﻿Daniel.
5.
Te Belsasar Babilonde king bidali sogo, agai genuai nai da me deli tuali. Agai te aga gegunai bidi dabe te nai tuboba asomainu i olama, tama augwali aga dali te wain ąį tuali, te kingo wiegi yai genuai be tomode. Te sisinani gegunai bidi dabe nedali namba, te tiwai, te 1,000 bidi dabe dao. 
Augwali te wę tudubadi, tama Belsasargo te aga sę bidi dabeba walama, te gol kap dabe, me silva me selama, sesao wali. Te kap dabe te aga wąį Nebukatnesargo te Godigo be, te moni lotu be tempel te Jerusalemde selama, tama te Babilonba selasa asai. Kingo homugo aga dali, te gegunai bidi dabe me, te aga we mu dabe dali, me te i badu daganalubo si wali we hani dabe dali, augwali te kapudu wain wę tuainu yai. 
Tialima, te sę ebo bidi dabego te kap dabe seselama, tama tigidali bidi me we dabe augwaligo te kapde wę tualio. 
Augwaligo te wain wę tuduladu, tama augwaligo te gol, me silva, me bras, me ain, me ni, me masigi, te nai dabego nigali god dabe augwaligo te nogi ugwaba sabo sę yali. 
Tialima, polo tama bidi me deligo nogo te be habu togwa sali pai tede pedelama, tama te nogogo nogo ge me deligo te pai ugwadu tede po asębo sę yali. Te badu te lam sole ula genuai ebadi, tama kingo te nogo gego asębo te hania mu sualio. 
King te wi mu yali, tama aga gesabidi te hasegelama, tedela yai pedelali, tama aga bomo me silali, tama aga tigi dili dabe te mumunu eyu, didibili yalio. 
Agai te bidi dabe augwaliba te i bomo elama weyu, augwaligo te sę ebo page konea pelama, te osabo bidi dabe, me te po page kolesaga koneai bidi dabe te sę pedalubaso, te augwali i wali, te augwali asomainu yai. Augwali asobo si da, teda kingo augwaliba te tama po wali, “Te bidi me deligo te po nedelama, tama enaba te po page pusubaso da, teda eno agaba te kingo mubo mama yai name ugwa muaibao. Tama eno te sen gol aga mageba domonama, tama aga genuai nogi elaluaibao,” wali. “Tama aga te eno gavmande te sela wali ofisa bidi pedelaibao,” wai. 
Kingo te po aga te po page koneai bidi tigidaliba wali, tiali goli niwai bidi me deligo te be paide asęani po me nedesiąwai. Tama te augwali me deligo kingba te asęani po page me wabeo. 
Tialima, king Belsasar te wi dwai mu elama, tama aga gesabidi te tedela mu hasegeligi palio. Tama te gegunai bidi dabe te moni homu mu yai, magi baso meni, te augwaligo magi sę deli me yabo usu me isąwanio. 
Te king dali, aga genuai bidi dabe daligo posolu wali. Te kingo idago te posolu wabo odama, tama aga te nai tubo be habu tomoba pali. Tama agai te po wali, “King, nage te sesemane sogo bugagia bidagameo. Te sę ebogo te nage homu poma peyu, tama nago gesabidi tedela eyu, nago haliga te dwai me emainu iligio. 
Odao. Te nago bulu tǫde te bidi me deli bidibao, tama te bomai god dabego agaba te wiegi yai homu kolesaga mawai. Te naga wąį king bidali sogo, agai te bidigo te wiegi yai homu kolesaga koneai elalubo suali, tama agai koneani kolesaga te genuai mu, te god dabego koneani kolesagaba usu nani. Tama nago wąį, king Nebukatnesargo, aga te bidi osabo tama aga te gasa kolesaga koneani bidi dabego tobolu bidi nigilama bidali. Te naga wąįgo te tama tiali, 
magi baso meni, te bidigo koneani kolesaga te tedali gasagi yai mu elalu, tama agai te na ebo page dabe, me te po begelama wabo po me, tama te geme dualali po page me, pusuyu yali. Tama nago te bidi Danielba po ola tolao, king Nebukatnesargo aga nogi te Beltesasar poali, tama agaba hanalugi pelama, te aga aselama, te nageba te be habu paide elalubo asęani po page pusagasomainogo yao,” te king aga idago te po wai. 
Tama tialima, augwaligo Daniel te tomoba sela aselama, tama aga te king pąba doligi pali. Tama kingo agabolo te tama po wai, “Nage Daniel, nage te Juda bidi me deli da, agawe? Nage te eno wąį king Nebukatnesargo polobadu sela asali hani bidi me deli da homu ebao. 
Eno te tiwai odali, te god dabego nageba wiegi yai homu kolesaga menama, tama nago koneani kolesaga te genuai elalubao wali. 
Eno te po page koneai bidi dabe i olama, te be habu paide elalubo po nedagaselama, te enabolo page pusao wali, tiali goli augwali usu me isąwai. 
Tiali goli, eno odali, te nago da te tobage po page koneama, tama te geme dualali po tiwai me te nago konebo dao, wali. Tialima, nago te po page nedabo usu elama, tama enabolo nago te po page pusubaso da, teda eno nageba te kingo mubo mama yai ugwa name munama, tama eno nago mageba te sen gol munama, te nago nogi genuai elalueibao. Tama nage te eno gavmande te sela wabo ofisa bidi pedalumainu nigilaibao,” te po king Belsasargo wali. 
Tialima, Danielgo te tama po wei ponama, te po wali, “Tagalao, eno nagede te wiegi yai nai me deli me sogobeo. Te nago homugo wei homu ebaso da, teda nago gasa bidiba mao. Tiali goli, king, megi da, eno te po nedama, tama nagebolo te po page pusaibao.” 
“Odao. Te Ugwadu Mu Bidibo Godigo te nago wąį Nebukatnesar te bomai genuai king pedalumainu ilali. Tama agai genuai nogi elalu, te ugwanu egulama, tama ugwadu daide mu elaluai dao. 
Agai bomo genuai mu elaluali, tama teyu te tigidali bulu tǫ kantri we bidi dabe, me te tigidali hani, me te tigidali haniani po wabo hani bidi dabe te agade wi mu elama, tama augwali didibili yai. Te agai bidi me deli ela muabo homu eyu da, agai elai dao. Tama te bidi me deli aga bidibo ula elalumainu homu eyu da, agai te bidimainu sula tagalali. Te agai bidi me deligo nogi ugwaba sabo homu ebaso da, agai te tama tiali. Te agai aiyaba elalu, te bidi me deli dolainu homu ebaso da, teda agai te tama tiai dao. 
Tiali goli, nago wąįgo homugo te aga umabo ugwanu mu da homu elama, tama aga hagoma eyu, haniani dobo kolesaga subigila ebaso, tama Godigo aga sela sąnama, tama aga te king me bidibeo, tama aga genuai nogi elaluali te tulaluai dao. 
Godigo agai homu kolesaga te kibu hasa dabego homu kolesaga tiwai pedalumainu ilali, tama te we bidi dabego aga sela sąwani. Tama aga te bulu uni yowi donki dabe dali bidigi pelama, tama aga te bulmakau dabego nosai tubo tiwai yaligia agai me tuali. Tama hulide tulubage segeni aga tigiba tulaluai. Tama nosali agai te tiwai koneani, te Ugwadu Mu Bidibo Godigo te tigidali we bidi tonalubo king bage tonalubo dao homu yalio. Te God agai homugo digi, agai te bidi dabe king pedalumainu ebo dao, te nago ayago aya king Nebukatnesargo te tiwai konea sai dao,” Danielgo te po wai. 
“Te Belsasar, nage te Nebukatnesargo wąį ogwa, tama nago te yali sę dabe koneai. Tiali goli, naga digi naga aiyaba elalubeo. Menio. 
Nago naga digi naga nogi ugwaba sabo homu elama, tama dagalude Genuai Bidigo nogi aiyaba elaluabo homu yai. Nago te sę bidi dabeba olama, tama augwaligo te nago wąįgo te Godigo bede sela asali kap dabe seselama, tama nage dali, te naga genuai bidi dabe dali, me te nago we mu dabe dali, me te nago si wali hani we dabe dali, dage tigidaligo wain ąį te kapde tuali. Tama dagego te bidi dabego te gol, me silva, me bras, me ain, me ni, me masigi, te tama nai dabego nigali tibo god dabego nogi ugwaba salio. Te god dabego te tonono me bilisąyu, tama po me odisąma, tama te magi sę me konesiąwai. God deligo naga te nago bidibo ula, me nago ebo sę tigidali te tonalubao. Tiali goli, nago agai nogi ugwaba me sabeo. 
Tama tibaso, Godigo te nogo tagala palama, te be paide po asęagasali.” 
“Te asęani po te tiwai, ‘Nedao, Nedao, Dagalao, Pepedao.’ 
Tama te ‘Nedao’ wali po page te tiwai, Godigo nage te king bidabo nisu naga sogo te nedalio. Megi nago silibo side dao. 
Tama te ‘Dagalao’ wali po page te tiwai, Godigo nago kolesaga dagalalio, tama te ola mayu dagalali, te nago wiegi yai kolesaga me elalubeo. 
Tama te ‘Pedao’ wali po page, te tiwai, Godigo te nago tonaluali tǫ kantri pedelama, tama me badu te Midia dabeba doba yali, te me badu Persiaba doba yalio,” Danielgo te po wali. 
King Belsasargo te po odolama, tialima agai te bidi dabeba walama, te mama yai ugwa name te Danielba munama, tama te sen gol aga mageba muao, wali. Tama kingo Daniel te gavman ofisa bidi te sela wabo bidi nigilali. 
Tialima, te sogo hulide naga tama, te Midia dabe aselama, te Belsasar ela muagasali, te Babilon king dao. 
Tama Darius te Midia tǫ pedai bidi te king pedelama, tama te bulu tǫ kantri tonaluai. Dariusgo kibu be te bidi sese sela, te me si, 62 kibu be elalubadi, te sogo aga te Babilon king pedelama, bidai dao. 
