama sigi ąį Detsiba dolo pabo dao. Megi da, sigi ąį Detsi tamu hauwa elalubao. Tiali goli, te ąįgo te sigi ąį wiegi yai ma ilaibao. 
Tigidali haniani ąį hasa dabe te ąį pabo pesagedu tama bidaibao. Tama te ąįde sųgų hauwa mu bidaibao. Magi baso meni. Te ąįgo sigi ąį Detsigo tamu ąį wiegi yai ilaibao. Tama te ąį pabo pesage tigidali badu da, te tigidali nai dabe holoyu naga yaibao. 
Te sųgų sabo sę ebo bidi dabego te sigi ąį Detsi kemi sane badu dolaluyu, sųgų sabo wa te ąįba sąnama, tama sųgų saibao, te bulu Eneklaimdu gagalama, pelama, bulu Engediba usu nigi paibao. Tama augwaligo sųgų sabo sę siliyu, augwa wa dabe ąį kemi sanede muaibao, te wa dabe te kemi sanede omainogo. Te Detsi ąįde elalubo haniani sųgų dabe te Mediterenian tamu ąįde bidibo sųgų tiwai mu bidaibao. 
Tiali goli, te sele pu ąį dabego ąį dabe te sigi ąį pąde elalua pabo te ąį dabe wiegi yai me egobeo. Menio. Te pu ąį dabe te tamu sabo ąį tiwai elaluaibao. 
Tama te Godigo tempel bedu pedelali ąį bogo si badu te wiegi yai ni du walobo ni holaibo. Te ni yabe dabe te me sasi egobeo. Tama augwaligo gesi noma nai tigidali poluade waliyu yaibao. Magi baso meni. Te ąį te Godigo bedu asobo ąį da, tama te ąį pagede elalubo ni dabe sa weyu, tama tiaibao. Te bidi dabego te ni du tuaibao, tama te ni yabe dabe selama, tama augwa haniani gasi dabe usu iliyu yainu saibao,” te bidigo te po wai. 
God Genuai Bidigo e tama po wali, “Eno dage Israel dabego wąį dabe dali bomai po mu dąų walai dao. Te eno dagebolo te Israel tǫ dagebolo menama, tama te tǫ dagego tǫ tigidali sogo elaluaibao. Dagego te tǫ dage Israel hani nogo si olama, sągą me badu si haniba dobola siąo. Tigidali wąį hanigo te tǫ pedai deli badu siyu yaibao. Tiali goli, Josepgo hanigo da, te tǫ pedai si badu saibao. Te tǫ dąį da, e tama dao,” wali. 
“Te u not badu te tǫ dąį te genuai tamu ąį Meditereniande gagalama, tama pelama, giliga asobo badu te taun Hetlon usu nigi pelama, tama taun Hamat me taun Sedatba pabo sunumiba usu nigi pelama, tama ma pelama, taun Berota me taun Sibraim usu nigi pabo dao. Te Sibraim te tǫ pedai Damaskus me tǫ pedai Hamat si tomode elalubo dąįde elalubao. Tama dagego tǫ dąį pelama, taun Tikonba usu nigi pali dao. Te taun te distrik Hauran tǫde dąį dao. 
Tialima, te kantri Israel tǫ dąį te genuai tamu ąį Mediterenian badu gagalama, pelama, taun Enon usu nigi pali dao. Te not badu tǫ dąį te dąį te saut badu te Damaskus me Hamat tǫ dąįde elalubao,” wali. 
“Tama giliga asobo badu tǫ dąį te Damaskus taun me distrik Hauran tǫdu pelama, Jordan ąį dulu pelama, tama saut badu Israel dabego tǫdu me distrik Gileat tǫdu pali dao. Tama pelama, sautba saboligi pelama, te sigi ąį Detsiba usu nigi pali,” wali. 
“Tama me te saut badu tǫ dąį te taun Tamardu gagalama, tama giliga degebo badu tama peyu, te ąį elalubo bulu du peyu, te bulu augwaligo Kades Meriba wabo buluba usu nigi pali. Tama obanu gana holama, tama ąį dulu holama, Isip dabego dąįdu pelama, genuai tamu ąį Mediterenianba usu nigi pali dao.” 
“Tama giliga dega sabo badu tǫ dąį te not badu pelama, tama genuai tamu ąį Mediterenian kemi sanedu pelama, tama u not badu te dąį gagalali pesageba usu nigi pali,” wali. 
“Dagego te dąį dabe tomode elalubo tǫ duga deli deli hani dabeba dobola siąo. 
Tama te deli deli hanigo tǫ te augwa wai dabe nosali pedalobo bagego tǫ elaluaibao. Tama dagego tǫ dąį elama, dobayu da, teda dagego gasa hani bidi dabe augwa we dabe dage dali bidiyu, wai ame nani bagego tǫ me dąį elama maiąo. Dagego homugo e tama tiao, te bidi dabe augwali te Israel dabe naga dao olama, tama augwaliba me te tǫ togwa maiąo. 
Te deli deli Israel hanigo augwa dali bidibo gasa hani bidi dage dali bidibo bage tǫ togwa maiąo. Te da, God Genuai Bidi eno po dao,” te po wai. 
